2Mav 21
21
Mũsumbĩ Yeolamu wa Yuta
(2Asu 8.17-24)
1Yeosavati nĩwakwie na athikwa mbũanĩ sya kĩ-ũsumbĩ Ndũanĩ ya Ndeviti. Yeolamu mwana wake nĩwatw'ĩkie mũsumbĩ ĩtina wake. 2Yeolamu mwana wa Mũsumbĩ Yeosavati aĩ na ana-a-ĩthe thanthatũ: Asalia, Yeieli, Nzekalia, Asalia, Mikaeli na Sevatia. 3Yeosavati ĩthe woo nĩwamanengie mĩthĩnzĩo mĩnene ya thaavu, silĩva na syĩndũ ingĩ sya thooa mũnene. O ta ũu nĩwamanengie ndũa mbiĩĩe sya Yuta. Yeosavati nĩwanyuvie Yeolamu atw'ĩke mũsumbĩ ĩtina wake, nũndũ nĩwe waĩ mwana wake ũla mũkũũ. 4Yeolamu amina kũtw'ĩka mũsumbĩ na kwĩlũlũmĩĩlya, nĩwooaie ana-a-ĩthe make onthe, na o ta ũu ooaa atongoi amwe ma Ĩsilaeli. 5Yeolamu atw'ĩkie mũsumbĩ e na ũkũũ wa myaka mĩongo ĩtatũ na ĩlĩ, na asumbĩka vandũ va myaka nyanya e Yelũsalemu. 6Aatĩĩie ngelekany'o nthũku ya asumbĩ ma Ĩsilaeli o tondũ andũ ma mũsyĩ wa Aavu meekĩte, nũndũ atwaĩte mwĩĩtu wa Aavu. Nĩwavĩtĩisye Mwĩai Ngai. 7#1Asu 11.36 Ĩndĩ ũu wĩ o vo, Mwĩai Ngai ndaaendeew'a nĩ kwananga andũ ma mũsyĩ wa Ndeviti, nũndũ wa ũtianĩo ũla watianĩĩte na Ndeviti kana nzyawa syake ikaendeea kũsumbĩka ĩvindanĩ yonthe yĩla yũkĩte.
8 #
Mwa 27.40
Ĩvindanĩ yĩla Yeolamu wasumbĩkĩte, andũ ma nthĩ ya Etomu nĩmang'endeie Yuta, na meenyuvĩa mũsumbĩ woo. 9Kwoou Yeolamu e na anene make ma asikalĩ na makasya make onthe ma kau nĩmakĩlanĩlye mathi Etomu. Me vau Aetomu nĩmamathyũlũlũkile, ĩndĩ ũtukũ Yeolamu vamwe na anene make ma makasya ma kaũ, nĩmokitie namo na mavĩtĩla katĩ woo mathi. 10Kuma ĩvindanĩ yĩu nginya ũmũnthĩ, nthĩ ya Etomu yĩkalaa ĩing'endea Yuta. Ĩvindanĩ o yĩu, andũ ma ndũa ya Livina o namo nĩmaleanile na ũsumbĩ wa Yeolamu, nũndũ nĩwatiĩte Mwĩai Ngai, Ngai wa aaũmae make. 11O vamwe na ũu, Yeolamu nĩwaakĩte kũndũ kwa kũthaithĩa ngai sya mĩvw'anano nthĩ yĩ iĩma ya Yuta, na akatuma andũ ma Yuta na ma Yelũsalemu methĩwa mate aĩkĩĩku kũla kwĩ Mwĩai Ngai.
12Mwathani Eliya nĩwaandĩkĩie Yeolamu valũa. Valũa ũsu waĩtye ũũ:
“Mwĩai Ngai, Ngai wa ũmae waku Ndeviti easya atĩĩ, ‘Nũleete kũatĩĩa ngelekany'o ya ĩthe waku Yeosavati, kana ya ũmae waku Asa mũsumbĩ wa Yuta. 13Vandũ va ũu, nũatĩĩe ngelekany'o ya asumbĩ ma Ĩsilaeli, na ũkatongoesya andũ ma Yuta na ma Yelũsalemu kwĩthĩwa mate aĩkĩĩku kũla kwĩ Ngai, o tondũ Aavu na ala masumbĩkie ĩtina wake matongoeisye andũ ma Ĩsilaeli kwĩthĩwa mate aĩkĩĩku. O ta ũu we nĩwooaie ana-a-ĩthe maku; andũ ma mũsyĩ wa ĩthe waku, ala maĩ aseo mbee waku. 14Nũndũ wa kĩtumi kĩu, Mwĩai Ngai nĩkũete ũkany'o mũthũku kwa andũ maku, syana syaku, iveti syaku na ayananga ũthwii waku w'onthe. 15We naku nũũkwatwa nĩ ũwau mũthũku mũno wa ĩvu, ũla wĩendeeaa kũthũka kĩla mũthenya, nginya ũtume maa maku metĩka.’ ”
16Mwĩai Ngai nĩwatumie Avilisiti na Aalavu matũanĩe na andũ ma Ethiovia methĩwa na ũmaitha na Yeolamu. 17Nĩmavithũkĩie Yuta na makua syĩndũ syonthe ila meethĩie nyũmbanĩ ya kĩ-ũsumbĩ. O ta ũu nĩmakuie ana ma mũsumbĩ na iveti syake. Mayaatialya o na ũmwe wa ana make, ate o Aasia mwana ũla wake mũnini.
18Ĩtina wa maũndũ asu onthe, Mwĩai Ngai nĩwatumie Yeolamu akwatwa nĩ ũwau wa ĩvu ũtavoa. 19Vandũ va ĩvinda ya myaka ĩlĩ, ũwau ũsu nĩwaendeeie kũthũka; maa make nĩmetĩkie nũndũ wa ũwau ũsu, na akw'a e na kyalya kingĩ. Andũ mayaakwatya mwaki wa kũmũnenga ndaĩa, ũndũ makwatasya ĩvindanĩ ya aaũmae make.
20Yeolamu atw'ĩkie mũsumbĩ e na ũkũũ wa myaka mĩongo ĩtatũ na ĩlĩ. Asumbĩkie e Yelũsalemu vandũ va myaka nyanya. Yĩla wakwie, vai mũndũ waamũĩĩa. Nĩwathikiwe Ndũanĩ ya Ndeviti, ĩndĩ ti mbũanĩ ila asumbĩ mathikawa.
Currently Selected:
2Mav 21: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
