2Mav 2
2
Solomoni Akĩyũmbany'a Kwaka Ĩkalũ
(1Asu 5.1-18)
1Mũsumbĩ Solomoni nĩwavangie kwaka Ĩkalũ vala Mwĩai Ngai ũkathaithĩawa, na o ta ũu ayĩyakĩa nyũmba ya kĩ-ũsumbĩ. 2Solomoni nĩwoombanisye aũme ngili mĩongo mũonza ma kũkua mĩio, angĩ ngili mĩongo nyanya ma kwasa mavia iĩmanĩ, na aũme angĩ ngili itatũ na maana thanthatũ ma kũmaũngamĩa.
3Solomoni nĩwatũmanie kũla kwĩ Ilamu mũsumbĩ wa Tile ayasya atĩĩ, “Tũmana nĩetewe iting'ĩ sya mĩkũũ o ũndũ weekie Ndeviti ĩthe wakwa yĩla watũmanie aetewe iting'ĩ sya mĩkũũ sya kwaka nyũmba yake ya kĩ-ũsumbĩ. 4Yu ngilĩlye kwaka Ĩkalũ vala Mwĩai Ngai, Ngai wakwa, wĩthaithĩawa. Ĩkalũ yĩu nĩyo yĩĩthĩawa vandũ vatheu, vala nyie vamwe na andũ makwa twĩthaithĩaa Mwĩai Ngai, kwa kũvĩvya ũvani wa syĩndũ inyungaa nesa, vala twĩmũthembeaa nthembo sya mĩkate mĩtheu kĩla ĩvinda, na vala twĩthembeaa nthembo sya kũvĩvw'a kĩla kwakya na kĩla wĩoo, mĩthenyanĩ ya Savato, Mbokanĩ sya Kũtisa kwa Mwei, na mbokanĩ ila ingĩ itw'ĩtwe sya kũthaitha Mwĩai Ngai, Ngai waitũ. Mwĩai Ngai nĩweeaĩie andũ ma Ĩsilaeli mekae ũu ĩvindanĩ yonthe yĩla yũkĩte. 5Nĩvangĩte kwaka Ĩkalũ ĩnene, nũndũ Ngai waitũ nĩ mũnene mbee wa ngai syonthe. 6#1Asu 8.27; 2Mav 6.18 Ĩndĩ o vamwe na ũu, vai mũndũ ũtonya kwakĩa Mwĩai Ngai Ĩkalũ, nũndũ o na matunĩ vanenevete ũu, we ndatonya kwĩanĩa vo. Nyie ĩndĩ ninyie ũũ nĩ kana nĩmwakĩe nyũmba, ate o ngyaka nĩ kana vethĩwe vandũ va kũmũvĩvĩasya ũvani? 7Kwoou ndũmĩe mũndũ wĩ na ũmanyi wa kũseũvya mĩio ya thaavu, silĩva, mbulonzi, na ya kyũma. O ta ũu nĩethĩwe esĩ kũseũvya ngũa sya langi wa nzambalaũ, sya langi mũtune na sya langi wa mbuluu, na ethĩwe esĩ wĩa wa kwĩkĩa movano kwa kũtemeleela. Mũndũ ũsu akatethasya wĩa Yuta na Yelũsalemu e na andũ makwa, ala me na ũmanyi wa kũseũvya syĩndũ, ala Ndeviti ĩthe wakwa wanyuvie. 8Nĩnĩsĩ kana athũkũmĩ maku nĩmesĩ mũno kũtema mĩtĩ Levanoni, kwoou tũmana nĩetewe iting'ĩ sya mĩkũũ, mĩtalakwe, na sya mĩsandali. Athũkũmi makwa makatethasya wĩa me vamwe na athũkũmi maku, 9nĩ kana mambatũĩe mbwaũ mbingĩ, nũndũ Ĩkalũ yĩla nĩvangĩte kwaka nĩ ĩnene na yanake. 10Nganengane kĩlo milioni ilĩ sya nganũ, kĩlo milioni ilĩ sya nganũ ĩla yĩtawa mbaale, lita ngili maana ana sya ndivai, na lita ngili maana ana sya mauta, kwondũ wa athũkũmi maku ma kwatũa mbwaũ.”
11Mũsumbĩ Ilamu wa Tile nĩwaandĩkĩie Solomoni valũa amũsũngĩĩte akamwĩa atĩĩ, “Nũndũ Mwĩai Ngai nĩwendete andũ make, nũkũtw'ĩkĩthĩtye mũsumbĩ woo. 12Mwĩai Ngai, Ngai wa Ĩsilaeli, Mũsumbĩ wa ĩtu na nthĩ nĩataĩwe, nũndũ nũnengete Mũsumbĩ Ndeviti mwana mũĩ, wĩ na kĩlĩko na ũmanyi wa kwĩka maũndũ, ũla yu ũvangĩte kwakĩa Mwĩai Ngai Ĩkalũ, na ayĩyakĩa nyũmba ya kĩ-ũsumbĩ. 13Yu nĩngũtũma mũndũ mũĩ na wĩ na ũmanyi mwingĩ wa kũseũvya syĩndũ, mũndũ ũsu etawa Ulamu-avi. 14Nyinyia wake aĩ wa mbaĩ ya Ndani, na ĩthe wake aĩ mũndũ wa Tile. We e na ũmanyi wa kũseũvya syĩndũ sya thaavu, silĩva, mbulonzi, syũma, mavia, na sya mĩtĩ. Nĩwĩsĩ kũseũvya itambaa sya langi wa nzambalaũ, wa mbuluu, na sya langi mũtune, na sya ndii nzeo ndũmu. Mũndũ ũsu e na ũmanyi wa mĩthemba yonthe ya kwĩkĩa movano kwa kũtemeleela, na nũtonya kũtemeleela ũvano o na wĩva ũla ũkũlĩtw'e atemeleele. Mũndũ ũsu akatethasya wĩa e na andũ maku ala maseũvasya syĩndũ, na ala matetheasya Ndeviti ĩthe waku wĩa. 15Kwoou yu nengane nganũ, nganũ ĩla yĩtawa mbaale, ndivai, na mauta ila waisye ũkanengane tũetewe. 16Nĩtũũtema iting'ĩ syonthe Levanoni ila wĩ na vata nasyo; nĩtũũsyovany'a vamwe na tũyĩete ithambalele ũkanganĩ nginya Yova. Kuma vau ũkaitwaa Yelũsalemu.”
17Mũsumbĩ Solomoni nĩwatalile aeni onthe ala mekalaa Ĩsilaeli, o ũndũ Ndeviti ĩthe wake waĩ aneeka vau mbeenĩ. Veethĩiwe aeni ngili ĩana yĩmwe na mĩongo ĩtano na atatũ na maana thanthatũ. 18Katĩ wa asu, nĩwanengie aeni ngili mĩongo mũonza wĩa wa kũkua syĩndũ, aeni ngili mĩongo nyanya wĩa wa kwasa mavia iĩmanĩ, na aeni ngili itatũ na maana thanthatũ wĩa wa kũũngamĩa andũ matethye wĩa.
Currently Selected:
2Mav 2: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
