1Mav 9

Andũ ala Masyokie kuma kũla Matwaĩtwe Ũeninĩ

1Andũ ma Ĩsilaeli onthe nĩmatalilwe kwĩanana na mosyaanĩo moo, na nĩmaandĩkĩtwe Ĩvukunĩ ya Maũndũ ma Mavinda ma Asumbĩ ma Ĩsilaeli.

Andũ ma Yuta nĩmatwaiwe nthĩ ya Mbavilonĩ me ove nũndũ wa kwĩthĩwa mate aĩkĩĩku. 2#Esa 2.27; Nee 7.73 Andũ ma mbee kũsyoka makatũe ĩngĩ nthĩ yoo na ndũanĩ syoo, maĩ andũ amwe ma Ĩsilaeli, athembi, Alivai, na andũ ala mathũkũmaa Ĩkalũnĩ. 3Andũ ma mbaĩ ya Yuta, Mbengyameni, Evalaimu na ya Manase ala maendie kũtũa Yelũsalemu maĩ: 4Uthai ũla waĩ mwana wa Amiuti, Amiuti mwana wa Omili, Omili mwana wa Imili, Imili mwana wa Mbani, ũla waĩ nzyawa ya Velesi mwana wa Yuta. 5Kuma nzyawanĩ sya Silo vaĩ Asaia mwana ũla mũkũũ na ana make. 6Kuma Nzyawanĩ sya Nzela vaĩ Yeueli na andũ ma mũsyĩ woo. Ũtalo wa andũ ala maĩ ma mbaĩ ya Yuta waĩ andũ maana thanthatũ na mĩongo kenda.

7Kuma mbaĩnĩ ya Mbengyameni vaĩ Salu mwana wa Mesulamu. Mesulamu aĩ mwana wa Ondavia, nake Ondavia aĩ mwana wa Asenua. 8O ta ũu vaĩ Ĩvineya mwana wa Yeloamu, Ela mwana wa Ũsisi, mwĩsũkũũe wa Mikili, Mesulamu mwana wa Sevatia, Sevatia mwana wa Leueli, nake Leueli mwana wa Iviniya. 9Asu maĩ vamwe na andũ moo kwĩanana na mosyaanĩo moo, na ũtalo woo waĩ andũ maana kenda na mĩongo ĩtano na thanthatũ. Asu onthe maĩ atongoi ma andũ ma mĩsyĩ yoo kwĩanana na nyũmba sya aaũmae moo.

Athembi ala Matwĩe Yelũsalemu

10Athembi aa nĩmo matwĩe Yelũsalemu: Yetaia, Yeoialivu, Yakini, 11na Asalia mwana wa Ilikia. Ilikia aĩ mwana wa Mesulamu, Mesulamu aĩ mwana wa Nzatoki, Nzatoki aĩ mwana wa Melaiothi, Melaiothi aĩ mwana wa Aituvu, ũla waĩ mũnene wa athũkũmi ma Ĩkalũnĩ. 12O ta ũu vaĩ Ataia mwana wa Yeloamu, mwana wa Vasuli, mwana wa Malikiya; na Maasai mwana wa Atieli, mwana wa Yasela, mwana wa Mesulamu mwana wa Mesilemithi, mwana wa Imeli. 13Ũtalo wa athembi ala maĩ atongoi ma andũ ma mĩsyĩ yoo waĩ ngili ĩmwe, maana mũonza na mĩongo thanthatũ. Maĩ andũ matonya kũtethya wĩa Ĩkalũnĩ.

Alivai ala Matwĩe Yelũsalemu

14Alivai aa nĩmo matwĩe Yelũsalemu: Semaia mwana wa Asuvu, mwana wa Asilikamu, mwana wa Asavia nzyawa ya Melali; 15Mbakivakali, Elesi, Ngalali, na Matania mwana wa Mika, mwana wa Nzikili mwana wa Asavu. 16O ta ũu vaĩ Ovatia mwana wa Semaia, mwana wa Ngalali, mwana wa Yetuthuni, na Mbelekia mwana wa Asa, mwĩsũkũũe wa Elikana. Asu matwĩe motũinĩ ma Anetovathi.

Asikalĩ ala Masungaa Ĩkalũnĩ

17Asikalĩ ala masungaa mĩomo ya Ĩkalũ maĩ Salumu, Akuvu, Talimoni na Aimani, na andũ ma mũsyĩ woo. Salumu nĩwe waĩ mũtongoi woo. 18Kũvika ĩvindanĩ yĩu, asikalĩ ala maumĩte mĩsyĩnĩ ĩsu nĩmo masungaa Mũvĩa wa Mũsumbĩ, ũla wĩ ngalĩko ya wumĩlonĩ wa syũa. Vau mbeenĩ, andũ asu nĩmo masungaa mĩvĩa ĩla yaendete vala Alivai mambĩte maeema.

19Salumu mwana wa Kole, mwana wa Eviasavu, mwana wa Kola, vamwe na andũ ma mũsyĩ woo, nĩmo maũngamĩe ũthũkũmi wa Ĩeema ĩtheu ya kũkomanĩa na Mwĩai Ngai, na nĩmo masungaa mũvĩa wayo, o tondũ aaũmae moo maũngamĩĩte Ĩeema ya Mwĩai Ngai, na masungaa mũvĩa wayo. 20Vau mbeenĩ Vineasi mwana wa Eleasali nĩwe wamaũngamĩĩte; Mwĩai Ngai aĩ vamwe nake.

21Nzekalia mwana wa Meselemia nĩwe wasungaa mũvĩa wa Ĩeema ĩtheu ya kũkomanĩa na Mwĩai Ngai. 22Andũ asu onthe manyuvĩtwe methĩwe asikalĩ ma kũsunga mĩomo na mĩvĩa, maĩ andũ maana elĩ na ĩkũmi na elĩ. Manyuvĩtwe kwĩanana na mosyaanĩo moo kuma motũinĩ moo. Ndeviti na mwathani Samũeli nĩmo mamalikilye wĩanĩ ũsu. 23Andũ asu vamwe na nzyawa syoo nĩmo maendeeie kũsunga mĩvĩa ya Ĩkalũ. 24Asikalĩ ma kũsunga mĩvĩa mekalaa ngalĩkonĩ inya: Wumĩlonĩ wa syũa, ũthũĩlonĩ wa syũa, ĩũlũ na ĩtheo. 25Andũ ma mĩsyĩ yoo ala mekalaa motũinĩ meethĩawa maĩlĩte kũka vala maĩ kũmatetheesya vandũ va mĩthenya mũonza. Nĩmaumanĩasya kwĩka ũu. 26Atongoi ana ma asikalĩ ala masungaa mĩvĩa maĩ Alivai, na nĩmo maũngamĩe nyũmba ila syaĩ Ĩkalũnĩ, na o ta ũu makaũngamĩa mĩio ĩla yaiawa vo. 27Ũtukũ w'onthe meethĩawa vakuvĩ na Ĩkalũ, nũndũ maaĩlĩte kwĩthĩwa maiyĩsunga, na nĩmo manengetwe wĩa wa kwĩkala na ũvungũo wa kũvingũa Ĩkalũ yĩu kĩla kwakya.

Alivai ala Angĩ

28Alivai amwe matethasya wĩa wa kũũngamĩa syĩndũ ila syatũmĩawa ĩvindanĩ ya ũthaithi. Nĩmatalaa syĩndũ isu yĩla ikumaalw'a na yĩla iũtũngwa. 29Alivai angĩ nĩmaũngamĩaa syĩndũ sya Ĩkalũ, na syĩndũ ila ingĩ syonthe ntheu, o vamwe na mũtu mũvinyu, ndivai, mauta, ũvani, na mĩtĩ yĩ mũuke mũseo. 30Ana amwe ma athembi nĩmo mavulanasya mĩtĩ yĩ mũuke mũseo.

31Ũmwe wa Alivai ũla weetawa Matithia, mwana ũla mũkũũ wa Salumu, wa mũsyĩ wa Kola nĩwe waũngamĩĩte kũua mĩkate ya kũthembwa. 32O ta ũu amwe ma nzyawa sya Kola nĩmo mauaa mĩkate ĩla yailĩĩlawa mesanĩ kĩla mũthenya wa Savato.

33Amwe ma andũ ma mĩsyĩ ya Alivai nĩmo mainaa Ĩkalũnĩ. Atongoi ma mĩsyĩ yoo mekalaa nyũmbanĩ imwe ila syaĩ Ĩkalũnĩ, na mayatethasya mawĩa angĩ, nũndũ meethĩawa wĩanĩ woo ũtukũ na mũthenya.

34Andũ asu nĩmo maĩ atongoi ma mbaĩ ya Alivai kwĩanana na mosyaanĩo moo. Atongoi asu nĩmo matwĩe Yelũsalemu.

Andũ ma Mũsyĩ wa Mũsumbĩ Saũlo

(1Mav 8.29-38)

35Yeieli nĩwe waĩ mwambĩlĩĩlya wa ndũa ya Ngiveoni. Mũka wake eetawa Maaka. 36Mwana wake ũla mũkũũ eetawa Avitoni. Ana ala angĩ make maĩ: Nzuli, Kisi, Mbaali, Neli, Natavu, 37Ngetoli, Aio, Nzekalia na Mikilothi. 38Mikilothi aĩ ĩthe wa Simeamu. O namo asu matwĩe Yelũsalemu vakuvĩ na andũ ala angĩ ma mũsyĩ woo.

39Neli aĩ ĩthe wa Kisi, nake Kisi aĩ ĩthe wa Saũlo. Saũlo aĩ ĩthe wa Yonathani, Malikisuua, Avinatavu na Esi-mbaali. 40Yonathani aĩ ĩthe wa Meli-mbaali nake Meli-mbaali aĩ ĩthe wa Mika. 41Ana ma Mika maĩ Vithoni, Meleki, Talea, na Aasu. 42Aasu aĩ ĩthe wa Yala. Yala aĩ ĩthe wa Alemethi, Asimavethi, na Nzimili. Nzimili aĩ ĩthe wa Mosa, 43nake Mosa aĩ ĩthe wa Mbinea. Mbinea aĩ ĩthe wa Levaia, Levaia ĩthe wa Eleasa nake Eleasa ĩthe wa Aseli.

44Ana ma Aseli maĩ thanthatũ: Asilikamu, Mbokelu, Ĩsumaeli, Sealia, Ovatia na Aanamu.

Currently Selected:

1Mav 9: KAMBA

Highlight

Copy

Compare