1Mav 18

Ũsindi wa Ndeviti Kaũnĩ

(2Sam 8.1-18)

1Ĩtina wa maũndũ asu, Ndeviti nĩwokitie na Avilisiti ĩngĩ na amasinda. Nĩwakwatie ndũa ya Ngathi na motũi ala mamĩthyũlũlũkĩte syauma ũtonyinĩ wa Avilisiti. 2O ta ũu nĩwasindie Amoavi na matw'ĩka athũkũmi make, na nĩmamumĩasya koti.

3O ta ũu Ndeviti nĩwasindie Atateseli mũsumbĩ wa Sova ĩla yĩ Silia, vakuvĩ na kĩsio kya Amathi, yĩla Atateseli waendete kwaka kĩtuĩ kya kũlilikanawa nakyo, kĩsionĩ kĩla kĩ ũtee wa Ũsĩ wa Euvalati. 4Ndeviti nĩwakwatie makasya make ma kaũ ngili ĩmwe, na asikalĩ ngili mũonza malĩsĩte mbalasinĩ, na asikalĩ angĩ ngili mĩongo ĩlĩ maendaa na maũũ. Nĩwoosie mbalasi syĩanĩe kũkusya makasya ma kaũ ĩana, na atilanga ila ingĩ syonthe maũũ ma ĩtina.

5Yĩla Asilia kuma Ndamasikũ mookie kũtetheesya Atateseli mũsumbĩ wa Sova, Ndeviti nĩwooaie Asilia ngili mĩongo ĩlĩ na ilĩ. 6Nĩvo ĩndĩ Ndeviti waakie maeema ma kwĩkala asikalĩ kĩsionĩ kyoo Ndamasikũ, na Asilia matw'ĩka athũkũmi make, na mambĩĩa kũmumĩsya koti. Mwĩai Ngai nĩwanengae Ndeviti ũsindi kũndũ kw'onthe kũla waendaa.

7Ndeviti nĩwoosie ngao sya thaavu, ila syaĩ sya anini ma Atateseli aitwaa Yelũsalemu. 8#1Asu 7.40-47; 2Mav 4.11-18 O ta ũu nĩwoosie mbulonzi mbingĩ kuma ndũanĩ ya Tivathi na ya Kuni, ila syasumbĩkĩtwe nĩ Atateseli. (Ĩtina Solomoni nĩwatũmĩie mbulonzi ĩsu kũseũvya yĩla ĩtangi ya mbulonzi, ituĩ na syĩndũ ingĩ sya mbulonzi ila syatũmĩawa Ĩkalũnĩ.)

9Yĩla Toi mũsumbĩ wa Amathi weewie kana Ndeviti nũnasindie asikalĩ onthe ma Atateseli mũsumbĩ wa Nzova, 10nĩwatũmie Aatolamu mwana wake athi akakethye Mũsumbĩ Ndeviti, na aimũkathĩĩa nũndũ wa kũsinda Atateseli, ũla wokitĩte na Toi mavinda maingĩ. Aatolamu nĩwaeteie Ndeviti mĩthĩnzĩo mingĩ ĩseũvĩtw'e na thaavu, silĩva na mbulonzi. 11Mũsumbĩ Ndeviti nĩwavathie syĩndũ isu kwondũ wa Mwĩai Ngai o tondũ weekanĩte na thaavu na silĩva ũla woosete kuma nthĩ sya Aetomu, Amoavi, Aamimoni, Avilisiti na Aamaleki.

12 # Sav 60.1 Avisai, ũla inyia wake weetawa Nzeluia, nĩwokitie ooaa Aetomu ngili ĩkũmi na nyanya Mwandanĩ wa Mũnyũ. 13Nĩwaakie maeema ma kwĩkala asikalĩ Etomu, na Aetomu onthe matw'ĩka athũkũmi ma Ndeviti. Mwĩai Ngai nĩwanengae Ndeviti ũsindi kũndũ kw'onthe kũla waendaa.

Anini ma Ndeviti

14Ndeviti nĩwasumbĩkie Ĩsilaeli yonthe, na nĩwaatĩĩaa ũsili wa katĩ na ũw'o kwondũ wa andũ make onthe. 15Yoavu ũla inyia wake weetawa Nzeluia nĩwe waũngamĩe asikalĩ ma kaũ, nake Yeosavati mwana wa Ailuti nĩwe waiaa maũndũ ala maandĩke; 16Nzatoki mwana wa Aituvu na Aimeleki mwana wa Aviathali maĩ athembi, nake Sasiva nĩwe waĩ mũandĩki; 17Mbenaia mwana wa Yeoiata nĩwe waũngamĩe andũ meetawa Akelethi na Avelethi ala nĩmo maĩ asikalĩ ma kũsunga mũsumbĩ Ndeviti, namo ana ma Ndeviti maĩ atongoi ma kwa mũsumbĩ me ndaĩa.

Currently Selected:

1Mav 18: KAMBA

Highlight

Copy

Compare