2Mav 16
16
Mbaasa Mũsumbĩ wa Ĩsilaeli Aivithũkĩa Yuta
(1Asu 15.17-22)
1Mwakanĩ wa mĩongo ĩtatũ na thanthatũ wa kũsumbĩka kwa Asa mũsumbĩ wa Yuta, Mbaasa mũsumbĩ wa Ĩsilaeli nĩwavithũkĩie Yuta na aaka alũlũmĩĩlya ndũa ya Lama, nĩ kana asiĩĩe wĩthĩe vai mũndũ ũtonya kumaala kana kũlika kĩsionĩ kya nthĩ kya Asa mũsumbĩ wa Yuta. 2Kwoou Asa nĩwoosie silĩva na thaavu ũla watialĩte Ĩkalũnĩ na nyũmbanĩ ya kĩ-ũsumbĩ. Nĩwanengie anini make syĩndũ isu maitwae Ndamasikũ kũla kwĩ Mbeni-aatati mũsumbĩ wa Silia. Asa eeĩte anini asu make nĩmathi makee Mbeni-aatati atĩĩ, 3“Eka nyie naku twĩthĩwe twĩ na ngwatanĩo, o tondũ ĩthe wakwa na ĩthe waku maĩ ngwatanĩo. Silĩva na thaavu ũũ nĩ mũthĩnzĩo waku. Ananga ngwatanĩo yaku na Mbaasa mũsumbĩ wa Ĩsilaeli, nĩ kana aeke kũkita nakwa.”
4Mũsumbĩ Mbeni-aatati nĩweetĩkĩlile ũndũ Mũsumbĩ Asa wamũkũlĩtye eke na atũma anene ma asikalĩ ma kaũ vamwe na asikalĩ mokite ndũa sya Ĩsilaeli. Asikalĩ asu nĩmokitie masinda ndũa sya Iyoni, Ndani, Aveli-mbethi-maaka, na ndũa syonthe sya kwia syĩndũ, ila syaĩ kĩsionĩ kya Navutalĩ. 5Yĩla Mũsumbĩ Mbaasa weewie ũndũ kweekĩkĩte, nĩwaekie kwaka ndũa ya Lama. 6Nĩvo ĩndĩ mũsumbĩ Asa watũmie andũ onthe ma Yuta, mathi makakue mavia na mĩtĩ, ĩla Mbaasa watũmĩaa kwaka ndũa ĩsu Lama. Asa nĩwatũmĩie mavia na mĩtĩ ĩsu kũlũlũmĩĩlya ndũa ya Ngeva na ya Misiva.
Mwathani Aanani
7Ĩvindanĩ yĩu Mwathani Aanani nĩwookie vala ve Asa mũsumbĩ wa Yuta na amwĩa atĩĩ, “Nũndũ wĩkwatisye mũsumbĩ wa Silia vandũ va kwĩkwatya Mwĩai Ngai, Ngai waku, asikalĩ ma kaũ ma Silia nĩmavonokie kuma ũtonyinĩ waku. 8Aethiovia na Alimbya maĩ nguthu nene mũno syĩ na makasya maingĩ ma kaũ na asikalĩ malĩsĩte mbalasinĩ, ĩndĩ we yĩla weekwatisye Mwĩai Ngai, nĩwatumie ũmasinda. 9Mwĩai Ngai nĩwĩkalaa asyaĩĩsye nthĩ yonthe nĩ kana anenge vinya andũ onthe ala menenganĩte kwake na ngoo syoo syonthe. Wĩkĩte ũndũ wa ũtumanu, na kwoou kuma yu na kũendeea, ũkekalaa ũyũkita.” 10Ndeto isu nĩsyatumie Asa athatĩa mwathani Aanani, nginya amwova mĩtĩnĩ ya kwova andũ#16.10: mĩtĩnĩ ya kwova andũ: Mĩtĩ ĩĩ yaseũvĩtw'e yĩna maima ma kũlikya moko, maũũ, na mũtwe na ĩndĩ mũndũ ayovwa nayo athĩne yela. Ĩvindanĩ o yĩu, Asa nĩwambĩlĩĩilye kũthĩny'a andũ amwe mũno.
Mũthya wa Kũsumbĩka kwa Asa
(1Asu 15.23-24)
11Maũndũ onthe ala Asa weekie yĩla wasumbĩkĩte maandĩkĩtwe Ĩvukunĩ ya Maũndũ ma Mavinda ma Asumbĩ ma Yuta na Ĩsilaeli. 12Mwakanĩ wa mĩongo ĩtatũ na kenda wa kũsumbĩka kwake, Asa nĩwakwatiwe nĩ ũwau wa maũũ. O na vala ũwau wake waĩ mwingĩ, ndaakũlya Mwĩai Ngai amũtethye, ĩndĩ amanthie ũtethyo vala ve aiiti. 13Nĩvo ĩndĩ Asa wakwie mwakanĩ wa mĩongo ĩna na ũmwe wa kũsumbĩka kwake. 14Athikiwe Ndũanĩ ya Ndeviti mbũanĩ ĩla weeyasĩie mwene ĩvianĩ. Mamwĩkĩie ĩsandũkũnĩ yausũĩtw'e syĩndũ syĩ mũuke mũseo sya mĩthemba mingĩ, syaseũvĩtw'e nĩ andũ ala maseũvasya syĩndũ syĩ mũuke mũseo; na mavuva mwaki mũnene mamũnenge ndaĩa.
Currently Selected:
2Mav 16: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
