2Mav 14
14
Mũsumbĩ Asa wa Yuta
1Mũsumbĩ Aviya nĩwakwie na athikwa Ndũanĩ ya Ndeviti. Mwana wake ũla weetawa Asa nĩwatw'ĩkie mũsumbĩ ĩtina wake. Ĩvindanĩ ya Asa nthĩ ya Yuta nĩyeethĩiwe na mũuo vandũ va myaka ĩkũmi. 2Asa nĩweekaa maũndũ ala malũngalu na mendeeasya Mwĩai Ngai, Ngai wake. 3Nĩwavetie ithembeo ngeni na kũndũ kwa kũthaithĩa ngai sya mĩvw'anano, nĩwaomboangie ituĩ ila syatũmĩawa maũndũnĩ ma ũthaithi, na atemanga ituĩ sya ngai nga ya mũvw'anano ĩla yĩtawa Asela. 4Nĩweeaĩie andũ ma Yuta meke kwenda kwa Mwĩai Ngai, Ngai wa aaũmae moo, na mayĩatĩĩa momanyĩsyo na mĩao yake. 5O ta ũu nĩwavetangie kuma kĩla ndũanĩ ya Yuta kũndũ kw'onthe kwa kũthaithĩa ngai sya mĩvw'anano, na ithembeo sya kũvĩvĩsya ũvani; ũsumbĩ wa Yuta waĩ na mũuo ĩvindanĩ yĩla wasumbĩkĩtwe nĩwe. 6Nĩwaakie alũlũmĩĩlya ndũa sya Yuta, nũndũ nthĩ yaĩ na mũuo; vayaĩ kaũ myakanĩ ĩsu, nũndũ Mwĩai Ngai nĩwamũnengie mũuo. 7Asa nĩweeie andũ ma Yuta atĩĩ, “Ekai twake ndũa ii na tũisyakĩĩa ngũta kũithyũlũlũka, myako mĩtũlu ya kũsunga, na mĩvĩa yĩna syũma sya kũvinga. Nthĩ yĩ ungu wa ũtonyi witũ nũndũ nĩtwĩkĩte kwenda kwa Mwĩai Ngai, Ngai waitũ. Mwĩai Ngai nũtũsũvĩĩte na nũtũnengete mũuo kĩla ngalĩko.” Kwoou nĩmaakie na maendeea nesa. 8Asa aĩ na nguthu ya asikalĩ ma kaũ ngili maana atatũ ma mbaĩ ya Yuta, ala maĩ na ngao na matumo, na asikalĩ angĩ ma kaũ ngili maana elĩ na mĩongo nyanya ma mbaĩ ya Mbengyameni, ala maĩ na ngao na maĩ matonya kũtũmĩa ũta. Asikalĩ asu onthe maĩ ngũmbaũ.
Mũsumbĩ Asa Aisinda Aethiovia
9Mũethiovia weetawa Nzela nĩwavithũkĩie Yuta; ookie e na nguthu ya asikalĩ milioni ĩmwe, na makasya ma kaũ maana atatũ; nĩwookie nginya Malesa. 10Asa nĩwaendie kũkita nake. Nguthu isu syelĩ nĩsyaũngamie syĩyũmbanĩtye kũkita Mwandanĩ wa Nzevatha vakuvĩ na Malesa. 11Asa nĩwamwĩkaĩlile Mwĩai Ngai, Ngai wake ayasya atĩĩ, “Ame Mwĩai Ngai, vai ũmwe ũilyĩ taku, ũla ũtethasya ala mate na vinya maisindana na ala me na vinya. Ame Mwĩai Ngai, Ngai waitũ, tũtethye nũndũ nue twĩkwatĩtye; tũkĩte kũkita na nguthu ĩno nene mũno ya asikalĩ ma kaũ ĩsyĩtwanĩ yaku. Ame Mwĩai Ngai, nue Ngai waitũ; ndũkaeke mũndũ akũsinde.”
12Kwoou Mwĩai Ngai nĩwasindie asikalĩ ma kaũ ma Ethiovia, yĩla Asa na asikalĩ ma Yuta mokitie namo; Aethiovia nĩmasembie makĩĩte. 13Asa e na asikalĩ make ma kaũ nĩmasembanisye Aethiovia asu nginya Ngelali. Vooaiwe Aethiovia aingĩ nginya weethĩa nguthu ĩsu yoo ya kaũ ndyaĩ ĩtonya kũmbana ingĩ yũkite.#14.13 Vooaiwe Aethiovia aingĩ nginya weethĩa nguthu ĩsu yoo ya kaũ ndyaĩ ĩtonya kũmbana ingĩ yũkite: Kana Aethiovia asu masindiwe vyũ, vai ũmwe woo waatiwa e thayũ. Nĩmasindiwe vyũ nĩ Mwĩai Ngai na nguthu yake ya asikalĩ ma kaũ. Andũ ma Yuta nĩmatavie syĩndũ mbingĩ makua. 14Nĩvo ĩndĩ maanangie motũi onthe ala mathyũlũlũkĩte Ngelali, nũndũ Mwĩai Ngai nĩwatumie andũ ma motũi asu makwata nĩ w'ĩa. Nĩmoosie mũtavo kuma motũinĩ asu, nũndũ vo vaĩ mũtavo mwingĩ. 15O ta ũu nĩmavithũkĩie kũndũ kũla kwambĩtwe maeema nĩ aĩthi, na moosa malondu na ngamĩle mbingĩ, na ĩndĩ masyoka Yelũsalemu.
Currently Selected:
2Mav 14: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
