2Mav 11
11
Wathani wa Semaia
(1Asu 12.21-24)
1Yĩla Mũsumbĩ Leovoamu wavikie Yelũsalemu, nĩwoombanisye asikalĩ ala aseo vyũ ngili ĩana na mĩongo nyanya kuma mbaĩnĩ ya Yuta na ya Mbengyameni. Amombanisye nĩ kana mathi makokite na mbaĩ sya Ĩsilaeli ila syatwĩe ngalĩko ya ĩũlũ ya nthĩ ya Ĩsilaeli nĩ kana we aendee kũisumbĩka. 2Ĩndĩ Mwĩai Ngai nĩwaneenie na Mwathani Semaia amwĩa atĩĩ, 3“Neena na Leovoamu mwana wa Solomoni, mũsumbĩ wa Yuta na andũ onthe ma mbaĩ ya Yuta na ya Mbengyameni ũmee kana 4Mwĩai Ngai easya atĩĩ, ‘Mũikambate mũthi mũkokite na ana-a-ĩthe menyu. Kĩla mũndũ nĩenũke kwake, nĩkwĩthĩwa ũndũ ũla wĩkĩkĩte nĩ kwenda kwakwa.’ ” Kwoou nĩmaatĩĩie ũndũ meeaĩiwe nĩ Mwĩai Ngai na mayaathi kũkita na Yelovoamu.
Leovoamu Ailũlũmĩĩlya Ndũa
5Leovoamu nĩwekalile Yelũsalemu na aaka alũlũmĩĩlya ndũa ila syaĩ isionĩ sya mbaĩ ya Yuta na ya Mbengyameni. 6Nĩwaiĩĩie alũlũmĩĩlya ndũa ii: Mbetheleemu, Etamu, Tekoa, 7Mbethi-suli, Soko, Atulamu, 8Ngathi, Malesa, Nzivu, 9Atolaimu, Lakisi, Aseka, 10Nzola, Aiyaloni na Eviloni. 11Nĩwalũlũmĩĩilye ndũa isu mũno na aia anene ma asikalĩ ma kaũ nthĩnĩ wasyo. O ta ũu nĩwaiie lĩu, mauta na ndivai ndũanĩ isu. 12Nĩwaiie ngao na matumo ndũanĩ isu syonthe, na atuma syĩthĩwa syĩ na ũlũmu. Kwa kwĩka ũu nĩwatumie mbaĩ ya Yuta na ya Mbengyameni syĩkala isumbĩkĩtwe nĩwe.
Athembi na Alivai Mayũka Yuta
13Athembi na Alivai onthe ala matwĩe isionĩ ila ingĩ syonthe sya nthĩ ya Ĩsilaeli, nĩmaumie kw'o mathi Yuta. 14Alivai nĩmatiie isesi syoo sya kũĩthya na isio ingĩ syoo sya nthĩ, na mathi Yuta na Yelũsalemu, nũndũ Yelovoamu mũsumbĩ wa Ĩsilaeli na ana make, nĩmamavatĩte kũendeea kũtethya wĩa ta athembi ma Mwĩai Ngai. 15#1Asu 12.31 Yelovoamu nĩweenyuvĩie athembi make mwene, nĩ kana mathũkũmae kũndũnĩ kwa kũthaithĩa mĩvw'anano, na kwondũ wa kũthaitha maimũ, na ngai sya mĩvw'anano sya tũsalũ ila waseũvĩtye. 16Andũ onthe ma mbaĩ syonthe sya Ĩsilaeli ala mendeeaw'a nĩ kũthaitha Mwĩai Ngai, Ngai wa Ĩsilaeli, nĩmaatĩĩie athembi Yelũsalemu, nĩ kana makathembee Mwĩai Ngai, Ngai wa aaũmae moo. 17Ũndũ ũsu nĩwatumie ũsumbĩ wa Yuta wĩthĩwa na vinya, na kwa ĩvinda ya myaka ĩtatũ matuma ũsumbĩ wa Leovoamu mwana wa Solomoni wĩthĩwa wĩ mũlũmu, nũndũ maendeeie kwĩkala o tondũ mekalaa ĩvindanĩ yĩla masumbĩkĩtwe nĩ Ndeviti na Solomoni.
Andũ ma Mũsyĩ wa Leovoamu
18Leovoamu nĩwatwaie Maalathi mwĩĩtu wa Yelimothi, mwana wa Ndeviti. Inyia wa Maalathi eetawa Aviaili mwĩĩtu wa Eliavu; Eliavu aĩ mwana wa Yese. 19Maalathi nĩwasyaĩie Leovoamu ana atatũ: Yeusi, Semalia na Nzaamu. 20Ĩtina wa ũu, Leovoamu nĩwatwaie Maaka mwĩĩtu wa Avisalomu. Maaka nĩwasyaĩie Leovoamu ana aa: Aviya, Atai, Nzisa na Selomithi. 21Iveti sya Leovoamu syonthe syaĩ ĩkũmi na nyanya, na aĩ na iveti sya ndũsyo mĩongo thanthatũ. Aĩ na ana mĩongo ĩlĩ na nyanya, na eĩtu mĩongo thanthatũ. Katĩ wa iveti syake na iveti syake sya ndũsyo syonthe, Leovoamu nĩwendete Maaka mbeange. 22Leovoamu nĩwanyuvie Aviya mwana wa Maaka nĩ kana ethĩwe e mũnene katĩ wa ana-a-ĩthe. Leovoamu eekie ũu nũndũ nĩwendaa Aviya etw'ĩka mũsumbĩ ĩtina wake. 23Leovoamu nĩwatũmĩie ũĩ na atwaa ana make ndũanĩ ila mbiĩĩe isionĩ sya Yuta na Mbengyameni, na amanenga maũndũ ma kwĩka. Nĩwamanengie syĩndũ mbingĩ sya kũtũmĩa na amamanthĩa iveti mbingĩ.
Currently Selected:
2Mav 11: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
