Mwa 48
48
Yakovo Aiathima Evalaimu na Manase
1Ĩtina wa maũndũ asu, Yosevu nĩwataviw'e kana ĩthe wake nĩ mũwau. Nĩwoosie ana make elĩ Manase na Evalaimu na maendany'a kũla kwĩ Yakovo. 2Yĩla Yakovo wataviw'e kana mwana wake Yosevu nĩwooka kũmwona nĩweeyĩkĩie vinya na ekala nthĩ e kĩtandanĩ. 3#Mwa 28.13-14 Yakovo nĩweeie Yosevu atĩĩ, “Ngai Mwene Ũtonyi W'onthe nĩwambumĩlĩĩle nĩ Lusu nthĩ ya Kanaani na nĩ vau angathima, na ambĩa, 4‘Ngakũnenga syana mbingĩ nĩ kana nzyawa syaku itw'ĩke mbaĩ mbingĩ sya andũ. Nganenga nzyawa syaku nthĩ ĩno yĩthĩwe ng'ũndũ yoo tene na tene.’ ”
5Yakovo nĩwaendeeie na kũneena ayasya atĩĩ, “Yosevu, ana maku elĩ ala wasyaĩwe nĩ mũka waku kũũ nthĩ ya Misili nyie ndanamba kũka kũũ ũĩ nĩ makwa; Evalaimu na Manase nĩ ana makwa o tondũ Lũveni na Simioni nĩ ana makwa. 6Ainae moo onthe nĩmo makethĩwa syana syaku. Isio sya nthĩ ĩla makatiĩwa, ikeethĩwa syĩ sya Evalaimu na Manase ana-a-inyia moo. 7#Mwa 35.16-19 Nĩĩka ũu nũndũ wa Laeli nyinyia waku. Yĩla nasyokete kuma Mesovotamia, Laeli nĩwakw'ĩĩie nthĩ ya Kanaani twĩ vakuvĩ kũvika Evilathi andia na kyeva kĩngĩ. Nĩnamũthikie ũtee wa nzĩa ĩla iendete Evilathi.” Evilathi ũmũnthĩ nĩ yo yĩtawa Mbetheleemu.
8Yĩla Yakovo woonie ana ma Yosevu nĩwakũlilye atĩĩ, “Mo aa naaũ?”
9Yosevu asũngĩa, “Aa nĩ ana makwa ala Ngai wanengie nĩ kũũ Misili.”
Yakovo eea Yosevu, “Maete vaa nĩ kana nĩmaathime.”
10Yakovo aĩ anambĩĩa kwaa metho nũndũ wa ũkũũ wake na kwoou ndoonaa nthĩ nesa. Yosevu nĩwathengeeisye ana asu make vakuvĩ na ĩthe wake. Yakovo nake amakumbatĩlya kĩthũinĩ na amakethya na ngethi ya wendo. 11Yakovo eea Yosevu, “Ndyeekwatasya ũkwona ĩngĩ, ĩndĩ yu Ngai nũnengete mwanya wa ũkwona we vamwe na syana syaku.” 12Yosevu nĩwaumisye ana asu make maunĩ ma ĩthe wake, na akumana kwa ndaĩa atina nthĩ na ũthyũ.
13Yosevu nĩwatheengeeisye ana make vala ve Yakovo, na aia Evalaimu kw'okonĩ kwa aka kwa Yakovo na aia Manase kw'okonĩ kwa aũme kwa Yakovo. 14Ĩndĩ Yakovo nĩwavĩtũkanisye moko na ailĩĩla Evalaimu kw'oko kwake kwa aũme mũtwe o na kau nĩwe waĩ ĩlumaita, na ailĩĩla kw'oko kwake kwa aka ĩũlũ wa mũtwenĩ wa Manase, ũla nĩwe waĩ mũkũũ. 15Nĩvo ĩndĩ waathimie Yosevu na ndeto ii:
“Ngai ũla aaĩthe makwa Avalaamu na Isaka mathũkũmaa,
nĩ aathime anake aa!
Ngai ũla wandongoeisye kuma tene kũvika mũthenya ũũ wa ũmũnthĩ,
nĩ amaathime!
16Mũlaĩka ũla ũmbonoketye kuma mothũkunĩ
onthe nĩ amaathime!
Ĩsyĩtwa yakwa na ya aaĩthe makwa Avalaamu na Isaka,
yĩlilikanawe kwĩsĩla anakenĩ aa!
Nĩmeĩthĩwa na syana, na nzyawa mbingĩ!”
17Yĩla Yosevu woonie ĩthe wake ailĩĩle kw'oko kwake kwa aũme mũtwenĩ wa Evalaimu, nĩweewie woo mũno. Nĩwookĩlilye kw'oko kwa ĩthe wake akwilĩĩle mũtwenĩ wa Manase. 18Nĩweeie Yakovo ĩthe wake atĩĩ, “Aiee, Nau, Manase nĩwe mũkũũ, ilĩĩla kw'oko kwaku kwa aũme mũtwenĩ wake.”
19Ĩndĩ ĩthe wake nĩwaleile na amwĩa, “Nĩnĩsĩ ũu mwana wakwa. Nzyawa sya Manase o nasyo ikatw'ĩka mbaĩ nene ya andũ. Ĩndĩ Evalaimu mũinae akeethĩwa e mũnene kwĩ we na nzyawa syake ikatw'ĩka mbaĩ nene sya andũ.”
20 #
Aevl 11.21
Kwoou Yakovo nĩwaathimie anake asu mũthenya ũsu ayasya atĩĩ,
“Andũ ma Ĩsilaeli makatũmĩaa masyĩtwa menyu
yĩla meũweta ndeto sya kũathima andũ.
Makaneenaa mayasya, ‘Ngai nĩ akwĩke nesa
ta Evalaimu na Manase.’ ”
Kwa nzĩa ĩsu Yakovo nĩwanenevisye Evalaimu kwĩ Manase.
21Nĩvo ĩndĩ Yakovo weeie Yosevu, “Nyie ngilĩlye kũkw'a, ĩndĩ Ngai akamũtongoesya na kũmũtũnga nthĩ ĩla ya aaũmae makwa. 22Yu nĩngũũnenga kĩsio kĩnene kya nthĩ kwĩ ana-a-ĩthe maku kĩla kĩ Sekemu. Kĩsio kĩu nakĩvenanie kuma kwa Aamoli kwa kũmokita na ũvyũ na ũta.”
Currently Selected:
Mwa 48: KAMBA
Highlight
Share
Compare
Copy
Want to have your highlights saved across all your devices? Sign up or sign in
BIBLE SOCIETY OF KENYA © 2011
