2Mav 17
17
Yeosavati Mũsumbĩ wa Yuta
1Yeosavati nĩwatw'ĩkie mũsumbĩ ĩtina wa Asa ĩthe wake, na eeyĩkĩa vinya ndakasindwe nĩ Ĩsilaeli. 2Nĩwaiie nguthu sya asikalĩ ndũanĩ syonthe mbiĩĩe sya Yuta, na aia asikalĩ angĩ motũinĩ ala angĩ ma Yuta, na ndũanĩ syonthe ila Asa ĩthe wake wakwatĩte kĩsionĩ kya Evalaimu. 3Mwĩai Ngai nĩwaathimie Yeosavati nũndũ nĩwaatĩĩie mwĩkalo ũla ĩthe wake#17.3 ĩthe wake: Maandĩko amwe ma Ndeto ya Ngai maĩtye Ndeviti ĩthe wake. waĩ naw'o mbeenĩ. Ndaathaitha ngai sya mũvw'anano ila syĩtawa Mbaali, 4ĩndĩ nĩweekaa kwenda kwa Ngai wa ĩthe wake na kũatĩĩa mĩao yake, na ndaaĩka ũndũ andũ ma Ĩsilaeli meekaa. 5Mwĩai Ngai nĩwanengie Yeosavati kwĩthĩwa na ũtonyi mwingĩ asumbĩkĩte Yuta. Andũ onthe nĩmamũeteae mĩthĩnzĩo, nginya atw'ĩka mũthwii mũno na mũndũ ũnengetwe ndaĩa mũno. 6Nĩwendaa mũno ngoonĩ kũthũkũma Mwĩai Ngai, na nĩwaanangie kũndũ kw'onthe kũla kwathaithĩawa ngai sya mĩvw'anano nthĩnĩ wa Yuta, na o ta ũu aananga ituĩ sya ngai nga ya mũvw'anano ĩla yĩtawa Asela ila syaĩ Yuta.
7Mwakanĩ wa katatũ wa kũsumbĩka kwake, Yeosavati nĩwatũmie anini make makamanyĩsye ndũanĩ sya Yuta. Anini asu maĩ: Mbeni-aili, Ovatia, Nzekalia, Nethaneli na Mikaia. 8Maendanĩtye na Alivai aa: Semaia, Nethania, Nzevatia, Asaeli, Semilamothi, Yonathani, Atoniya, Toviya, na Tovu-atoniya; na athembi aa: Elisama na Yeolamu. 9Nĩmoosie Ĩvuku ya Mĩao ya Mwĩai Ngai, na mathi ndũanĩ syonthe sya Yuta mamanyĩĩtye andũ Mĩao ĩsu.
Ũnene wa Mũsumbĩ Yeosavati
10Mwĩai Ngai nĩwatumie mosumbĩ onthe ala mathyũlũlũkĩte Yuta makwatwa nĩ w'ĩa, weethĩa maitonya kũthi kũkita na Yeosavati. 11Avilisiti amwe nĩmaeteie Yeosavati mĩthĩnzĩo, na mũvothi wa silĩva, namo Aalavu mamũetee ndũũme ngili mũonza na maana mũonza, na mbũi ngili mũonza na maana mũonza. 12Kwoou ũtonyi wa Yeosavati nĩwaendeeie kwongeleka. Nĩwaakie myako mĩlũmu na ndũa sya kwia syĩndũ Yuta, 13na aia syĩndũ mbingĩ mũno kw'o. Nĩwaiie asikalĩ maĩ ngũmbaũ Yelũsalemu. 14Ũtalo woo kwĩanana na mĩsyĩ yoo wailyĩ ta ũũ: Atena nĩwe waĩ mũnene wa nguthu sya asikalĩ ma kuma mĩsyĩ ya mbaĩ ya Yuta, na aũngamĩe asikalĩ ngũmbaũ ngili maana atatũ. 15Ũla wamũatĩĩe kwa ũnene nĩ Yeoanani, ũla waũngamĩe asikalĩ ngili maana elĩ na mĩongo nyanya. 16Wa katatũ ũnenenĩ aĩ Amasia mwana wa Nzikili, ũla waũngamĩe asikalĩ ngũmbaũ ngili maana elĩ. (Amasia nĩwe weeyumĩtye we mwene kũthũkũma Mwĩai Ngai.) 17Eliata nĩwe waĩ mũnene wa nguthu sya asikalĩ kuma mĩsyĩnĩ ya mbaĩ ya Mbengyameni. Eliata aĩ mũsikalĩ ngũmbaũ na aũngamĩe asikalĩ ngili maana elĩ ala maĩ na ngao na meesĩ kũtũmĩa ũta. 18Ũla wamũatĩĩe kwa ũnene nĩ Yeosavatu, nake aũngamĩe asikalĩ ngili ĩana na mĩongo nyanya meeyũmbanĩtye kũthi kũkita. 19Asikalĩ asu mathũkũmaa mũsumbĩ me Yelũsalemu. Kwongela asu, mũsumbĩ nĩwaiĩte asikalĩ angĩ ndũanĩ ila ingĩ mbiĩĩe sya Yuta.
Currently Selected:
2Mav 17: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
