1Mav 10

Kĩkw'ũ kya Mũsumbĩ Saũlo

(1Sam 31.1-13)

1Avilisiti nĩmokitĩie na andũ ma Ĩsilaeli Kĩĩmanĩ kya Ngilivoa. Andũ aingĩ ma Ĩsilaeli nĩmooaĩiwe vau, na ala matialile vamwe na Mũsumbĩ Saũlo na ana make nĩmakĩie mathi. 2Ĩndĩ Avilisiti nĩmaatĩĩie Saũlo na ana make, mamakwata, na mooaa ana make Yonathani, Avinatavu na Malikisuua. 3Kaũ nĩwavyũvie mũno vakuvĩ na vala Saũlo waĩ. Yĩla amaitha make mamwonie nĩmamũathie na maangi mamũũmĩsya mũno. 4Nĩvo ĩndĩ Saũlo weeie mwanake ũla wamũkuĩaa mĩio yake ya kaũ atĩĩ, “Kũa ũvyũ waku na ũimbũaa nĩ kana Avilisiti aa matamwĩsĩ Ngai maikoke na kũnthĩny'a.” Ĩndĩ mwanake ũsu nĩwatelemile mũno na alea kũaa Saũlo. Kwoou Saũlo nĩwoosie ũvyũ wake mwene na eevalũkya ĩũlũ waw'o eetonyethya. 5Yĩla mwanake ũsu wakuĩaa Saũlo mĩio ya kaũ woonie kana Saũlo nĩwakw'a, o nake nĩweevalũkilye ĩũlũ wa ũvyũ wake na akw'a vamwe na Saũlo. 6Kwoou Saũlo na ana make atatũ na andũ onthe ma mũsyĩ wake nĩmakwie mũthenyanĩ ũmwe. 7Yĩla andũ ma Ĩsilaeli ala matwĩe mwandanĩ wa Yesileeli meewie kana asikalĩ ma kaũ nĩmasembie makĩa, na kana Saũlo na ana make nĩmoaiwe, nĩmatiie ndũa syoo na masemba makĩa. Nĩvo ĩndĩ Avilisiti mookie na matũa ndũanĩ isu.

8Mũthenyanĩ ũla waatĩĩe, yĩla Avilisiti mookie kwosa syĩndũ sya andũ ala maĩ akw'ũ, nĩmeethĩie mwĩĩ wa Saũlo na mĩĩ ya ana make ĩvalũkĩte Kĩĩmanĩ kya Ngilivoa. 9Nĩmatilile mũtwe wa Saũlo, na moosa mĩio yake ya kaũ. Nĩmatũmie andũ mathi kĩla vandũ nthĩ ya Avilisiti, makatavany'e ũvoo ũsu makalũnĩ ma ngai syoo sya mĩvw'anano na andũnĩ moo onthe. 10Nĩmaiie mĩio ya Saũlo ĩkalũnĩ yĩmwe yoo na manĩka mũtwe wake ĩkalũnĩ ya ngai yoo ĩla yĩtawa Ndakoni. 11Yĩla andũ ma ndũa ya Yavesi ĩla yĩ Ngileati mamanyie ũndũ Avilisiti maneekanie na Saũlo, 12asikalĩ moo ala ngũmbaũ nĩmaendie na moosa mwĩĩ wa Saũlo, na mĩĩ ya ana make na maete mĩĩ ĩsu Yavesi. Nĩmathikie mavĩndĩ moo ungu wa mũtĩ wa mwalonĩ ũla waĩ Yavesi. Ĩtina wa ũu nĩmatĩĩie kũya vandũ va mĩthenya mũonza.

13 # Ali 19.31; 20.6; 1Sam 13.8-14; 15.1-24; 20.6; 28.7-8 Saũlo nĩwakwie nũndũ wa kwĩthĩwa ate mũĩkĩĩku; ndaĩ mũĩkĩĩku kwa Mwĩai Ngai nũndũ nĩwaleile kũatĩĩa ũndũ Mwĩai Ngai weeaĩte. 14Nĩwaendie kũkũlya ũtao kuma kwa andũ ala mamanyaa maũndũ kwĩsĩla mavevanĩ ma ala akw'ũ. Nĩwaleile kũkũlya ũtao kuma kwa Mwĩai Ngai. Kwoou Mwĩai Ngai nĩwamũaie na anenga Ndeviti mwana wa Yese ũsumbĩ wa Saũlo.

Currently Selected:

1Mav 10: KAMBA

Highlight

Copy

Compare