1Mav 16

1Nĩmatwaie Ĩsandũkũ ya Ũtianĩo ya Ngai mayia Ĩeemanĩ yĩla Ndeviti waseũvĩtye kwondũ wa kũyia. Nĩvo ĩndĩ maumĩisye Mwĩai Ngai nthembo sya kũvĩvw'a na nthembo sya ngwatanĩo. 2Ndeviti amina kumya nthembo sya kũvĩvw'a na sya ngwatanĩo, nĩwaathimie andũ ĩsyĩtwanĩ ya Mwĩai Ngai. 3Nĩwanengie kĩla ũmwe wa andũ ma Ĩsilaeli, aũme na aka, mũkate, kĩlungu kya nyama mbĩvye, na kamũkate kaseũvĩtw'e na nzavivũ mbovu.

4Ndeviti nĩwanyuvie Alivai amwe matongoeasye ũthaithi mbee wa Ĩsandũkũ ya Ũtianĩo ya Mwĩai Ngai, kwa nzĩa ya kũvoya, kũtũnga mũvea, na kũtaĩa Mwĩai Ngai, Ngai wa Ĩsilaeli. 5Asavu nĩwanyuviwe ethĩwe mũtongoi, na Nzekalia anyuvwa ethĩwe mũnini wake. Yeieli, Semilamothi, Yeieli, Matithia, Eliavu, Mbenaia, Oveti-etomu na Yeieli nĩmo maĩ akũni ma ngitaa nene na ngitaa nini, nake Asavu nĩwe wakũnaa tũmasaya. 6Mũthembi Mbenaia, na mũthembi Yaanzieli nĩmo maaĩlĩte kũvuvaa masoo kĩla ĩvinda me mbee wa Ĩsandũkũ ya Ũtianĩo.

Wathi wa Ndeviti wa Kũtũnga Mũvea

(Sav 105.1-15; 96.1-13; 106.1,47-48)

7Mũthenya ũsu nĩw'o waĩ wa mbee wa Ndeviti kũnenga Asavu na ana-a-ĩthe make Alivai wĩa wa kwinĩa Mwĩai Ngai wathi ũũ wa kũmũtũngĩa mũvea:

8Tũngĩai Mwĩai Ngai mũvea, ĩkaĩlei ĩsyĩtwa yake;

tavyai mbaĩ sya andũ ũndũ Mwĩai Ngai wĩkĩte.

9Inĩai Mwĩai Ngai, mwinĩei mbathi sya kũmũtaĩa,

tavany'ai maũndũ ma kũseng'ya ala wĩkĩte.

10Ĩkathĩĩei ĩsyĩtwanĩ yake ĩtheu,

andũ onthe ala mamũmanthaa Mwĩai Ngai matane.

11Manthai Mwĩai Ngai na kũmantha ũtethyo wake,

mũmanthaei kĩla ĩvinda.

12Lilikanai maũndũ ma kũseng'ya ala wĩkĩte,

syama syake na ũsilĩlo ũla wawetie.

13Inyw'ĩ nzyawa sya Ĩsilaeli, mũthũkũmi wa Mwĩai Ngai,

inyw'ĩ ana ma Yakovo, anyuve ma Mwĩai Ngai.

14Nĩwe Mwĩai Ngai, Ngai waitũ;

ũsilĩlo wake wĩ kĩla vandũ ĩũlũ wa nthĩ.

15Lilikanai ũtianĩo wake tene na tene,

ndeto ila weeaie kwondũ wa nzyawa ngili,

16 # Mwa 12.7; 26.3 ũtianĩo ũla waseũvisye na Avalaamu,

na wĩvĩto ũla weevĩtie kũla kwĩ Isaka.

17 # Mwa 28.13 Nĩwaĩkĩĩthisye Yakovo wĩvĩto ũsu ta mwĩao,

wĩthĩwe ũtianĩo wa tene na tene kũla kwĩ Ĩsilaeli.

18Ayasya, “Nĩngũmũnenga nthĩ ya Kanaani,

yĩthĩwe kĩsio kyenyu kya ng'ũndũ.”

19Yĩla ũtalo woo waĩ mũnini,

waĩ mũnini vyũ na maĩ aeni nthĩ ĩsu.

20Nĩmangangaa kuma nthĩ ĩmwe kũthi ĩla ĩngĩ,

kuma ũsumbĩnĩ ũmwe kũthi ũngĩ.

21 # Mwa 20.3-7 Ngai ndaaĩtĩkĩla mũndũ o na wĩva amathĩny'e;

nĩwamasũvĩie kwa kũkany'a asumbĩ

22ayasya, “Mũikameke naĩ athũkũmi makwa ala nĩnyuvĩte,

mũikaũmĩsye athani makwa.”

23Andũ onthe ĩũlũ wa nthĩ inĩai Mwĩai Ngai;

tavany'ai ĩũlũ wa ũtangĩĩo wake kĩla mũthenya.

24Tavany'ai ũkumyo wake kwa andũ ma mbaĩ syonthe,

na kwa andũ onthe maũndũ ma kũseng'ya ala wĩkĩte.

25Mwĩai Ngai nĩ mũnene na nĩwaĩlĩte kũtaĩwa;

nĩwaĩlĩte kũnengwa ndaĩa kwĩ ngai ila ingĩ syonthe.

26Nĩkwĩthĩwa ngai syonthe sya mbaĩ ila ingĩ no mĩvw'anano;

ĩndĩ Mwĩai Ngai nĩwe woombie ĩtu.

27Ndaĩa na ũnene nimũthyũlũlũkĩte,

vinya na ũtanu syĩ wĩkalonĩ wake.

28Andũ onthe ĩũlũ wa nthĩ mũtaĩei Mwĩai Ngai,

taĩai ũnene na ũkumyo wake.

29Mũnengei ũkumyo ũla waĩlĩte ĩsyĩtwa yake;

ũkai mbee wake mũkuĩte nthembo.

Thaithĩai Mwĩai Ngai ũtheunĩ wake mũtisu;

30andũ onthe ĩũlũ wa nthĩ, kĩai mwĩ mbee wake!

Nthĩ nĩ ndũmu vyũ, ndĩthingithĩka.

31Ĩtu nĩyĩtane na nthĩ nĩyĩw'e mũyo.

Tavyai andũ ĩũlũ wa nthĩ atĩĩ,

“Mwĩai Ngai nĩ mũsumbĩ!”

32Ũkanga nũuume na syũmbe syonthe ila syĩ nthĩnĩ waw'o;

mĩũnda nĩtane na syĩndũ syonthe ila syĩ nthĩnĩ wayo!

33Nĩvo ĩndĩ mĩtĩ ĩla yĩ kĩthekanĩ yĩina,

ĩkaina na ũtanu yĩ mbee wa Mwĩai Ngai,

nĩkwĩthĩwa nĩwũkĩte asilĩle nthĩ.

34 # 2Mav 5.13; 7.3; Esa 3.11; Sav 100.5; 106.1; 107.1; 118.1; 136.1; Yel 33.11 Tũngĩai Mwĩai Ngai mũvea nũndũ nĩ mũseo,

na wendo wake ũtaolekaa nĩwĩkalaa tene na tene.

35Neenai mwasye atĩĩ, “Ame Mwĩai Ngai mũtangĩĩi waitũ twovosye;

tũmbany'e vamwe na ũitũtangĩĩa ũtumye mbaĩnĩ sya nthĩ ingĩ,

nĩ kana tũkũtũngĩe mũvea,

na kũtaĩa ĩsyĩtwa yaku ĩtheu.”

36Nĩataĩwe Mwĩai Ngai, Ngai wa Ĩsilaeli,

kuma yu kũvika tene na tene.

Nĩvo ĩndĩ andũ onthe maisye, “Ameni,” na mamũtaĩa Mwĩai Ngai.

Ũthaithi Yelũsalemu na Ngiveoni

37Ndeviti nĩwatiie Asavu e na ana-a-ĩthe Alivai vala Ĩsandũkũ ya Ũtianĩo ya Mwĩai Ngai yaiĩtwe, mathũkũmae vo kĩla ĩvinda, kwĩanana na mawĩa ala meethĩawa vo kĩla mũthenya. 38O ta ũu nĩwatiie Oveti-etomu vo e na ana-a-ĩthe make mĩongo thanthatũ na nyanya mathũkũmae ĩmwe namo. Oveti-etomu mwana wa Yetuthuni na Osa nĩmo masungaa mĩvĩa.

39Mũsumbĩ Ndeviti nĩwanengie mũthembi Nzatoki na athembi ala angĩ wĩa wa kũtongoesya ũthaithi wa Mwĩai Ngai vandũnĩ va kũthaithĩa Ngiveoni. 40Kĩla mũthenya kwakya na wĩoo, nĩmathembeaa nthembo nima sya kũvĩvw'a kĩthembeonĩ, kwĩanana na ũndũ kũandĩkĩtwe mĩaonĩ ĩla Mwĩai Ngai wanengie andũ ma Ĩsilaeli. 41Meethĩawa vo me na Emani na Yetuthuni, na andũ angĩ manyuvĩtwe kwa nzĩa ya mwanya, nĩ kana mainĩae Mwĩai Ngai mbathi, kwondũ wa wendo wake ũla wĩkalaa tene na tene. 42O ta ũu Emani e na Yetuthuni nĩmo manengetwe wĩa wa kũvuva masoo na kũkũna masaya, na kũkũna syĩndũ ila ingĩ syakũnawa yĩla mbathi ikwinwa. Ana ma Yetuthuni nĩmo masungaa mĩvĩa.

43 # 2Sam 6.19-20 Nĩvo ĩndĩ andũ onthe menũkie kĩla mũndũ mũsyĩ kwake. Ndeviti nĩwenũkie athi kũathima andũ ma mũsyĩ wake.

Currently Selected:

1Mav 16: KAMBA

Highlight

Copy

Compare