1Mav 17
17
Ũtũmani wa Mwathani Nathani kũla kwĩ Mũsumbĩ Ndeviti
(2Sam 7.1-17)
1Ĩvindanĩ yĩla Mũsumbĩ Ndeviti wekalaa nyũmbanĩ yake ya kĩ-ũsumbĩ, nĩwaneenie na mwathani Nathani amwĩa atĩĩ, “Nyie nĩkalaa nyũmbanĩ ĩno yakĩtwe na mĩtĩ ya mĩkũũ, ĩndĩ Ĩsandũkũ ya Ũtianĩo ya Mwĩai Ngai yiĩtwe Ĩeemanĩ!”
2Nathani amũsũngĩa amwĩa atĩĩ, “Ĩka ũndũ ũũsũanĩa, nũndũ Mwĩai Ngai e vamwe naku.”
3Ĩndĩ ũtukũ ũsu Mwĩai Ngai nĩwaneenie na Nathani amwĩa atĩĩ, 4“Enda ũkee mũthũkũmi wakwa Ndeviti nĩasya atĩĩ, ‘We ti ue ũũmbakĩa Ĩkalũ nĩkalae vo. 5Kuma mũthenya ũla naumisye andũ ma Ĩsilaeli nthĩ ya Misili kũvika ũmũnthĩ, ndyaaĩkala ĩkalũnĩ; nĩkalaa maeemanĩ kĩla ĩvinda, na nĩendaa kuma vandũ vamwe kũthi vangĩ. 6Kũndũ kw'onthe kũla naendaa nĩ vamwe na andũ ma Ĩsilaeli, ndyaaneena na ũmwe wa atongoi moo ũla nĩaĩe atongoesye andũ makwa ma Ĩsilaeli, ngamũkũlya aleete kũmbakĩa Ĩkalũ aitũmĩa mĩtĩ ya mĩkũũ nĩkĩ.’
7“Kwoou tavya mũthũkũmi wakwa Ndeviti ũmwĩe nyie Mwĩai Ngai Mwene Ũtonyi W'onthe nĩmwĩa atĩĩ, ‘Nakumisye wĩanĩ wa kũĩthya malondu isesinĩ, na nakũtw'ĩkĩthya mũsumbĩ wa andũ makwa Ĩsilaeli. 8Nĩnĩthĩĩtwe vamwe naku kũndũ kw'onthe kũla ũendaa, na nĩnĩsindĩte amaitha maku onthe makauma mbee waku. Yu nĩngũtuma wĩthĩwa na nguma ta andũ ala angĩ me nguma ĩũlũ wa nthĩ. 9Nĩngũnyuvĩa andũ makwa ma Ĩsilaeli vandũ matũe vo, navo vayĩthĩwa ve voo, na mayĩthĩwa matekũthĩnw'a ĩngĩ. Andũ athũku maikamathĩny'a ĩngĩ ũndũ meekaa mbeenĩ, 10na ũndũ meekaa kuma ĩvindanĩ yĩla nanyuvie asili matongoesye andũ makwa ma Ĩsilaeli. O ta ũu nĩngũsinda amaitha maku onthe. Nyie Mwĩai Ngai nĩngũkwatha kana nĩngũtuma mũsyĩ waku wĩthĩwa wĩ mũlũmu. 11Yĩla wĩkw'a na ũithikwa vala aaũmae maku mathikĩtwe, ngatw'ĩkĩthya ũmwe wa ana maku mũsumbĩ, na ngĩtuma ũsumbĩ wake wĩthĩwa wĩ mũlũmu. 12Ũsu nĩwe wĩmbakĩa Ĩkalũ, nakwa ngatuma ũsumbĩ wake wĩkala kũvika tene na tene. 13#2Ako 6.18; Aevl 1.5 Ngeethĩwa ĩthe wake, nake akeethĩwa mwana wakwa. Ndikaeka kũmwenda na wendo wakwa ũtaolekaa, ũndũ naekie kwenda Saũlo ũla waĩ mũsumbĩ mbee waku. 14Ngamũtw'ĩkĩthya mũtongoi wa andũ makwa, na ũsumbĩ wakwa kũvika tene na tene. Ũsumbĩ wake ũkekala tene na tene.’ ”
15Nathani nĩwatavisye Ndeviti maũndũ onthe ala Ngai wamũvuanĩisye.
Mboya ya Ndeviti ya Kũtũnga Mũvea
(2Sam 7.18-29)
16Nĩvo ĩndĩ Mũsumbĩ Ndeviti waendie Ĩeemanĩ ĩtheu ya kũkomanĩa na Mwĩai Ngai, ekala nthĩ na avoya ayasya atĩĩ, “Ame Mwĩai Ngai Mũsumbĩ, nyie ndyaĩlĩtwe nĩ maũndũ ala ũmbĩkĩte, o na andũ ma mũsyĩ wakwa mayaĩlĩtwe. 17Ũu wĩ o vo we Ngai nũvangĩte kwĩka maũndũ angĩ maingĩ; nĩwathĩte kwĩka nzyawa syakwa maũndũ maingĩ ĩvindanĩ yĩla yũkĩte. Naku we Mwĩai Ngai Mũsumbĩ nũndekete none maũndũ asu. 18Nyie mũthũkũmi waku ndonya ũkũtavya ũndũ ũngĩ mwaũ nũndũ wa kũmbĩka maũndũ me ndaĩa? We nũmbĩsĩ nesa. 19Ame Mwĩai Ngai, kwondũ wakwa nyie mũthũkũmi waku, na kwĩanana na kwenda kwaku, nĩwĩkĩte maũndũ aa manenevete ũu na ũkandavya maũndũ manene ala ũmbathĩte kwĩka. 20We Mwĩai Ngai, vai ũngĩ ũilyĩ taku, na vai Ngai ũngĩ ate o we, kwĩanana na ũndũ ithyĩ ene twĩw'ĩte. 21Vai andũ ma mbaĩ ĩngĩ ĩũlũ wa nthĩ mailyĩ ta andũ ma Ĩsilaeli, ala we Ngai waumisye ũkombonĩ ũmatw'ĩkĩthye andũ maku mwene. Maũndũ manene na makũseng'ya ala weekie nĩmatumie wĩthĩwa na nguma kĩla vandũ ĩũlũ wa nthĩ. Nĩwoovoisye andũ maku kuma Misili na walũngya mbaĩ ingĩ syauma mbee woo. 22Nũtw'ĩkĩthĩtye andũ ma Ĩsilaeli methĩwe maku tene na tene, naku we Mwĩai Ngai nũtw'ĩkĩte Ngai woo.
23“Yu Mwĩai Ngai; lũlũmĩĩlya watho waku ĩũlũ wakwa nyie mũthũkũmi waku, na andũ ma mũsyĩ wakwa kũvika tene na tene. Ĩka kwĩanana na ũndũ ũneenete, 24nĩ kana watho ũsu wĩthĩwe wĩ mũlũmu, naku ũyĩthĩwa na nguma nene kũvika tene na tene. Nĩvo ĩndĩ andũ meneenaa na kwasya atĩĩ, ‘Mwĩai Ngai Mwene Ũtonyi W'onthe, Ngai ũla ũsumbĩkĩte Ĩsilaeli, nĩwe Ngai wa Ĩsilaeli.’ Ũkatuma mũsyĩ wakwa nyie mũthũkũmi waku wĩthĩwa wĩ mũlũmu. 25Ngai wakwa nĩ na ũkũmbaũ wa kũvoya mboya ĩno kũla ũĩ, nũndũ nũmbuanĩsye maũndũ aa onthe nyie mũthũkũmi waku, na nũndavĩtye kana ũkatuma mũsyĩ wakwa wĩthĩwa wĩ mũlũmu. 26Ame Mwĩai Ngai, nue Ngai, na nũmbathĩte nyie mũthũkũmi waku maũndũ aa maseo. 27Nĩũkũlya ũathime nzyawa syakwa, nĩ kana iendeeae kũtanĩa ũseo waku. We Mwĩai Ngai nũmaathimĩte, na makeethĩawa me aathime ĩvindanĩ yonthe yĩla yũkĩte.”
Currently Selected:
1Mav 17: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
