2Mav 18
18
Mwathani Mikaia Ayathana Kũsindwa kwa Aavu
(1Asu 22.1-28)
1Yĩla Yeosavati mũsumbĩ wa Yuta watw'ĩkie mũthwii na mũndũ wĩ ndaĩa, nĩwaseũvisye ngwatanĩo katĩ wa mũsyĩ wake na mũsyĩ wa Aavu mũsumbĩ wa Ĩsilaeli kwa nzĩa ya mũtwaano. 2Ĩtina wa myaka yĩana ũndũ mũna, Yeosavati nĩwaendie Samalia kũthokea Aavu. Aavu nĩwathĩnzĩie Yeosavati vamwe na andũ ala maendanĩtye nake malondu maingĩ na ng'ombe mbingĩ. Aavu nĩweesũvie Yeosavati aendany'e nake makavithũkĩe ndũa ya Lamothi ĩla yĩ Ngileati. 3Aavu nĩwakũlilye Yeosavati atĩĩ, “Nĩtũkũendany'a tũkavithũkĩe ndũa ya Lamothi?”
Yeosavati nĩwamũsũngĩie amwĩa atĩĩ, “Ĩĩ, nyie nĩ vamwe naku; asikalĩ makwa nĩ asikalĩ maku; nĩtũkũendany'a kaũnĩ. 4Ĩndĩ mbee wa tũtanathi, amba kũkũlya Mwĩai Ngai ũtao.”
5Nĩvo ĩndĩ Aavu mũsumbĩ wa Ĩsilaeli woombanisye athani maana ana. Nĩwamakũlilye atĩĩ, “Nĩtũũthi kũvithũkĩa ndũa ya Lamothi ĩla yĩ Ngileati kana tũeke?”
Athani asu nĩmamũsũngĩie mamwĩa atĩĩ, “Enda! Ngai nũkũtuma ũsinda.”
6Ĩndĩ nake Yeosavati nĩwakũlilye atĩĩ, “Nĩvethĩwa mwathani ũngĩ wa Mwĩai Ngai ũla tũtonya kũkũlya ũtao?”
7Aavu nĩwasũngĩie Yeosavati amwĩa atĩĩ, “Ve mwathani ũmwe ũtialĩte, nake nĩ Mikaia mwana wa Ĩmila. Nĩtũtonya kũmũkũlya ũtao kuma kwa Mwĩai Ngai, ĩndĩ nĩnĩmũmenete nũndũ ndesaa kwathana ũndũ mũseo ĩũlũ wakwa; kĩla ĩvinda athanaa maũndũ mathũku ĩũlũ wakwa.”
Yeosavati nĩwasũngĩie Aavu amwĩa atĩĩ, “We mũsumbĩ ndwaĩlĩte kũneena ũu.”
8Nĩvo ĩndĩ Aavu weetie ũmwe wa anini make na amwĩa atĩĩ, “Enda mĩtũkĩ ũkaete Mikaia mwana wa Ĩmila oke vaa.”
9Ĩvindanĩ yĩu Aavu mũsumbĩ wa Ĩsilaeli, na Yeosavati mũsumbĩ wa Yuta mekĩĩte ngũa syoo sya kĩ-ũsumbĩ, nĩmekalĩte ivĩlanĩ syoo sya kĩ-ũsumbĩ, me kĩvũĩonĩ kĩla kyaĩ vakuvĩ na mũvĩa wa ndũa ya Samalia. Athani onthe nĩmaendeeie kwathana me vau mbee woo. 10Ũmwe wa athani asu, Nzetekia mwana wa Kenaana, nĩwaseũvĩtye mbya sya kyũma, na eea Aavu atĩĩ, “Mwĩai Ngai easya atĩĩ, ‘Ũkakima Asilia nginya ũmamine ũitũmĩa mbya ii.’ ” 11Athani ala angĩ onthe o namo nĩmathanie o ũndũ ũmwe mayasya atĩĩ, “Enda ũkavithũkĩe ndũa ya Lamothi ĩla yĩ Ngileati na nũũsinda, Mwĩai Ngai nũkũtuma ũsinda.”
12Mũndũ ũla watũmĩtwe akete Mikaia nĩwamwĩie atĩĩ, “Athani ala angĩ onthe nĩmathana kana mũsumbĩ nũkũsinda; naku o ta ũu athana kana mũsumbĩ nũkũsinda.”
13Ĩndĩ Mikaia amwĩa, “Nĩngwĩvĩta ĩsyĩtwanĩ ya Mwĩai Ngai ũla wĩ thayũ, kana nyie nĩneena o ũndũ ũla Ngai wakwa ũkũmbĩa nĩneene.”
14Yĩla Mikaia wavikie vala ve Mũsumbĩ Aavu, Aavu nĩwamũkũlilye atĩĩ, “Mikaia, nĩtũũthi kũvithũkĩa ndũa ya Lamothi ĩla yĩ Ngileati, kana tũeke?”
Mikaia nĩwamũsũngĩie amwĩa, “Endai mũkavithũkĩe nĩmũũsinda, Mwĩai Ngai nũkũtuma mũsinda.”
15Ĩndĩ nake Aavu amwĩa atĩĩ, “Neenaa ũla w'o yĩla ũũneene nakwa ĩsyĩtwanĩ ya Mwĩai Ngai! Nĩkũtavya ũu mavinda meana ata?”
16 #
Mot 27.17; Esek 34.5; Mat 9.36; Mk 6.34 Mikaia amwĩa, “Nĩnonie asikalĩ ma Ĩsilaeli onthe manyaĩĩkĩe iĩmanĩ ta malondu mate na mũĩthi, na Mwĩai Ngai asya, ‘Andũ aa maĩ na mũtongoi, kwoou kĩla mũndũ nĩasyoke mũsyĩ kwake na mũuo.’ ”
17Nĩvo ĩndĩ Aavu weeie Yeosavati atĩĩ, “Ndikũtavisye kana Mikaia ndesaa kwathana ũndũ ũseo ĩũlũ wakwa? Athanaa o maũndũ mathũku!”
18Mikaia nĩwaendeeie kũneena asya atĩĩ, “Yu ĩthukĩĩsye ũndũ Mwĩai Ngai ũkwasya! Nĩnonie Mwĩai Ngai ailyĩ kĩvĩlanĩ kyake kya kĩ-ũsumbĩ ĩtunĩ, na nguthu yonthe ya ĩtunĩ ĩũngamĩte ngalĩko yake ya kw'oko kwa aũme na kwa aka. 19Mwĩai Ngai nũkũlilye atĩĩ, ‘Nũũ ũla ũkũthi kũkenga Aavu, nĩ kana athi akavithũkĩe ndũa ya Lamothi ĩla yĩ Ngileati na ayũaĩwa kw'o?’ Kĩla ũmwe nĩwumisye woni wĩ kĩvathũkany'o. 20Nĩvo ĩndĩ vaumĩlile veva ũmwe waũngama mbee wa Mwĩai Ngai na wasya, ‘Nĩngũthi kũmũkenga.’ Mwĩai Ngai nĩwũkũlilye, ‘Wĩtũmĩa nzĩa myaũ?’ 21Naw'o veva ũsu wamũsũngĩa, ‘Nĩngũthi na ngĩtuma athani onthe ma Mũsumbĩ Aavu makengana.’ Mwĩai Ngai nĩweeie veva ũsu, ‘We nũkwĩthĩwa ũtonya kũmũkenga; enda ũkeke ũu.’
22“Ũu nĩw'o wĩkĩkĩte. Mwĩai Ngai nũtumĩte athani aa maku malikwa nĩ veva wa ũvũngũ, na kwoou makaũkenga. Ĩndĩ Mwĩai Ngai nĩwĩaĩte kana we nũũkwatwa nĩ ũndũ ũthũku!”
23Nĩvo ĩndĩ Nzetekia mwana wa Kenaana wathengeeie vala ve Mikaia na amũkũna ĩkovi ĩtau, na amũkũlya atĩĩ, “Veva wa Mwĩai Ngai aumie vala nĩĩ ĩndĩĩ na ooka kũneena naku?”
24Mikaia nĩwasũngĩie amwĩa, “Ũkamanya mũthenya ũla wĩthi kwĩvitha kasũmbanĩ ka nthĩnĩ.”
25Nĩvo ĩndĩ Mũsumbĩ Aavu weeaie asya atĩĩ, “Kwatai Mikaia na mũimũtũnga kũla kwĩ Amoni ngavana wa ndũa, na Yoasi mwana wa mũsumbĩ. 26Matavyei mũmee nĩmamwove yela, na maimũnengae kamũkate kanini na kĩw'ũ kĩnini, nginya yĩla nĩsyoka nĩ mũima.”
27Mikaia nĩweeie mũsumbĩ atĩĩ, “Wasyoka wĩ mũima, wĩmanya kwa w'o kana Mwĩai Ngai ndananeena nakwa!” Mikaia nĩwaendeeie kũneena asya, “Kĩla mũndũ nĩew'e ũndũ nasya!”
Kĩkwũ Kya Aavu
(1Asu 22.29-35)
28Nĩvo ĩndĩ Aavu mũsumbĩ wa Ĩsilaeli na Yeosavati mũsumbĩ wa Yuta maendie kũvithũkĩa ndũa ya Lamothi ĩla yĩ Ngileati. 29Aavu nĩwaneenie na Yeosavati amwĩa atĩĩ, “Nyie nĩĩkĩa ngũa ite sya kĩ-ũsumbĩ ndikamanyĩke na ngĩlika kaũnĩ, ĩndĩ we ĩkĩa ngũa syaku sya kĩ-ũsumbĩ.” Kwoou mũsumbĩ wa Ĩsilaeli nĩwaendie kaũnĩ atekĩĩte ngũa syake sya kĩ-ũsumbĩ.
30Mũsumbĩ wa Silia nĩweeaĩĩte anene make ma makasya ma kaũ, akamea maikokite na mũndũ ũngĩ o na wĩva, mũnene kana mũnini, ĩndĩ nĩmokite na mũsumbĩ wa Ĩsilaeli. 31Kwoou yĩla anene asu ma makasya ma kaũ moonie Yeosavati, nĩmaneenie masya atĩĩ, “Ũũ nĩwe mũsumbĩ wa Ĩsilaeli.” Kwoou nĩmaendie vala ve Yeosavati mokite nake, ĩndĩ Yeosavati akaya, na Mwĩai Ngai amũtethya; Mwĩai Ngai nĩwatumie maeka kũkita nake. 32Anene asu ma makasya ma kaũ nĩmamanyie kana ti we mũsumbĩ wa Ĩsilaeli, na kwoou maeka kũmũsembany'a. 33Ĩndĩ mũsikalĩ ũmwe wa Silia nĩwakootie ũta wake atavangĩte eatha ũũ, na kwa vaati aathĩla Aavu mwanyanĩ waĩ vala ĩkoti yake ya kwĩsiĩĩa kĩthũi yakwatanĩlw'e. Nĩvo ĩndĩ Aavu weeie mũsikalĩ ũla watwaĩte ĩkasya yake ya kaũ atĩĩ, “Vĩndũa ĩkasya ũmbumye kaũnĩ! Nĩnaũmĩw'a.” 34Mũthenyanĩ ũsu kaũ nĩwaendeeie kwingĩva. Mũsumbĩ Aavu aaĩĩe ĩkasyanĩ yake ya kaũ elekele Asilia ĩa mawĩoo, na ĩndĩ syũa yĩithũa akw'a.
Currently Selected:
2Mav 18: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
