2Mav 15
15
Ũalyũku ũla Mũsumbĩ Asa Waetie
1Veva wa Ngai nĩwookie kũla kwĩ Asalia mwana wa Oteti. 2Asalia nĩwaendie kũkomana na Mũsumbĩ Asa na amwĩa atĩĩ, “Mbĩthukĩĩsye we Asa, na andũ onthe ma Yuta na Mbengyameni. Mwĩai Ngai e vamwe nenyu ethĩwa mwĩ vamwe nake. Ethĩwa mũkamũmantha, mũkamwona, ĩndĩ ethĩwa mũkamũtia, akamũtia. 3Andũ ma Ĩsilaeli nĩmekalile vandũ va ĩvinda ĩasa mate na Ngai ũla wa w'o, mate na athembi ma kũmamanyĩsya, na mate na mĩao. 4Ĩndĩ yĩla makwatiwe nĩ thĩna, nĩmeethyũũĩie Mwĩai Ngai, Ngai wa Ĩsilaeli. Nĩmamũmanthie na mamwona. 5Mĩthenyanĩ ĩsu vai mũndũ waĩ atonya kũthi vandũ e ũsũvĩonĩ, nũndũ vaĩ ithokoo mbingĩ andũnĩ ma nthĩ syonthe. 6Nthĩ ĩmwe nĩyathĩnasya nthĩ ĩla ĩngĩ, na ndũa ĩmwe nĩyathĩnasya ndũa ĩla ĩngĩ, nũndũ Ngai nĩwamaeteae thĩna wa kĩla mũthemba. 7Ĩndĩ inyw'ĩ ĩthĩwai na vinya, na mũikakw'e ngoo, nũndũ mũkakwata ĩtuvi ya wĩa ũla mũtethasya.”
8Yĩla Asa weewie ndeto ila Asalia mwana wa Oteti waneenie wathaninĩ wake, nĩwakwatie vinya. Nĩwavetangie ngai syonthe sya mĩvw'anano sya kũthatya, ila syaĩ nthĩ ya Yuta na Mbengyameni, kuma ndũanĩ ila wakwatĩte sya nthĩ yĩ iĩma ya Evalaimu. O ta ũu nĩwatũngĩĩie kĩthembeo kya Mwĩai Ngai kĩla kyaĩ mbee wa valanda wa Ĩkalũ.
9Andũ aingĩ kuma mbaĩnĩ sya Evalaimu, Manase, na Simioni maĩ manooka ngalĩkonĩ ya Asa, na mekalaa ũsumbĩnĩ wake, nũndũ nĩmoonete kana Mwĩai Ngai aĩ vamwe nake. Asa nĩwamombanisye vamwe me na andũ ma mbaĩ ya Yuta na ya Mbengyameni. 10Nĩmoombanĩie Yelũsalemu mweinĩ wa katatũ, wa mwaka wa ĩkũmi na itano wa kũsumbĩka kwa Asa. 11Mũthenyanĩ ũsu nĩmathembeie Mwĩai Ngai nthembo kuma mũtavonĩ ũla matavĩte; mathembie ng'ombe maana mũonza na malondu ngili mũonza. 12Nĩmaseũvisye ũtianĩo kana makeekaa kwĩanana na kwenda kwa Mwĩai Ngai, Ngai wa aaũmae moo, na ngoo syoo syonthe na thayũ woo w'onthe. 13Mũndũ o na wĩva ũla ũtakekaa kwĩanana na kwenda kwa Mwĩai Ngai akooawa, wa mũika kana mũndũ mũkũũ, mũndũ-ũme kana mũndũ mũka. 14Nĩmeevĩtie vala ve Mwĩai Ngai kana makeanĩasya ũtianĩo ũsu. Meekie ũu maneenete na wasya mũnene na malonzete, mavuvĩte masoo na makavuva mbya. 15Andũ onthe ma Yuta nĩmatanie nũndũ maseũvisye ũtianĩo ũsu na ngoo yoo yonthe. Nĩmamanthie Mwĩai Ngai na kwenda kwoo kw'onthe na mamwona, nake Mwĩai Ngai amanenga mũuo ngalĩko syonthe.
16O ta ũu, Mũsumbĩ Asa nĩwavetie Maaka ũsũe wake kuma ũnenenĩ wa kĩ-ũsumbĩ aeka kũtw'ĩka ta we inyia wa mũsumbĩ, nũndũ Maaka nĩwaseũvĩtye kĩtuĩ kya mũvw'anano wa kũthatya, wa ngai nga ĩla yĩtawa Asela. Asa nĩwatemangie mũvw'anano ũsu, aũtumbatumba na aũvĩvĩsya kalũsĩnĩ ka Kĩtilonĩ. 17O na vala Asa ndaa ananga kũndũ kw'onthe kũla andũ mathaithĩaa iĩmanĩ ĩũlũ, nĩwekalile atatalĩlwa ĩvĩtyo ĩvindanĩ yonthe yĩla waĩ thayũ. 18Nĩwaetie Ĩkalũnĩ mĩio yonthe ya thaavu na ya silĩva, ĩla ĩthe wake wavathĩte kwondũ wa Mwĩai Ngai, o vamwe na ĩla we mwene wavathĩte. 19Vayaaĩthĩwa kaũ ĩngĩ nginya mwaka wa mĩongo ĩtatũ na itano wa kũsumbĩka kwa Asa.
Currently Selected:
2Mav 15: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
