2Mav 22
22
Aasia Mũsumbĩ wa Yuta
(2Asu 8.25-29; 9.21-28)
1Andũ ala matwĩe Yelũsalemu nĩmatw'ĩkĩthisye Aasia mwana ũla mũnini wa Yeolamu mũsumbĩ ĩtina wa ĩthe wake. Meekie ũu nũndũ asikalĩ ma kaũ, ala mookanĩtye na Aalavu maeemanĩ ma andũ asu ma Yelũsalemu, nĩmooaĩte ana ma Yeolamu ala akũũ onthe. Kwoou Aasia mwana wa Yeolamu nĩwatw'ĩkie mũsumbĩ wa Yuta. 2Atw'ĩkie mũsumbĩ e na ũkũũ wa myaka mĩongo ĩna na ĩlĩ.#22.2 mĩongo ĩna na ĩlĩ: Maandĩko ma Ndeto ya Ngai ma Kĩevelani maĩtye mĩongo ĩlĩ na ĩlĩ. Sisya 2Asu 8.26 Asumbĩkie vandũ va mwaka ũmwe e Yelũsalemu. Inyia wa Aasia eetawa Athalia mwĩsũkũũe wa Omili. 3Aasia aatĩĩie ngelekany'o nthũku ya andũ ma mũsyĩ wa Aavu, nũndũ inyia wake aĩ mũtai wake kwĩka maũndũ ala mathũku. 4Avĩtĩisye Mwĩai Ngai kwa kwĩka maũndũ mathũku o ũndũ andũ ma mũsyĩ wa Aavu meekaa, nũndũ ĩthe wake amina kũkw'a nĩmo matw'ĩkie atai make, na matuma ethĩwa na ũvalũku mũnene. 5O na nĩwaatĩĩie ũtao woo na aendany'a na Yolamu mwana wa Aavu mũsumbĩ wa Ĩsilaeli makokite na Aasaeli mũsumbĩ wa Silia me Lamothi-ngileati. Me kaũnĩ ũsu, Yolamu nĩwaũmĩiw'e nĩ asikalĩ ma Silia, 6na asyoka Yesileeli nĩ kana akaiitwe kũla waũmĩiw'e e ndũanĩ ya Lamothi, yĩla wokitaa na Aasaeli mũsumbĩ wa Silia. Aasia mwana wa Yeolamu mũsumbĩ wa Yuta nĩwaendie Yesileeli akasisye Yolamu nũndũ aĩ mũwau.
7Waĩ mũvango wa Ngai kana ũvalũku wa Aasia ũkaumana na kũthi kwake kũthokea Yeolamu, nũndũ yĩla wavikie vau, nĩwaendanisye na Yeolamu makakomane na Yeũ mwana wa Nimisi, ũla Mwĩai Ngai wanyuvĩte amine andũ ma mũsyĩ wa Aavu. 8Yeũ aendee na kwĩanĩsya ũtw'ĩo wa Ngai andũnĩ ma mũsyĩ wa Aavu, nĩwakomanie na atongoi ma Yuta na ana ma ana-a-ĩthe ma Aasia ala maendanĩtye nake, na amoaa. 9Yeũ nĩwaendeeie kũmantha Aasia. Aasia eethĩiwe evithĩte Samalia na akwatwa. Akwatwa nĩwatwaiwe vala ve Yeũ na ĩndĩ ooawa. Ĩndĩ nĩmathikie mwĩĩ wake nũndũ wa ndaĩa ĩla manengete Mũsumbĩ Yeosavati ũmae wake, ũla wathũkũmie Mwĩai Ngai na ngoo yake yonthe.
Vai mũndũ o na ũmwe wa mũsyĩ wa Aasia waatiala, na waĩ atonya kũsumbĩka Yuta.
Athalia Ayĩyosea Kĩvĩla kya Kĩ-ũsumbĩ na Vinya
(2Asu 11.1-3)
10Yĩla Athalia inyia wa Aasia wamanyie kana mwana wake nũminĩte kũawa, nĩweeaie andũ onthe ma mũsyĩ wa kĩ-ũsumbĩ moawe. 11Ĩndĩ Yeoseva mwĩĩtu wa Mũsumbĩ Yeolamu nĩwoosie Yoasi mwana wa Aasia amumya vala ve ana ma kĩ-ũsumbĩ ala makilĩlye kũawa. Nĩwamwosie na amũvitha vamwe na mũei wake kasũmbanĩ ka kũkoma Ĩkalũnĩ. Kwoou nũndũ Yeoseva mwĩĩtu wa Mũsumbĩ Yeolamu, mũka wa Mũthembi Yeoiata aĩ mwĩĩtu-a-ĩthe wa Aasia, nĩwavithie Yoasi kuma kũla kwĩ Athalia nĩ kana ndakamũae. 12Yoasi nĩwekalile namo avithĩtwe Ĩkalũnĩ vandũ va ĩvinda ya myaka thanthatũ yĩla Athalia wasumbĩkĩte nthĩ ĩsu.
Currently Selected:
2Mav 22: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
