Mwa 47

1Kwoou Yosevu nĩwaendie na eea mũsumbĩ atĩĩ, “Ĩthe wakwa na ana-a-ĩthe makwa nĩmooka kuma nthĩ ya Kanaani mena indo syoo, na makakua syĩndũ ila ingĩ syoo syonthe, na yu me kĩsionĩ kya Ngoseni.” 2Yosevu nĩwanyuvie ana-a-ĩthe make atano na amamanyĩthany'a na mũsumbĩ. 3Mũsumbĩ nĩwakũlĩlye ana-a-ĩthe asu ma Yosevu, “Mũtethasya wĩa mwaũ?”

Namo mamũsũngĩa mamwĩa atĩĩ, “Mũnene, ithyĩ athũkũmi maku twĩ aĩthi o ta aaũmae maitũ. 4Twooka kwĩkala kũũ ũeninĩ nũndũ Kanaani kwĩ yũa ĩnene mũno ũkethĩa o na kũyoneka nyeki ya kũĩthya indo sitũ. Kwoou nĩtũũkwĩsũva ũtwĩtĩkĩlye kũtũa kĩsionĩ kya Ngoseni.”

5Nĩvo ĩndĩ mũsumbĩ weeie Yosevu atĩĩ, “Yu nũndũ ĩthe waku na ana-a-ĩthe maku nĩmavika kũũ, 6na wĩ na ũtonyi ĩũlũ wa nthĩ ya Misili yonthe, eka matũe Ngoseni, kĩla nĩkyo kĩseo kĩla kĩseo mũno kya nthĩ ĩno. Ethĩwa katĩ woo ve amwe me na ũtonyi, manenge wĩa wa kũsũvĩaa indo syakwa.”

7Yosevu nĩwaetie ĩthe wake Yakovo kũla kwĩ mũsumbĩ mamanyane. Yakovo nĩwaathimie mũsumbĩ, 8nake mũsumbĩ amũkũlya atĩĩ, “Wĩna ũkũũ wa myaka yĩana ata?”

9Yakovo amũsũngĩa, “Myaka yakwa nĩ ĩana na mĩongo ĩtatũ, na yĩthĩĩtwe myaka ya kũthama kuma vandũ vamwe kũthi vangĩ. Myaka ĩsu yĩthĩĩtwe yĩ mĩnini ĩndĩ yĩ ya mathĩna; ti myaka mingĩ ta ĩla aaũmae makwa mekalile maithama kuma vandũ vamwe kũthi vangĩ.” 10Yakovo aitaanĩsya na mũsumbĩ nĩwamũathimie ĩngĩ na aumaala athi. 11Nĩvo ĩndĩ Yosevu woonisye ĩthe na ana-a-ĩthe vandũ va kũtũa kũu nthĩ ya Misili. Nĩwamanengie kĩsio kĩla kĩseo mũno kya nthĩ ĩsu kĩla kĩ Lamesesi, kwĩanana na ũndũ mũsumbĩ wamwĩaĩĩte. 12Yosevu nĩwanengie ĩthe lĩu, na o ta ũu anenga ana-a-ĩthe make, na andũ ala angĩ onthe ma mũsyĩ wa ĩthe, kwĩanana na ũndũ kĩla ũmwe waĩ na syana syĩana.

Yũa ĩnene Nthĩ ya Misili

13Kwaĩ yũa ĩnene mũno ũkethĩa vai vandũ andũ mona lĩu, na kwoou andũ ma nthĩ ya Misili na ya Kanaani mambĩĩa kwonza nũndũ wa nzaa. 14Andũ ma nthĩ isu nĩmatũmĩie mbesa syoo syonthe maithooa lĩu wa ngetha ya mbaa mbeke. Yosevu nĩwoombanisye mbesa isu na aitwaa kwa mũsumbĩ. 15Yĩla andũ ma Misili na Kanaani matũmĩie mbesa syoo maithooa lĩu syathela, andũ ma Misili nĩmaendie kũla kwĩ Yosevu mamwĩa atĩĩ, “Tũnenge lĩu! Tũtonya ata kũawa nĩ nzaa ũtwene? Nĩtũtũmĩĩte mbesa sitũ ikathela.”

16Yosevu amasũngĩa, “Ethĩwa mbesa syenyu nĩ nthelu, endai mũkaete indo syenyu na nĩngũmũkũanĩsya na lĩu.” 17Kwoou nĩmaendie maete indo syoo kũla kwĩ Yosevu. Nĩwamakũanĩisye lĩu na mbalasi, mbũi, malondu, ng'ombe na mang'oi. Mwakanĩ ũsu, Yosevu nĩwamanengie lĩu namo mamũkũanĩsya na indo syoo syonthe.

18Mwakanĩ ũla waatĩĩe, nĩmaendie ĩngĩ vala ve Yosevu na mamwĩa atĩĩ, “Mũnene tũikũvitha kana mbesa sitũ nĩ nthelu, na indo sitũ nitw'ĩkĩte syaku. Vai kĩndũ kĩtialĩte tũtonya ũkũetee, ate o twĩnengane ithyĩ ene kũla ũĩ vamwe na nthĩ yaitũ. 19Tũtonya ata kũawa nĩ nzaa na kũtia mĩũnda yaitũ ũtwene? Tũnenge lĩu na ũitwosa vamwe na mĩũnda yaitũ. Nĩtũkwĩtĩkĩla kũtw'ĩka ngombo sya mũsumbĩ na mĩũnda yaitũ ĩitw'ĩka yake. Tũnenge lĩu tũikoawe nĩ nzaa na ũitũnenga mbeũ tũvande mĩũnda yaitũ ndĩkatw'ĩke itheka.”

20Kwoou Yosevu nĩwathooie itheka syonthe sya andũ ma nthĩ ya Misili syatw'ĩka sya mũsumbĩ, nũndũ yũa yĩla yaĩ nthĩ ĩsu yaĩ ĩnene mũno na kwoou nĩyatumie andũ ma Misili onthe mathoosya itheka syoo. Itheka syonthe nĩsyatw'ĩkie sya mũsumbĩ. 21Yosevu nĩwatw'ĩkĩthisye andũ ma nthĩ ya Misili ngombo, kuma ngalĩko ĩmwe ya nthĩ ĩsu kũthi ĩla ĩngĩ. 22Itheka ila Yosevu ũtaathooa no ila sya athembi. Athembi mayaĩ na vata wa kũthoosya itheka syoo nũndũ mũsumbĩ nĩwamanengae syĩndũ sya kũtũmĩa na kwoou mayaathoosya itheka syoo. 23Nĩvo ĩndĩ Yosevu weeie andũ atĩĩ, “Ĩthukĩĩsyei, yu nyie nĩnĩmũthooete mũkatw'ĩka ma mũsumbĩ na o ta ũu nĩnĩthooete itheka syenyu ikatw'ĩka syake. Kwoou ĩndĩ kwatai mbeũ mũthi mũkavande mĩũndanĩ yenyu. 24Ĩvindanĩ ya ngetha no nginya mũnengae mũsumbĩ kĩlungu kĩmwe kya itano kya ngetha yenyu. Ngetha ĩla ĩngĩ ĩkeethĩawa yĩ yenyu mwĩthĩwe na mbeũ na lĩu kwondũ wenyu na andũ ma mĩsyĩ yenyu.”

25Nĩmamwĩie atĩĩ, “Nĩwatangĩĩa mathayũ maitũ. Mũnene nĩwĩthĩĩtwe wĩ mũseo kwitũ; ithyĩ nĩtũũtw'ĩka ngombo sya mũsumbĩ.” 26Kwoou Yosevu nĩwatw'ĩkĩthisye ũndũ ũsu mwĩao wa nthĩ ya Misili kana kĩlungu kĩmwe kya itano kya ngetha yonthe kĩkeethĩawa kya mũsumbĩ. Mwĩao ũsu wĩ o vo kũvika ũmũnthĩ. No itheka sya athembi syoka itaatw'ĩka sya mũsumbĩ.

Kwĩyĩaa kwa Mũminũkĩlyo kwa Yakovo

27Andũ ma Ĩsilaeli nĩmatũie nthĩ ya Misili, kĩsionĩ kya Ngoseni. Nĩmakwatie ũthwii mwingĩ me vau na masyaana maingĩva mũno. 28Yakovo nĩwekalile nthĩ ya Misili myaka ĩkũmi na mũonza. Kwoou myaka yonthe ya thayũ wake yaĩ ĩana na mĩongo ĩna na mũonza. 29#Mwa 49.29-32; 50.6 Yĩla ĩvinda yake ya kũkw'a yathengeeie, Yakovo nĩweetie Yosevu na amwĩa, “Ethĩwa kwa w'o nũmbendete, ĩkĩa kw'oko kwaku katĩ wa maũũ makwa na ũyĩvĩta kana nũũmbĩka nesa na kwĩthĩwa wĩ mũĩkĩĩku kwakwa. Ndũkaanthike kũũ nthĩ ya Misili. 30Nĩenda nĩthikwa vala aaũmae makwa mathikĩtwe; wĩngua kuma nthĩ ya Misili ũkanthike vala mathikĩtwe.”

Yosevu amwĩa, “Ngeeka kwĩanana na ũndũ wasya.”

31Yakovo amwĩa atĩĩ, “Ĩvĩte kana ũkeeka ũu.” Yosevu nĩweevĩtie, na Yakovo atũnga mũvea e o kĩtandanĩ.

Currently Selected:

Mwa 47: KAMBA

Highlight

Compare

Copy