Mat 22

Ngelekany'o ya Mboka ya Mũtwaano

(Lk 14.15-24)

1O ĩngĩ Yesũ nĩwatũmĩie ngelekany'o kũmamanyĩsya andũ. 2Nĩwameie atĩĩ, “Ũsumbĩ wa ĩtu no ũvw'ananw'e na mũsumbĩ ũmwe, ũla waseũvĩisye mwana wake mboka ya mũtwaano. 3Nĩwatũmie athũkũmi make mathi makete andũ ala mathoketw'e mbokanĩ ĩsu, ĩndĩ andũ asu malea kũka. 4Nĩwasyokie atũma athũkũmi angĩ amea atĩĩ, ‘Endai mũkatavye andũ ala mathoketw'e mũmee nĩnĩminie kũseũvya mboka: Nĩnĩthĩnzie ndewa syakwa na tũsalũ tũla tũnou. Kĩla kĩndũ yu nĩkyũmbany'e, kwoou moke mbokanĩ ya mũtwaano!’ 5Ĩndĩ andũ asu malea kwosa ũu ta ũndũ, na mathi maũndũnĩ moo; amwe mathi mĩũndanĩ, angĩ mathi ndũnyũ kũthoosya syĩndũ, 6na ala angĩ makwata athũkũmi asu mamathĩny'a mũno na mamoaa.

7“Ũndũ ũsu nĩwathatisye mũsumbĩ mũno na atũma asikalĩ make mathi mooaa andũ asu oaani na mavĩvya ndũa yoo. 8Nĩvo ĩndĩ mũsumbĩ weetie athũkũmi ala angĩ make amea atĩĩ, ‘Ĩvinda ya mboka ya mũtwaano nĩyavika, ĩndĩ andũ ala nĩĩthoketye mayĩĩaĩlĩte kũthokw'a. 9Kwoou endai kũu mataanĩsyonĩ ma malelũ, mũthokye andũ onthe ala mũkwona moke mbokanĩ.’ 10Athũkũmi asu nĩmaumaalile mathi kũu malelũnĩ na mathokya andũ onthe ala makomanaa namo: Andũ ala aseo na ala athũku. Mamathokisye onthe nginya nyũmba ĩla yaseũvĩw'e mboka ĩsu ya mũtwaano yausũa andũ ki.

11“Yĩla mũsumbĩ walikile nyũmbanĩ ĩsu asisye andũ ala mavikie, nĩwoonie mũndũ ũmwe ũteekĩĩte ngũa ya mũtwaano. 12Nĩwamũkũlilye atĩĩ, ‘Mũnyanyawa, ũlikangile vaa ata ũte na ngũa ya mũtwaano?’ Mũndũ ũsu ndaĩ na ũndũ ũsũngĩa. 13#Mat 8.12; 25.30; Lk 13.28 Nĩvo ĩndĩ mũsumbĩ weeie athũkũmi make atĩĩ, ‘Ovai mũndũ ũũ moko na maũũ na mũimwĩkya nza kĩvindunĩ, vala andũ makaĩa na kũvevetany'a maeo.’ ”

14Yesũ nĩwaminũkĩlĩĩlye na kwasya atĩĩ, “Nĩ aingĩ ala mathokaw'a, ĩndĩ ala anyuve nĩ avũthũ.”

Ĩkũlyo ĩũlũ wa Kũĩva Koti

(Mk 12.13-17; Lk 20.20-26)

15Avalisi nĩmaendie na masama ũndũ matonya kũmũkwatya Yesũ kwa kũmũkũlya makũlyo. 16Nĩmatũmie amwe ma amanyĩw'a moo na ma nguthu ya Mũsumbĩ Elote vala ve Yesũ. Nĩmaendie mamwĩa atĩĩ, “Mũmanyĩsya, nĩtwĩsĩ kana ũneenaa ũla w'o. Ũmanyĩasya andũ kwenda kwa Ngai kwa nzĩa ĩla mbaĩlu, ũteũkĩa mũndũ, na ndwĩ mwendeesya wa ala anene. 17Yu we kwa tũtavye wĩona ata. Nĩ waĩlu kũĩva mũsumbĩ wa Loma koti? Tũmũĩvae kana tũlee?”

18Yesũ nĩwamanyie mosũanĩo mũthũku ala maĩ namo na kwoou amea atĩĩ, “Inyw'ĩ andũ ma mĩseũvyo! Mwĩndata nĩkĩ? 19Mbony'ei mbesa ila mũtũmĩaa kũĩva koti.” Nĩmamũeteie ndinalĩ, 20nake amakũlya atĩĩ, “Visa ũũ na ĩsyĩtwa yĩĩ nĩ syaũ?”

21Namo mamũsũngĩa mamwĩa atĩĩ, “Nĩ sya mũsumbĩ wa Loma.” Kwoou Yesũ amea atĩĩ, “Nengai ĩndĩ mũsumbĩ kĩla kya mũsumbĩ, na mũinenga Ngai kĩla kya Ngai.”

22Yĩla meewie ũu nĩmaseng'ie mũno, na maekana nake na mathi vyũ.

Ĩkũlyo ĩũlũ wa Kũthayũũka kuma kwa Akw'ũ

(Mk 12.18-27; Lk 20.27-40)

23 # Meko 23.8 Mũthenya o ũsu Asatũkai ala maasya kana andũ maikathayũũka kuma kwa akw'ũ, nĩmaendie vala ve Yesũ na mamũkũlya atĩĩ, 24#Kũt 25.5 “Mũmanyĩsya, Mwose nĩwaisye kana, ethĩwa mũndũ nĩwakw'a atia mũka ate kana, no nginya mwana-a-inyia ose mũndũ mũka ũsu ndiwa nĩ kana asyaĩe mwana-a-inyia syana. 25Yuĩ, kwaĩ aũme mũonza ma inyia ũmwe mekalaa kũũ. Ũla mũkũũ nĩwatwaanie na akw'a atia mũka ate kana. Kwoou mwana-a-inyia ũla ũmũatĩĩe atwaa mũndũ mũka ũsu. 26O nake ũsu wa kelĩ eeka o ta mũkũũe, na ũla wa katatũ o ta ũu kũvika ũla wa mũonza. 27Ĩtina mũndũ mũka ũsu nĩwakwie o nake. 28Yu ĩndĩ, mũthenya ũla akw'ũ makathayũũka, mũndũ mũka ũsu akeethĩwa e mũka wa wĩva, na onthe me mũonza nĩmamũtwaĩte?”

29Yesũ nĩwamasũngĩie amea atĩĩ, “Inyw'ĩ nĩmũvĩtĩtye nũndũ mũyĩsĩ Maandĩko Matheu kana o na vinya wa Ngai. 30Yĩla andũ makathayũũka kuma kwa akw'ũ, kũikethĩwa kũtwaana kana kũtwawa, nũndũ mo makeethĩwa mailyĩ alaĩka ma ĩtunĩ. 31Naw'o ũndũ wa kũthayũũka kuma kwa akw'ũ, nũndũ inyw'ĩ mũtaasoma ũndũ Ngai ũmũtavĩtye nthĩnĩ wa Maandĩko Matheu? Nĩwaisye atĩĩ, 32#Kuma 3.6 ‘Nyie ninyie Ngai wa Avalaamu, na Ngai wa Isaka, na Ngai wa Yakovo.’ We ti Ngai wa ala akw'ũ, ĩndĩ nĩ Ngai wa ala me thayũ.”

33Ĩkomano nĩyaseng'ie mũno yeew'a ũndũ Yesũ wamanyĩsya.

Mwĩao ũla Mũnene

(Mk 12.28-34; Lk 10.25-28)

34Yĩla Avalisi meewie kana Yesũ nũvindĩthisye Asatũkai, nĩmoombanie mathi vala ũĩ. 35#Lk 10.25-28 Ũmwe woo wasomeete mĩao ya Kĩyuti, aimantha nzĩa ya kũmũkwatya Yesũ, nĩwamũkũlilye atĩĩ, 36“Mũmanyĩsya, mwĩao ũla mũnene kwĩ ĩla ĩngĩ nĩ wĩva?”

37 # Kũt 6.5 Yesũ amũsũngĩa amwĩa atĩĩ, “Mwende Mwĩai Ngai waku na ngoo yaku yonthe, na thayũ waku w'onthe, na kĩlĩko kyaku kyonthe. 38Ũũ nĩw'o mwĩao ũla mũnene na wa vata mũno. 39#Ali 19.18 Ũla wa kelĩ naw'o ũilyĩ o ta ũsu: ‘Mwende mũtũi waku o tondũ wĩyendete we mwene.’ 40Mĩao ĩsu yĩ ĩlĩ ĩtũngĩanĩĩte mĩao ĩla ĩngĩ yonthe ya Mwose, na momanyĩsyo onthe ma athani.”

Ĩkũlyo ĩũlũ wa Klĩsto

(Mk 12.35-37; Lk 20.41-44)

41Avalisi mombanĩte o vau, Yesũ nĩwamakũlilye atĩĩ, 42“Inyw'ĩ mũsũanĩaa ata ĩũlũ wa Klĩsto? We nĩ nzyawa yaũ?” Namo mamũsũngĩa mamwĩa atĩĩ, “Nĩ nzyawa ya Ndeviti.”

43Yesũ amakũlya atĩĩ, “Nĩkĩ ĩndĩ, Ndeviti aveveewe nĩ Veva Mũtheu, wamwĩtie, ‘Mwĩai?’ Ndeviti nĩwaisye,

44 # Sav 110.1 ‘Ngai nĩwamwĩie Mwĩai wakwa:

Ĩkala nthĩ ngalĩko ya kw'oko kwakwa kwa aũme,

kũvika yĩla nĩmaia amaitha maku ungu wa ũtonyi waku.’

45Ethĩwa ĩndĩ Ndeviti eetie Klĩsto, ‘Mwĩai,’ kũtonyeka ata Klĩsto ethĩwe e nzyawa yake?” 46Vai ũmwe waatonya kũsũngĩa Yesũ, na kuma mũthenya ũsu, vai mũndũ waatata kũmũkũlya makũlyo angĩ.

Currently Selected:

Mat 22: KAMBA

Highlight

Copy