Mwa 50

1Yosevu nĩwavalũkile ũthyũnĩ wa ĩthe wake, aĩa na amũkethya na ngethi ya wendo. 2Yosevu nĩweeaĩie ndakĩtalĩ syake ivake mwĩĩ wa ĩthe wake ndawa ndũkoe, nasyo syeeka ũu. 3Ndakĩtalĩ isu syakuie mĩthenya mĩongo ĩna kũvaka mwĩĩ wa Yakovo ndawa ndũkoe, nũndũ yĩu nĩyo ĩvinda yĩla yatũmĩawa kwĩka ũu. Andũ ma Misili nĩmaĩie nũndũ wa kĩkw'ũ kya Yakovo vandũ va mĩthenya mĩongo mũonza.

4Yĩla ĩvinda yĩu ya kĩĩo yathelile, Yosevu nĩwaneenie na anini ma mũsumbĩ amea, “Ethĩwa nĩnonete ũseo mbee wenyu, nĩmwĩsũva mũthi mũkaneene na mũsumbĩ vandũ vakwa mũmwĩe 5#Mwa 47.29-31 kana nĩneevĩtie mbee wa ĩthe wakwa yĩla wambĩie, ‘Ngilĩlye kũkw'a, na nĩenda wĩnthika mbũanĩ yakwa ĩla nenzie nthĩ ya Kanaani.’ Yu ĩndĩ nĩmwĩsũva andeke nĩthi ngathike ĩthe wakwa na ngĩsyoka.”

6Mũsumbĩ nĩwamasũngĩie amea mathi makamwĩe Yosevu atĩĩ, “Enda ũkathike ĩthe waku kwĩanana na ũndũ weevĩtie wasya ũkeeka.”

7Kwoou Yosevu nĩwaendie kũthika ĩthe wake. Nĩwaendanisye na anini onthe ma mũsumbĩ, andũ onthe ala me nguma ma kwa mũsumbĩ, na anene onthe ma nthĩ ya Misili. 8O ta ũu Yosevu nĩwaendanisye na andũ ma mũsyĩ wake, ana-a-ĩthe make na andũ ala angĩ ma mũsyĩ wa ĩthe wake. Syana ila nini na indo syoo nosyo syatiiwe kĩsionĩ kya Ngoseni. 9Asikalĩ makuĩtwe nĩ makasya ma kaũ na angĩ malĩsĩte mbalasinĩ nĩmaendanisye namo. Kyaĩ kĩkundi kya andũ aingĩ mũno.

10Yĩla mavikie kĩvũĩonĩ kĩla kĩ vandũ vetawa Atati, mũingo wa Ũsĩ wa Yolotani, nĩmaĩie na wasya mũnene me na kyeva kingĩ. Me vau Yosevu nĩwaseũvisye kyathi kya matukũ mũonza ma kũĩa nũndũ wa ĩthe wake. 11Yĩla andũ ma nthĩ ya Kanaani moonie andũ asu maiĩa nĩ kyeva me kĩvũĩonĩ kĩu kya Atati nĩmaisye, “Andũ ma Misili mena kĩĩo kĩnene kya kyeva!” Kĩu nĩkyo kyatumie vetwa Aveli-Misili.#50.11 Aveli-Misili: Ũalyũlo wa ĩsyĩtwa yĩĩ nĩ andũ ma Misili me na kĩĩo.

12Ana ma Yakovo nĩmeekie ĩthe woo kwĩanana na ũndũ wameaĩĩte. 13#Meko 7.16 Nĩmakuie mwĩĩ wake maũtwaa nthĩ ya Kanaani na maũthika ngunganĩ ĩla yĩ Makivela ngalĩko ya wumĩlonĩ wa syũa ya Mamile. Ngunga ĩsu na kĩtheka kĩu syathooetwe nĩ Avalaamu kuma kwa Eviloni ũla Mũititi, vethĩwe vandũ va kũthika andũ. 14Yosevu amina kũthika ĩthe wake, nĩwasyokie Misili vamwe na ana-a-ĩthe make na andũ ala angĩ onthe waendanĩtye namo kũthika ĩthe wake.

Yosevu Aimaĩkĩĩthya Ana-a-ĩthe

15Ĩtina wa kĩkw'ũ kya Yakovo, ana-a-ĩthe ma Yosevu nĩmaneenanisye mayasya atĩĩ, “Yosevu nũtonya kwambĩĩa kũtũmena na aivanga kwĩyĩĩvanĩsya nũndũ wa maũndũ mathũku onthe ala twamwĩkie.” 16Nĩmatũmie andũ kũla kwĩ Yosevu makamwĩe atĩĩ, “Ĩthe waitũ atanamba kũkw'a nĩweeaie asya 17ũtavw'e atĩĩ, ‘Nĩngũkwĩsũva ũekee mavĩtyo na naĩ sya ana-a-ĩthe maku, nũndũ nĩmakwĩkie ũthũku.’ Kwoou nĩtũũkwĩsũva ũtũekee ithyĩ athũkũmi ma Ngai wa ĩthe waku.” Yĩla Yosevu wataviw'e ũtũmani ũsu nĩwaĩie.

18Ĩtina wa ũu, ana-a-ĩthe nĩmookie vala ũĩ na makumana matina nthĩ na ũthyũ mamũnenge ndaĩa na mamwĩa, “Ithyĩ twĩ ngombo syaku.”

19Ĩndĩ Yosevu amea atĩĩ, “Mũikakĩe, nyie ndiũngamĩte vandũ va Ngai! 20Inyw'ĩ mwavangĩte kũmbĩka naĩ, ĩndĩ Ngai endaa kwĩka ũseo kumana na ũndũ ũsu, nĩ kana andũ aingĩ mekale thayũ o tondũ kũilyĩ ũmũnthĩ. 21Kwoou ĩndĩ mũikakĩe, ngamũnengae lĩu vamwe na syana syenyu.” Yosevu nĩwamaĩkĩĩthisye maũndũ asu na ndeto nzeo sya kũkiakisya mathayũ moo.

Kĩkw'ũ kya Yosevu

22Yosevu nĩwaendeeie kwĩkala nthĩ ya Misili e vamwe na andũ ma mũsyĩ wa ĩthe wake. Ekalile thayũ myaka ĩana na ĩkũmi. 23Nĩwekalile thayũ nginya syana sya Evalaimu syakwata nzũkũlũ, na o ta ũu ekala thayũ nginya aea syana sya Makili mwana wa Manase. 24Yosevu nĩweeie ana-a-ĩthe atĩĩ, “Yu ngilĩlye kũkw'a, ĩndĩ kwa w'o Ngai akooka kũmũtethya na kũmũtongoesya mume nthĩ ĩno na kũmũtwaa nthĩ ĩla weevĩtie kũnenga Avalaamu, Isaka, na Yakovo.” 25#Kuma 13.19; Yos 24.32; Aevl 11.22 Nĩvo ĩndĩ Yosevu weeie andũ ma mũsyĩ wa Yakovo mevĩte na kwathana kana yĩla Ngai wĩmatongoesya maume nthĩ ya Misili makakua mwĩĩ wake mathi naw'o. 26Kwoou Yosevu nĩwakw'ĩĩie nthĩ ya Misili e na ũkũũ wa myaka ĩana na ĩkũmi. Nĩmavakie mwĩĩ wake ndawa ndũkoe na mawĩkĩa ĩsandũkũnĩ.

Currently Selected:

Mwa 50: KAMBA

Highlight

Compare

Copy