Mwa 49
49
Ndeto sya Mũthya sya Yakovo
1Yakovo nĩwatũmanie ana make na mooka amea atĩĩ, “Ũmbanai vamwe nĩ kana nĩmũtavye maũndũ ala meĩkĩka kwenyu ĩvindanĩ yĩla yũkĩte.
2“Ana ma Yakovo, ũmbanai vamwe na mũyĩthukĩĩsya,
ĩthukĩĩsyei ngĩneena nenyu nyie ĩthe wenyu.
3“Lũveni, nue mwana wakwa wa mbee,
nue vinya wakwa,
mwana ũla nasyaie mbee natw'ĩka mũndũ mũima,
mwana ũla mũtaĩe mũno na wĩ vinya kwĩ ana ala angĩ makwa.
4Ũilyĩ ta kĩw'ũ kĩna itulumo,
ndũkethĩwa wĩ na nguma mbee wa ana-a-ĩthe maku,
nũndũ nĩwamanyanie kĩ-mwĩĩ na mũthũkũmi wakwa mũndũ mũka,
na wavukya ũkomo wakwa nyie ĩthe waku.
5“Simioni na Livai mailyĩ ũndũ ũmwe kwa kwĩka mothũku;
matũmĩaa mĩio yoo ya kaũ kwĩka mothũku.
6Ndikethĩwa na ngwatanĩo namo nzamanĩ syoo,
o na ndikatetheanĩsya namo mbũmbanonĩ syoo,
nĩkwĩthĩwa nĩmathatie na mooaa andũ,
na nũndũ wa ngũlũ syoo matemanga nzaũ malangũ.
7Nũumanĩwe ũthatu woo mũthũku mũno,
na ũthilĩku woo ũyĩumanĩwa nũndũ nĩmũthũku!
Ngamanyaĩĩkĩsya kĩla vandũ ĩũlũ wa nthĩ ya Ĩsilaeli,
ngamanyaĩĩkya mavulane na andũ ma mbaĩ ila ingĩ sya Yakovo.
8“Yuta, ana-a-ĩthe maku makakũtaĩaa;
ũkasindaa amaitha maku;
ana-a-ĩthe maku makakumanaa makũnenge ndaĩa.
9 #
Mot 24.9; Ũvu 5.5 We Yuta ũilyĩ ta mũnyambũ wa mũika,
ũla ũkwataa nyamũ ũkoaa na kũsyoka kĩsumonĩ kyaw'o.
Ũilyĩ ta mũnyambũ ũla ũtindiaa na ũikoma,
na ũyĩthĩa vai mũndũ wĩtĩkĩla kũwũamũkya.
10Yuta akeethĩawa na ndata ya kĩ-ũsumbĩ;
nzyawa syake ikasumbĩkaa ĩvinda yonthe.
Mbaĩ ila ingĩ ikamumĩasya koti;
ikamwĩw'aa na kũkumana mbee wake imũnenge ndaĩa.
11Yuta akoovaa mang'oi make mũsavivũnĩ,
akooveeaa mang'oi asu mĩsavivũnĩ ĩla mĩseo vyũ.
Akavũaa ngũa syake na ndivai
ndune ta nthakame.
12Metho make makeethĩwa me matune nũndũ wa kũnyw'a ndivai,
namo maeo make makeethĩwa me meũ nũndũ wa kũnyw'a ĩia.
13“Nzevuluni akatũaa ũtee wa ũkanga,
na meli ikaũngamaa ũtũonĩ wake.
Kĩsio kyake kĩkeethĩwa kĩendete kũvika Sitoni.
14“Isakali nĩ ta ĩng'oi yĩ vinya mũno,
yĩtindiĩte katĩ wa mĩio ĩla yĩkuĩte.
15Ĩndĩ nĩwonaa vandũ va kũthũmũa ve vaseo,
na kĩsio kya nthĩ yake kĩ kya kwendeesya;
kwoou nũkumanaa aĩkw'e mĩio,
na aithũkũmĩthw'a na vinya ta ngombo.
16“Ndani akasilanasya andũ make,
o ta ĩmwe ya mbaĩ sya Ĩsilaeli.
17Akeethĩwa ailyĩ ta nzoka yĩ nzĩanĩ,
nzoka yĩ sumu yĩ ũtee wa nzĩa,
ĩla ĩũmaa kũũ kwa Mbalasi,
nginya ũla ũmĩlĩsĩte akavalũka na mangala.
18“Neteelete ũtangĩĩo waku we Mwĩai Ngai.
19“Ngandi akavithũkĩwa nĩ amaitha,
ĩndĩ nake akamaatĩĩa amokite.
20“Mĩũnda ya Aseli ĩkasyaa lĩu mũseo,
akakethaa lĩu wa kwendeesya asumbĩ.
21“Navutalĩ ailyĩ ta ndaatai ĩla yĩna ũthasyo wa kũthi vala ĩkwenda;
ĩla ĩsyaa tũtena twa kwendeesya. #49.21 ĩla ĩsyaa tũtena twa kwendeesya: Kana aneenaa ndeto nzeo.
22“Yosevu nĩ ta mũsavivũ ũsyaa mũno;
mũsavivũ ũsyaa mũno wĩ vakuvĩ na kĩthima kya kĩw'ũ;
mbonge syaw'o itambĩĩaa ũkũta.#49.22 Nthĩnĩ wa Maandĩko amwe Matheu, mũsoa ũũ ũandĩkĩtwe ta ũũ: Yosevu nĩ ta ĩng'oi ya kĩthekanĩ yĩ vakuvĩ na kĩthima, ĩng'oi ya kĩthekanĩ yĩ mũtiũũkonĩ wa kĩĩma.
23Amaitha make mamũvithũkĩie na vinya;
mamũatha na maangi na mamũthĩny'a mũno.
24Ĩndĩ nĩwakwatie ũta wake alũmĩtye,
moko make nĩmeekĩiwe vinya nĩ Ngai wa Yakovo Ũla wĩ Ũtonyi,
eekĩwa vinya nĩ Mũĩthi na Mũsũvĩi wa Ĩsilaeli.
25Weekĩwa vinya nĩ Ngai wa ĩthe waku ũla nĩwe ũkũtethasya
weekĩwa vinya nĩ Ngai Mwene Ũtonyi W'onthe ũla wĩkũathimaa na moathimo ma mbua kuma ĩũlũ,
na kĩw'ũ kingĩ kuma ungu wa nthĩ,
na akakũathima na indo mbingĩ na syana.
26Moathimo aa ngũũnenga nyie ĩthe waku,
nĩ manene makavĩtũka moathimo ma iĩma sya tene na tene,
o na kũvĩtũka ũthwii w'onthe wa iĩma isu.
Moathimo asu onthe nĩmethĩwe ĩũlũ wa Yosevu,
ũla wavathiwe ethĩwe mũtongoi wa ana-a-ĩthe.
27“Mbengyameni nĩ ta nzũi mbai,
kĩoko nĩwũaa amaitha make,
na mawĩoo ayĩaana mũtavo.”
28Isu nĩsyo mbaĩ ĩkũmi na ilĩ sya Ĩsilaeli, na ndeto isu nĩsyo ĩthe woo wamatavisye yĩla wamaathimaa. Nĩwanengie kĩla ũmwe woo ũathimo ũla ũmwaĩlĩte.
Kũkw'a na Kũthikwa kwa Yakovo
29Nĩvo ĩndĩ Yakovo weeaĩie ana make amea atĩĩ, “Yu ngilĩlye kũkw'a na kũthikwa o ta andũ ala makwa makwie tene. Mwĩnthika vala vathikĩtwe ũmau wakwa na nau wakwa, ngunganĩ ĩla yĩ kĩthekanĩ kya Eviloni ũla Mũititi. 30#Mwa 23.3-20 Ngunga ĩsu yĩ kĩthekanĩ kĩla kĩ Makivela, ngalĩko ya wumĩlonĩ wa sya kuma Mamile, kũu nthĩ ya Kanaani. Avalaamu athooie ngunga na kĩtheka kĩu kuma kwa Eviloni vethĩwe vandũ va kũthikaa andũ. 31#Mwa 25.9-10; 35.29 Vau nĩvo vathikiwe Avalaamu na Sala mũka wake; na novo vathikiwe Isaka na Laveka mũka wake. O ta ũu novo nathikie Lea mũka wakwa. 32Kĩtheka kĩu na ngunga ĩla yĩ vo syathooiwe kuma kwa Aititi.” 33#Meko 7.15 Yĩla Yakovo waminie kwĩaĩa ana make, nĩwalĩsile ĩngĩ kĩtandanĩ kyake akoma na ĩndĩ akw'a.
Currently Selected:
Mwa 49: KAMBA
Highlight
Share
Compare
Copy
Want to have your highlights saved across all your devices? Sign up or sign in
BIBLE SOCIETY OF KENYA © 2011
