Mwa 46

Yakovo na Andũ make Maithi Misili

1Yakovo nĩwoombanisye syĩndũ syake syonthe na ambĩĩa kyalo. Yĩla wavikie Mbeeli-sieva nĩwamũthembeie Ngai wa ĩthe wake Isaka. 2Ngai nĩwaneenie nake ũtukũ woninĩ amwĩta, “Yakovo, Yakovo!”

Yakovo eetĩka, “Ĩĩ ninyioo.”

3Nake Ngai amwĩa atĩĩ, “Ninyie Ngai, Ngai wa ĩthe waku. Ndũkakĩe kũthi nthĩ ya Misili, nũndũ ngatw'ĩkĩthya nzyawa syaku mbaĩ nene ya andũ kũu Misili. 4Ngaendany'a naku nthĩ ya Misili, na ngatũnga nzyawa syaku nthĩ ĩno ya Kanaani. Yosevu akeethĩwa vakuvĩ naku ũikw'a.”

5Nĩvo ĩndĩ Yakovo waumie Mbeeli-sieva. Ana make nĩmatũlile makasyanĩ ala mũsumbĩ wanenganĩte makamakue e na syana syoo, na iveti syoo. 6#Meko 7.15 Nĩmaingie indo syoo, na makua syĩndũ syoo ila makwatĩte me nthĩ ya Kanaani, na mathi nthĩ ya Misili. Yakovo nĩwaendanisye na nzyawa syake syonthe: 7ana make na eĩtu make, esũkũũe make onthe aũme na eĩtu.

8Aa nĩmo andũ ma mũsyĩ wa Ĩsilaeli ala waendanisye namo nthĩ ya Misili: Lũveni mwana wake ũla mũkũũ. 9Ana ma Lũveni maĩ Anoki, Valu, Esiloni na Kalimi. 10Simioni na ana make ala nĩmo Yamueli, Yamini, Oati, Yakini, Nzoali na Sauli mwana wa mũndũ mũka Mũkanaani. 11Livai na ana make ala nĩmo Ngelisoni, Koathi na Melali. 12Yuta na ana make ala nĩmo Siela, Velesi na Nzela. Yuta aĩ na ana angĩ elĩ: Eeli na Onani, ala makw'ĩĩe nthĩ ya Kanaani. Ana ma Velesi maĩ Esiloni na Amuli. 13Isakali na ana make ala nĩmo Tola, Vuva, Yasuvu na Similoni. 14Nzevuluni na ana make ala nĩmo Seletu, Eloni na Yaleeli. 15Asu nĩmo ana ma Lea ala wasyaĩie Yakovo me nthĩ ya Mesovotamia, tũteũtala Ndina mwĩĩtu wake. Nzyawa syonthe sya Yakovo ila syaumanĩte na Lea syaĩ mĩongo ĩtatũ na itatũ.

16Ngandi na ana make ala nĩmo Nzevoni, Aki, Suni, Esivoni, Eeli, Aloti na Aleli. 17Aseli na ana make ala nĩmo Imina, Isiva, Isivi, Mbelia na Selaa mwĩĩtu-a-inyia woo. Ana ma Mbelia maĩ Eeveli na Malikieli. 18Andũ asu me ĩkũmi na thanthatũ nĩmo nzyawa sya Yakovo ila wasyaĩwe nĩ Nziliva. Nziliva aĩ mũthũkũmi mũndũ mũka ũla Lavani wanengete mwĩĩtu wake Lea.

19Laeli mũka wa Yakovo aĩ na ana elĩ ala nĩmo Yosevu na Mbengyameni. 20#Mwa 41.50-52 Yosevu e nthĩ ya Misili nĩwasyaĩwe ana elĩ nĩ Asenathi mwĩĩtu wa Votivela, mũthembi wa Oni. Ana asu maĩ Manase na Evalaimu. 21Mbengyameni na ana make ala nĩmo Mbela, Mbekeli, Asiveli, Ngela, Naamani, Ei, Lose, Mũvimu, Ũvimu, na Aliti. 22Andũ asu ĩkũmi na ana maĩ nzyawa sya Yakovo kumana na Laeli mũka wake.

23Ndani na mwana wake Ũsimũ. 24Navutalĩ na ana make ala nĩmo Yaseeli, Nguni, Yeseli na Silemu. 25Andũ asu me mũonza nĩmo nzyawa sya Yakovo ala wasyaĩwe nĩ Mbila mũthũkũmi mũndũ mũka ũla Lavani wanengie mwĩĩtu wake Laeli.

26Andũ onthe ala maendanisye na Yakovo nthĩ ya Misili, ala wasyaĩte we mwene, maĩ mĩongo thanthatũ na thanthatũ, tũteũtala iveti sya ana make. 27#Meko 7.14 Andũ onthe ma mũsyĩ wa Yakovo ala maendie nthĩ ya Misili maĩ mĩongo mũonza, twongelete ana elĩ ma Yosevu ala masyaĩwe nthĩ ya Misili. #46.27 Maandĩko amwe ma tene ma Ndeto ya Ngai maĩtye mĩongo mũonza na atano.

Yakovo na Andũ ma Mũsyĩ wake me Misili

28Yakovo nĩwatũmie Yuta aende mbee woo nĩ kana akakũlye Yosevu oke akomanĩe namo Ngoseni. Yĩla Yakovo na andũ make mavikie Ngoseni, 29Yosevu nĩwatũlile ĩkasyanĩ yake na athi vo akakomane na ĩthe wake. Yĩla makomanie, Yosevu nĩwakumbatĩlye ĩthe wake kĩthũinĩ na aĩa vandũ va ĩvinda ĩasa. 30Ĩsilaeli nĩweeie Yosevu atĩĩ, “Yu o na ngakw'a vau ũndũ, nũndũ nĩnakwona na namanya kana wĩ o thayũ.”

31Nĩvo ĩndĩ Yosevu weeie ana-a-ĩthe na andũ ala angĩ ma mũsyĩ wa ĩthe wake atĩĩ, “Nĩngũthi nganeene na mũsumbĩ na ngĩmwĩa, ‘Ana-a-ĩthe makwa na andũ onthe ma mũsyĩ wa ĩthe wakwa, ala matũaa nthĩ ya Kanaani nĩmooka kũũ nĩĩ.’ 32O ta ũu nĩngũmũtavya kana inyw'ĩ mwĩ aĩthi, wĩa wenyu nĩ kũsũvĩa indo, na mwooka mũingĩte malondu, mbũi na ng'ombe syenyu, na mũkakua syĩndũ ila ingĩ syenyu syonthe. 33Yĩla mũsumbĩ ũkũmũtũmana mũthi kwake na aimũkũlya mũtethasya wĩa mwaũ, 34mũtavyei kana mwĩthĩĩtwe mwĩ aĩthi ma indo kuma tene, o tondũ aaũmae menyu meekaa. Mwamũtavya ũu, nũkũmwĩtĩkĩlya mũtũe kĩsionĩ kya Ngoseni.” Yosevu ameie masye ũu nũndũ andũ ma nthĩ ya Misili mayendete kwĩkalany'a na aĩthi.

Currently Selected:

Mwa 46: KAMBA

Highlight

Compare

Copy