Mat 23

Yesũ Aikany'a Andũ Mesũvĩane na Amanyĩsya ma Mĩao na Avalisi

(Mk 12.38-39; Lk 11.43,46; 20.45-46)

1Yesũ nĩwatavisye ĩkomano vamwe na amanyĩw'a make amea atĩĩ, 2“Amanyĩsya ma Mĩao na Avalisi nĩmo me na ũkũmũ wa kũelesya kwa ũliku Mĩao ya Mwose. 3Kwoou no nginya mũmew'e na mũyĩka ũndũ meũmũtavya, ĩndĩ mũikeke ũndũ mo mekwĩka nũndũ maiatĩĩaa kĩla mamanyĩasya. 4Nĩmovaa mĩio mĩito mũno ĩtakuĩka makaĩkya andũ, ĩndĩ mo ene mayĩtĩkĩla kũkĩlya o na kyaa kyoo makamatetheesya kũkua.

5 # Mat 6.1; Mot 15.38; Kũt 6.8 “Maũndũ onthe ala mekaa, mekaa nĩ kana moneke nĩ andũ. Meyovaa mĩkumbũ mĩthanthau ũthyũ na moko yĩandĩkĩtwe mĩsoa kuma Maandĩkonĩ Matheu! O ta ũu nĩmaasavasya manyenze ala matumĩĩwe mĩthyanĩ ya ngũa syoo kũthonoka ma andũ ala angĩ!#23.5 Kwĩyova mĩkumbũ ũthyũ na moko yĩandĩkĩtwe mĩsoa kuma Maandĩkonĩ Matheu, na kũtumĩĩa manyenze mĩthyanĩ ya ngũa, yaĩ nzĩa ya Ayuti ya kwonany'a wendo woo kwa Ngai na kwa ndeto yake 6Mendete kwĩkala kũndũ kwa ndaĩa me mbokanĩ, na kwĩkala ivĩlanĩ sya mbee nyũmbanĩ sya Ayuti sya kũthaithĩa na kũmbanĩa. 7O ta ũu, mendete kũkethaw'a na ndaĩa yĩla me ndũnyũ na kwĩtawa nĩ andũ, ‘Mũmanyĩsya.’ 8Inyw'ĩ mũikaaĩtĩkĩle mwĩtwe, ‘Mũmanyĩsya,’ nũndũ inyw'ĩ mwĩ ana ma Ĩthe ũmwe, na mwĩ na mũmanyĩsya o ũmwe. 9Na mũikaaĩte mũndũ o na wĩva, ‘Asa,’ vaa ĩũlũ wa nthĩ, nũndũ mwĩ na Asa o ũmwe nake e ĩtunĩ. 10O na mũikaaĩtĩkĩle mwĩtwe, ‘Mwĩai,’ nũndũ mwĩ na Mwĩai o ũmwe nake nĩ Klĩsto. 11#Mat 20.26-27; Mk 9.35; 10.43-44; Lk 22.26 Mũndũ ũla mũnene vyũ katĩ wenyu, no nginya ethĩwe mũthũkũmi wenyu. 12#Lk 14.11; 18.14 Nũndũ mũndũ ũla wĩnenevasya akanyivw'a na ũla wĩnyivasya akanenevw'a.

Yesũ Ayĩumanĩa Amanyĩsya ma Mĩao na Avalisi nũndũ wa Mĩseũvyo Yoo

(Mk 12.40; Lk 11.39-42,44,52; 20.47)

13“Kyeva nĩ kwenyu inyw'ĩ amanyĩsya ma Mĩao na Avalisi, andũ ma mĩseũvyo! Mũvingĩaa andũ mũomo wa ũsumbĩ wa ĩtu maikalike; inyw'ĩ ene mũiũlika na mũikwĩtĩkĩlya andũ ala meenda kũlika malike. [ 14Kyeva nĩ kwenyu inyw'ĩ amanyĩsya ma Mĩao na Avalisi, andũ ma mĩseũvyo! Nĩmũvenaa aka ndiwa syĩndũ syoo, na kwĩseũvya kwa kũvoya mboya ndaasa! Kwondũ wa ũu, ũsilĩlo wenyu ũkeethĩwa wĩ mũnene mũno]#23.14 Maandĩko amwe ma tene ma Ndeto ya Ngai nĩmatiĩte mũsoa ũũ

15“Kyeva nĩ kwenyu inyw'ĩ amanyĩsya ma Mĩao na Avalisi, andũ ma mĩseũvyo! Mũendaa kũũ kw'onthe: Ng'oko wa mokanga na nthĩ nyũmũ, mũimantha kana nĩmũalyũla mũndũ ũmwe aatĩĩe ũthaithi wenyu. Mwamũkwatya, mũmũtw'ĩkĩthasya mũndũ waĩlĩte kũthi ĩianĩ ya mwaki kũndũ kwĩlĩ kwĩ ũndũ inyw'ĩ mwaĩlwe!

16“Kyeva nĩ kwenyu, inyw'ĩ ndongoi ite metho! Mũmanyĩasya kana ethĩwa mũndũ akeevĩta na Ĩkalũ, ũu ti ũndũ; ĩndĩ ethĩwa akeevĩta na thaavu ũla wĩ Ĩkalũnĩ, akakwatwa nĩ wĩvĩto ũsu. 17Inyw'ĩ ilalinda ndumanu! Katĩ wa thaavu na Ĩkalũ, yĩla nĩyo yĩtumaa thaavu ũsu wĩthĩwa wĩ mũtheu, nĩ kĩva kĩla kĩnene? 18O na ĩngĩ mũmanyĩasya kana ethĩwa mũndũ akeevĩta na kĩthembeo, ũu ti ũndũ; ĩndĩ ethĩwa akeevĩta na nthembo ĩla yilĩĩlwe kĩthembeonĩ, akakwatwa nĩ wĩvĩto ũsu. 19Inyw'ĩ ko mũte ilalinda! Katĩ wa nthembo na kĩthembeo kĩla nĩkyo kĩtumaa nthembo ĩsu yĩthĩwa yĩ ntheu, nĩ kĩva kĩla kĩnene? 20Kwoou manyai kana yĩla mũndũ weevĩta na kĩthembeo, evĩtaa nakyo na kyonthe kĩla kilĩĩlwe ĩũlũ wakyo. 21Na yĩla mũndũ weevĩta na Ĩkalũ, ethĩawa eevĩta nayo na Ngai ũla wĩkalaa vo. 22#Ĩsa 66.1; Mat 5.34 O ta ũu, yĩla mũndũ weevĩta na ĩtu, ethĩawa eevĩta na kĩvĩla kya kĩ-ũsumbĩ kya Ngai na Ngai ũla ũkĩkalĩlaa.

23 # Ali 27.30 “Kyeva nĩ kwenyu inyw'ĩ amanyĩsya ma Mĩao na Avalisi, andũ ma mĩseũvyo! Mumĩasya Ngai kĩlungu kya ĩkũmi o na kya syĩndũ ila syĩkĩawa lĩunĩ wongeleke mũsamo, nasyo nĩ ndania, ndũlũ na kĩtũngũũ, na mũyĩatĩĩaa maũndũ ma vata mũno ala mamanyĩaw'a nĩ Mĩao ta ũsili wa katĩ, tei na kũĩkĩĩka. Maũndũ aa nĩmo mwaĩlĩte kwĩka, o mũyĩka maũndũ asu angĩ. 24Inyw'ĩ atongoi mũte metho! Mũkelaa kĩndũ kĩla mũũnyw'a mũikamelye kaindo ta kaki na mũimelya yĩndũ ta ngamĩle.

25“Kyeva nĩ kwenyu inyw'ĩ amanyĩsya ma Mĩao na Avalisi, andũ ma mĩseũvyo! Mũthambasya kĩkombe na ĩsaani ngalĩko ya nza, ĩndĩ nthĩnĩ syusĩe syĩndũ ila mũkwatĩte kwa nzĩa ya ũvenaninĩ na ĩtomo yingĩ. 26We Mũvalisi Kĩlalinda! Amba kũthesya kĩla kĩ nthĩnĩ wa kĩkombe na nthĩnĩ wa ĩsaani, na nza kwĩĩthĩwa kwathea o nakw'o.

27 # Meko 23.3 “Kyeva nĩ kwenyu inyw'ĩ amanyĩsya ma Mĩao na Avalisi, andũ ma mĩseũvyo! Mũilyĩ ta mbũa ivakĩtwe langi mweũ; kũũ nza syonekaa syĩ mbanake, ĩndĩ nthĩnĩ syusĩe mavĩndĩ ma andũ akw'ũ na syĩndũ mbou. 28Kwoou o nenyu mwonekaa nĩ andũ kũũ nza mwĩ aseo, ĩndĩ nthĩnĩ mwĩ athũku mũno na mwĩkaa kwĩseũvya.

Yesũ Ayathana Ũsilĩlo wa Amanyĩsya ma Mĩao na wa Avalisi

(Lk 11.47-51)

29“Kyeva nĩ kwenyu, inyw'ĩ amanyĩsya ma Mĩao na Avalisi, andũ ma mĩseũvyo! Mwakĩĩaa mbũa sya athani na kwanakavya mbũa sya andũ ala mekalĩte mwĩkalo mũseo. 30Mwaasya kana, kethĩwa mwaĩ kw'o ĩvindanĩ ya aaũmae menyu, mũyĩthĩwa mwaakwatanĩa namo kũaa athani. 31Kwa nzĩa ĩsu, nĩmwĩtĩkĩlaa kana mwĩ nzyawa sya andũ ala mooaie athani! 32Endai ĩndĩ mũminũkĩlĩĩlye kĩla kyambĩlĩĩlw'e nĩ aaũmae menyu. 33#Mat 3.7; 12.34; Lk 3.7 Inyw'ĩ nzoka ii, ũsyao wa nzoka syĩtawa kĩko! Vai nzĩa mũtonya kũlea kũtw'ĩĩwa kũthi ĩianĩ ya mwaki. 34Kwoou, ngamũtũmĩa athani, na andũ oĩ na amanyĩsya; amwe moo mũkamoaa kwa kũmamba ngelany'onĩ, na angĩ mũkamavũĩa nyũmbanĩ sya Ayuti sya kũthaithĩa na kũmbanĩa, na kũmasyĩma kuma ndũa kũthi ĩla ĩngĩ. 35#Mwa 4.8; 2Mav 24.20-21 Kwa kĩtumi kĩu, mũkasilĩlwa kwondũ wa andũ onthe mekalĩte mwĩkalo mũseo ala mooaiwe, kwambĩĩa na kũawa kwa Aveli ate ĩvĩtyo, kũvika kũawa kwa Nzekalia mwana wa Mbalakia, ũla inyw'ĩ Ayuti mwooaĩie katĩ katĩ wa mwako wa Ĩkalũ na kĩthembeo. 36Nĩmũtavya w'o, andũ ma ĩvinda yĩĩ makasilĩlwa nũndũ wa maũndũ asu onthe.

Ũndũ Yesũ Wendete Mũsyĩ wa Yelũsalemu

(Lk 13.34-35)

37“We Yelũsalemu, Yelũsalemu! Wũaa athani na ũikimanga na mavia andũ ala ũtũmĩawa nĩ Ngai! Nĩ mavinda meana nendie kũmbany'a andũ maku, o ũndũ ngũkũ yũmbanasya tũswii twayo na ĩivw'ĩkĩa, ĩndĩ walea kũmbĩtĩkĩlya! 38#Yel 22.5 Kwoou yu, Ĩkalũ yenyu yĩkatiwa yĩ ĩthei. 39#Sav 118.26 Ekai nĩmũtavye, mũikambona ĩngĩ kũvika ĩvinda yĩla mũkasya, ‘Nĩ mũathime ũla wũkĩte ĩsyĩtwanĩ ya Mwĩai.’ ”

Currently Selected:

Mat 23: KAMBA

Highlight

Copy