2Mav 1
1
Mũsumbĩ Solomoni Aivoya Anengwe Ũĩ
(1Asu 3.1-15)
1Solomoni mwana wa Ndeviti nĩwasumbĩkie nthĩ ya Ĩsilaeli elũmĩtye mũno, Mwĩai Ngai, Ngai wake aĩ vamwe nake na nĩwatumie anengwa ndaĩa mũno.
2Solomoni nĩweetie andũ ma Ĩsilaeli onthe: Anene ma asikalĩ ngili na anene ma asikalĩ ĩana, asili, atongoi onthe ma mĩsyĩ na andũ ala angĩ onthe. 3Nĩvo ĩndĩ Solomoni waendie vandũnĩ va kũthaithĩa Mwĩai Ngai vala vaĩ Ngiveoni, e vamwe na wũmbano ũsu w'onthe. Maendie vo nũndũ Ĩeema ĩtheu ya kũkomanĩa na Mwĩai Ngai, yĩla Mwose mũthũkũmi wa Mwĩai Ngai, waseũvĩtye e weũnĩ nĩvo yaĩ. 4#2Sam 6.1-17; 1Mav 13.5-14; 15.25—16.1 (Ĩndĩ Ĩsandũkũ ya Ũtianĩo yaĩ Yelũsalemu, yiĩtwe Ĩeemanĩ yĩla Mũsumbĩ Ndeviti waĩ anayĩseũvĩsya ĩvinda yĩla wayĩetie kuma Kiliathi-yealimu.) 5#Kuma 38.1-7 Kĩthembeo kya mbulonzi kĩla kyaseũvĩtw'e nĩ Mbesaleli o nakyo kyaĩ ngalĩkonĩ ya mbee ya Ĩeema ĩtheu ya kũkomanĩa na Mwĩai Ngai kũu Ngiveoni. Mbesaleli aĩ mwana wa Uli na mwĩsũkũũe wa Uulu. Mũsumbĩ Solomoni vamwe na andũ onthe ma Ĩsilaeli nĩmathaithĩie Mwĩai Ngai vo. 6Solomoni nĩwathaithie Mwĩai Ngai e vau mbee wa Ĩeema kwa kũmũthembea nthembo ĩũlũ wa kĩthembeo kĩu kya mbulonzi; nĩwathembie ĩũlũ wakyo nthembo ngili ĩmwe sya kũvĩvw'a.
7Ũtukũ ũsu, Ngai nĩwaumĩlĩĩle Solomoni na amwĩa atĩĩ, “Mbĩtye kĩla ũkwenda ngũnenge.”
8Solomoni nĩwasũngĩie Ngai amwĩa atĩĩ, “Nĩwonetye Ndeviti ĩthe wakwa ũseo mũnene, na nũndw'ĩkĩthĩtye mũsumbĩ ĩtina wake. 9#Mwa 13.16; 28.14 Yu, ame Mwĩai Ngai, ĩanĩsya watho ũla wathie Ndeviti ĩthe wakwa, nũndũ we nũndw'ĩkĩthĩtye mũsumbĩ ĩũlũ wa andũ aa maingĩvĩte ta kĩtoo. 10Nenge ũĩ na ũmanyi, nĩ kana nĩtonye kũtongoesya andũ aa nesa. Ethĩwa ti ũu, nyie ngatonya ata kũsumbĩka andũ aa maku maingĩvĩte ũu?”
11Ngai nĩwasũngĩie Solomoni amwĩa atĩĩ, “Nũndũ ũsu nĩw'o wendi wa ngoo yaku na ndũnetya syĩndũ, ũthwii kana ndaĩa, o na ndũnavoya nĩ kana amaitha maku moawe, o na ndũnetya thayũ mũasa, ĩndĩ weetya ũĩ na ũmanyi nĩ kana ũtonye kũsumbĩka andũ makwa, ala ngũtw'ĩkĩthĩtye mũsumbĩ woo, 12kwondũ wa ũu nĩngũũnenga ũĩ na ũmanyi. O ta ũu nĩngũũnenga syĩndũ, ũthwii na ndaĩa, ila itaaĩthĩwa na mũsumbĩ ũngĩ o na wĩva katĩ wa ala maĩ mbee waku, na ila itakethĩwa na ũngĩ katĩ wa ala makoka ĩtina waku.”
Ũtonyi na Ũthwii wa Mũsumbĩ Solomoni
(1Asu 10.26-29)
13Solomoni nĩwaumie Ngiveoni, vala vandũ va kũthaithĩa, vala Ĩeema ĩtheu ya kũkomanĩa na Mwĩai Ngai yaĩ, na asyoka Yelũsalemu. Nĩwasumbĩkie Ĩsilaeli e vau Yelũsalemu. 14#1Asu 4.26 Solomoni nĩwoombanisye makasya ma kaũ ngili ĩmwe na maana ana, na asikalĩ ngili ĩkũmi na ilĩ ma kũlĩsa mbalasinĩ. Amwe nĩwamaiie ndũanĩ ila syaiawa makasya ma kaũ, na angĩ amaia Yelũsalemu vala wekalaa. 15Ĩvindanĩ ya kũsumbĩka kwake, Solomoni nĩwatumie silĩva na thaavu wĩthĩwa wĩ mwingĩ Yelũsalemu ta mavia, na o ta ũu atuma mĩtĩ ya mĩkũũ yĩthĩwa yĩ mingĩ ta mĩkũyũ ĩla yaĩ nguumo wa iĩma. 16#Kũt 17.16 Solomoni aumasya mbalasi syake nthĩ ya Misili na ya Silisia; atandĩthya make maithooaa kũu. 17Ĩkasya yĩmwe ya kaũ yathooawa kuma Misili kwa thooa wa kĩlo mũonza sya silĩva, nayo mbalasi ĩithoowa na kĩlo kĩmwe na ngulamu maana mũonza sya silĩva. Atandĩthya asu o ta ũu nĩmathooeasya asumbĩ onthe ma Aititi na ma Silia syĩndũ isu.
Currently Selected:
2Mav 1: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
