1Mav 11
11
Ndeviti Aitw'ĩkĩthw'a Mũsumbĩ wa Andũ onthe ma Ĩsilaeli
(2Sam 5.1-10)
1Nĩvo ĩndĩ andũ ma Ĩsilaeli moombanĩie Eviloni vala Ndeviti waĩ na mamwĩa atĩĩ, “Ithyĩ nĩtũileny'e ũndũ naku kĩ-nthakame. 2Ĩvindanĩ ya tene, o na yĩla Saũlo waĩ mũsumbĩ waitũ nue watũtongoeasya kũthi kaũnĩ. Mwĩai Ngai, Ngai waku nĩwaneenie naku akwĩa, ‘Ũkatw'ĩka mũĩthi wa andũ makwa Ĩsilaeli, ũkatw'ĩka mũsumbĩ woo.’ ” 3Kwoou atongoi onthe ma andũ ma Ĩsilaeli nĩmaendie Eviloni vala ve mũsumbĩ. Mũsumbĩ Ndeviti nĩwaseũvisye ũtianĩo namo vau Eviloni mbee wa Mwĩai Ngai. Nĩmetĩkĩisye Ndeviti mauta atw'ĩke mũsumbĩ wa Ĩsilaeli o tondũ Mwĩai Ngai wathanĩte kwĩsĩla kwa Samũeli.
Ndeviti Ayũkita na Kũsinda Ndũa ya Yelũsalemu
4 #
Yos 15.63; Asi 1.21 Ndeviti na andũ onthe ma Ĩsilaeli nĩmaendie Yelũsalemu, ndũa ĩla kwa ĩsyĩtwa yĩngĩ yeetawa Yevusi. Ayevusi matwĩe ndũanĩ ĩsu. 5Ayevusi nĩmeeie Ndeviti atĩĩ, “Ndwĩlika ndũanĩ ĩno.” Ĩndĩ ũu wĩ o vo, Ndeviti nĩwakwatie wĩvitho woo mũlũmu wa Saioni, naw'o wambĩĩa kwĩtwa, “Ndũa ya Ndeviti.” 6Ndeviti nĩwaneenete akasya atĩĩ, “Mũndũ ũla wĩvithũkĩa Ayevusi mbee, nĩwe wĩtw'ĩka mũnene wa asikalĩ.” Yoavu mwana wa Nzeluia nĩwe waendie mbee, na kwoou atw'ĩka mũnene wa asikalĩ. 7Nĩvo ĩndĩ Ndeviti watũie ndũanĩ ĩsu yaĩ mbiĩĩe ĩkalũma, na kwoou yeetwa, “Ndũa ya Ndeviti.” 8Ndeviti nĩwaakie ndũa ĩsu ĩngĩ, kwambĩĩa vala mũthanga wa kũtw'ĩĩka ndũa ĩsu woombĩtwe, ngalĩkonĩ ya wumĩlonĩ wa syũa ya kĩĩma. Yoavu nĩwatũngĩĩie kũla kwatialĩte kwĩ kũomboku ndũanĩ ĩsu. 9Ndeviti nĩwaendeeie kwĩthĩwa e na ũtonyi mbee na mbee, nũndũ Mwĩai Ngai Mwene Ũtonyi W'onthe aĩ vamwe nake.
Asikalĩ Ngũmbaũ ma Ndeviti
(2Sam 23.8-39)
10Aa nĩmo atongoi ma asikalĩ ngũmbaũ ma Ndeviti, ala mamũtetheeisye mũno ũsumbĩnĩ wake. Meekie ũu me vamwe na andũ ala angĩ onthe ma Ĩsilaeli. Mamũtetheeisye atw'ĩka mũsumbĩ, o tondũ Mwĩai Ngai waneenete ĩũlũ wa andũ ma Ĩsilaeli.
11Ũũ nĩw'o ũvoo wa atongoi asu ngũmbaũ ma asikalĩ ma Ndeviti: Wa mbee aĩ Yasoveamu kuma andũnĩ ma mũsyĩ wa Akimoni. Yasoveamu nĩwe waĩ mũtongoi wa “Asikalĩ Atatũ.”#11.11 Atatũ: Maandĩko amwe maĩtye Mĩongo Ĩtatũ. Sisya 2Sam. 23.8 Nĩwokitie andũ maana atatũ aitũmĩa ĩtumo yake, na amoaĩa onthe kaũnĩ ũmwe. 12Ũla wamũatĩĩe katĩ wa ngũmbaũ isu Itatũ aĩ Eleasali mwana wa Ndoto, kuma andũnĩ ma mũsyĩ wa Aoo. 13Eleasali aĩ na Ndeviti vandũ vetawa Vasi-tamimu, yĩla Avilisiti moombanĩe vau mokĩte namo. Vau Vasi-tamimu vaĩ mũũnda waĩ nganũ mbingĩ ĩla yĩtawa mbaale. Andũ ma Ĩsilaeli nĩmasembie makĩa Avilisiti, 14ĩndĩ Eleasali e na Ndeviti nĩmaũngamie mũũndanĩ ũsu katĩ nĩ kana maũsiĩĩe, na mooaa Avilisiti kaũnĩ ũsu. Mwĩai Ngai nĩwatumie Eleasali na Ndeviti methĩwa na ũsindi mũnene mũno.
15Mũthenya ũmwe atatũ katĩ wa atongoi mĩongo ĩtatũ ma asikalĩ, nĩmatheeie ĩvianĩ vala Ndeviti wekalaa ngunganĩ ĩla yĩ Atulamu. Asikalĩ ma Avilisiti mambĩte maeema moo mwandanĩ wa Levaimu. 16Ĩvindanĩ yĩu, Ndeviti aĩ mwakonĩ mũlũmu, namo asikalĩ ma Avilisiti maĩ ndũanĩ ya Mbetheleemu. 17Ndeviti nĩwakwatiwe nĩ mũng'aatũko na asya atĩĩ, “Mwa kethĩwa ve o mũndũ ũndetee kĩw'ũ kya kũnyw'a, kuma kĩthimanĩ kĩla kĩ vakuvĩ na mũvĩa wa Mbetheleemu!” 18Ala asikalĩ ngũmbaũ nĩmavithũkĩie Avilisiti, na malika vala mambĩte maeema moo. Asikalĩ asu nĩmatavie kĩw'ũ kuma kĩla kĩthimanĩ, na maetee Ndeviti kĩw'ũ kĩu. Ndeviti nĩwaleile kũnyw'a kĩw'ũ kĩu, na akĩta nthĩ akyumĩsya Mwĩai Ngai kĩthĩwe nthembo. 19Ndeviti nĩwaisye atĩĩ, “Ngai ndethye ndikanyw'e kĩw'ũ kĩĩ! Ndonya ata kũnyw'a nthakame ya andũ aa? Nũndũ malikya mathayũ moo mũisyonĩ nĩ kana mandetee kĩw'ũ kĩĩ.” Kwoou Ndeviti nĩwaleile kũnyw'a kĩw'ũ kĩu. Asu nĩ maũndũ ma ũkũmbaũ ala meekiwe nĩ asikalĩ asu atatũ ngũmbaũ.
20Avisai mwana-a-inyia wa Yoavu nĩwe waĩ mũtongoi wa “Asikalĩ Mĩongo Ĩtatũ.” Nĩwokitie na andũ maana atatũ aitũmĩa ĩtumo yake na amoaa onthe. Kĩu nĩkyo kyatumie ethĩwa e nguma katĩ wa ala “Asikalĩ Mĩongo Ĩtatũ.”#11.20 Mĩongo Ĩtatũ: Maandĩko ma Kĩevelania maĩtye Atatũ. Sisya 2Sam 23.18 21Nĩwe weesĩkĩe mũno katĩ wa ila “Ngũmbaũ Mĩongo Ĩtatũ,” na nĩwatw'ĩkie mũnene woo. Ĩndĩ ũu wĩ o vo ndaaĩthĩwa e na nguma ta ila “Ngũmbaũ Itatũ.”
22Mbenaia mwana wa Yeoiata kuma Kaviseeli aĩ mũsikalĩ ngũmbaũ, na nĩweekie maũndũ maingĩ ma ũkũmbaũ. Nĩwooaie ngũmbaũ ilĩ sya Amoavi syaĩ nguma, na mũthenya ũmwe kwĩ ĩa, nĩwalikile ĩimanĩ na ooaĩa mũnyambũ vo. 23O ta ũu nĩwooaie mũndũ kuma nthĩ ya Misili. Mũndũ ũsu aĩ na ũasa wĩ mbee wa mita ilĩ, na aĩ na ĩtumo ĩnene mũno. Mbenaia nĩwakũnie Mũmisili ũsu na ndata, amũvena ĩtumo yake na amũaa nayo. 24Asu nĩmo maũndũ ma ũkũmbaũ ala Mbenaia weekie. Aĩ ũmwe katĩ wa ila “Ngũmbaũ Mĩongo Ĩtatũ.”#11.24 Mĩongo Ĩtatũ: Maandĩko ma Kĩevelania maĩtye Itatũ. 25Katĩ wa ngũmbaũ isu “Mĩongo Ĩtatũ” nĩweesĩkĩe, ĩndĩ ndaĩ nguma ta “Ala Atatũ.” Ndeviti nĩwanyuvie Mbenaia ethĩwe mũtongoi wa asikalĩ ala mamũsungaa. 26Asikalĩ ala angĩ ma Ndeviti maĩ nguma nĩmo aa:
Asaeli mwana-a-inyia wa Yoavu,
Elianani mwana wa Ndoto kuma Mbetheleemu,
27Samothi kuma Aloti,
Elesi kuma Veloni,
28Ila mwana wa Ikesi kuma Tekoa,
Avieseli kuma Anathothi,
29Sivekai kuma Usathi,
Ilai kuma Aoo,
30Maalai kuma Netova,
Eleti mwana wa Mbaana kuma Netova,
31Ithai mwana wa Livai kuma Ngivea ĩla yĩ kĩsionĩ kya nthĩ ya Mbengyameni,
Mbenaia kuma Vilathoni.
32Uulai kuma tũlũsĩnĩ twa Ngaasi,
Avieli kuma Alivathi,
33Asimavethi kuma Mbaalumu,
Eliava kuma Saalivoni,
34Ana ma Asemu kuma Ngisoni,
Yonathani mwana wa Sake kuma Alali,
35Aiamu mwana wa Sakali kuma Alali,
Elivai mwana wa Ulu,
36Eevieli kuma Mekela,
Aiya kuma Veloni,
37Esolo kuma Kalimeli,
Naalai mwana wa Esivai,
38Yoeli mwana-a-inyia wa Nathani,
Mivali mwana wa Akali,
39Nzeleki Mũamimoni,
Naalai kuma Mbeelothi, ũla wakuĩaa Yoavu mĩio ya kaũ,
40Ila kuma Ithili,
Ngalevu kuma Ithili,
41Ulia ũla waĩ Mũititi,
Nzavati mwana wa Alai,
42Atina mwana wa Sinza wa mbaĩ ya Lũveni, (Atina aĩ ũmwe wa atongoi ma mbaĩ ya Lũveni na aĩ na nguthu ya asikalĩ mĩongo ĩtatũ),
43Aananu mwana wa Maaka,
Yosavati kuma Mithini,
44Usia kuma Asitelathi,
Sama na Yeieli ana ma Othamu kuma Aloeli,
45Yetiaeli mwana wa Simili,
na Yooa mwana-a-inyia kuma Tisi,
46Elieli kuma Maava,
Yelivai na Yosavai ana ma Elinaamu,
Ithima kuma Moavi,
47Elieli, Oveti na Yasieli kuma Menzova.
Currently Selected:
1Mav 11: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
