Mwa 45

Yosevu Ayĩmanyĩthya kũla kwĩ ana-a-ĩthe

1 # Meko 7.13 Yosevu nĩwaemiwe nĩ kwĩyũmĩĩsya e mbee wa athũkũmi make. Kwoou nĩwameaĩie onthe maumaale. Vai ũmwe woo waatiwa vau yĩla Yosevu watavisye ana-a-ĩthe nĩwe ũũ. 2Nĩwaĩie na wasya mũnene nginya andũ ma Misili meew'a ayĩĩa, na mathi matavany'a ũvoo ũsu nyũmbanĩ kwa mũsumbĩ. 3Yosevu nĩweeie ana-a-ĩthe atĩĩ, “Ninyie Yosevu! Ĩthe wakwa e o thayũ?” Ĩndĩ ana-a-ĩthe mayaĩ matonya kũmũsũngĩa nũndũ nĩmatelemete me mbee wake. 4Yosevu nĩwameie atĩĩ, “Nĩngũmwĩsũva mũthengee vaa nĩĩ.” Nĩmathengeeie vala ũĩ na amea, “Ninyie mwana-a-ĩthe wenyu Yosevu, ũla mwathooisye nthĩ ya Misili! 5Yu ĩndĩ mũikethĩwe na kyeva kana kwĩmena nũndũ wa kũnthoosya kũũ, nũndũ Ngai endie nũke kũũ mbee wenyu nĩ kana nĩtangĩĩe mathayũ ma andũ. 6Kwĩthĩĩtwe yũa kũũ nthĩ ĩno vandũ va myaka ĩlĩ, na vandũ va myaka ĩngĩ ĩtano yũkĩte kũyĩĩthĩwa nĩma kana ngetha. 7Ngai nĩwandũmie nũke kũũ mbee wenyu nĩ kana nĩmũvonokye kwa nzĩa ĩno ya ũseng'yo, nĩ kana wĩthĩe inyw'ĩ na nzyawa syenyu mũinakw'a. 8Kwoou kwa w'o ti inyw'ĩ mwandũmie kũũ ĩndĩ nĩ Ngai. Nũndw'ĩkĩthĩtye mũtai ũla mũnene wa mũsumbĩ. Ninyie nĩũngamĩe nyũmba ya mũsumbĩ, na ninyie mũnene wa andũ onthe ma nthĩ ya Misili.

9 # Meko 7.14 “Yu endai mwĩkalaatĩte kũla kwĩ nau na mũimwĩa nyie Yosevu mwana wake nĩmwĩa: ‘Ngai nũndw'ĩkĩthĩtye mũnene wa nthĩ yonthe ya Misili, kwoou ũka kũũ nĩĩ o na ndũkekalange. 10Ũkatũa kĩsionĩ kya Ngoseni na kwĩthĩawa wĩ vakuvĩ nakwa. Ũkatũa vau wĩ na syana syaku na esũkũũu, mbũi na malondu, ng'ombe na syĩndũ ila ingĩ syaku syonthe. 11Ngakũsũvĩaa wĩ vau Ngoseni nũndũ ve myaka ĩngĩ ĩtano ya yũa ĩtiele na ndikwenda we na andũ maku na indo syaku mũnyivĩwa.’ ”

12Yosevu nĩwaendeeie kũneena na ana-a-ĩthe ayasya atĩĩ, “Yu inyw'onthe, o naku mwana-a-mwaitũ Mbengyameni, nĩmũkwona kana kwa w'o ninyie Yosevu. 13No nginya mũkatavye nau ũndũ nĩnengetwe ndaĩa yĩana kũũ nthĩ ya Misili na mũimũtavya maũndũ onthe ala mwonete. Ĩkalaatei mũthi mũkamũete kũũ.”

14Yosevu nĩwakumbatĩlye mwana-a-inyia Mbengyameni kĩthũinĩ na elĩ mambĩĩa kũĩa. 15O aendee kũĩa, Yosevu nĩwakumbatĩlye kĩla ũmwe wa ana-a-ĩthe kĩthũinĩ na amakethya na ngethi ya wendo. Ĩtina wa ũu ana-a-ĩthe nĩmambĩĩie kũea ngewa nake.

16Yĩla ũvoo ũsu wavikie nyũmba kwa mũsumbĩ kana ana-a-ĩthe ma Yosevu nĩmokie, mũsumbĩ e na anini make nĩmatanie. 17Mũsumbĩ nĩweeie Yosevu atĩĩ, “Tavya ana-a-ĩthe maku nĩmatũlye mĩio nyamũnĩ syoo na maisyoka nthĩ ya Kanaani, 18makokany'e kũũ na ĩthe woo na andũ moo. Nyie ngamanenga kĩsio kĩla kĩseo vyũ kya nthĩ ya Misili, na makaĩsaa lĩu ũla mũseo mũno wa nthĩ ĩno. 19O ta ũu tavya ana-a-ĩthe maku mose makasya amwe kuma kũũ Misili ma kũkua iveti syoo, na syana syoo na mayũkany'a na ĩthe woo. 20Maikamakw'e nĩ syĩndũ syoo ila metia nthĩ ya Kanaani, nĩkwĩthĩwa syĩndũ ila nzeo vyũ sya nthĩ yonthe ya Misili ikeethĩawa syĩ syoo.”

21Ana ma Ĩsilaeli nĩmeekie maũndũ onthe ala mataviw'e. Yosevu nĩwamanengie makasya o tondũ mũsumbĩ weeaĩte, na asyoka amanenga lĩu wa kũya me kyalonĩ. 22Nĩwanengie kĩla ũmwe woo ngũa ya ũkũany'a, ĩndĩ anenga Mbengyameni silĩva wĩna ũito wa kĩlo itatũ na nyusu na ngũa itano sya ũkũany'a. 23Yosevu nĩwamanengie syĩndũ ii matwaĩe ĩthe: Mang'oi ĩkũmi makuĩte syĩndũ ila nzeo vyũ kuma nthĩ ya Misili, na mang'oi angĩ maka ĩkũmi makuĩte lĩu wa mbaa mbeke, mĩkate, na lĩu wa mĩthemba ĩngĩ nĩ kana ĩthe woo aĩsae e kyalonĩ. 24Nĩwatianĩie ũvoo na ana-a-ĩthe na maitaanĩsya amea, “Mũikatetanĩsye nzĩanĩ.”

25Kwoou nĩmaumie nthĩ ya Misili masyoka Kanaani kwa ĩthe woo Yakovo. 26Nĩmeeie ĩthe woo atĩĩ, “Yosevu e o thayũ; kwa w'o ki nĩwe mũnene wa nthĩ ya Misili!” Yakovo nĩwatelemile mũno nĩ ndeto isu na ndaamaĩkĩĩa.

27Ĩndĩ yĩla mamũtavisye maũndũ onthe ala Yosevu wamatavĩtye, na oona makasya ala Yosevu watũmanĩte moke kũmũkua, Yakovo nĩwakwatie vinya ĩngĩ. 28Nĩwaneenie asya atĩĩ, “Yu nĩnaĩkĩĩa kana Yosevu mwana wakwa e o thayũ! Nĩngũthi Misili ngamwone ndanamba kũkw'a.”

Currently Selected:

Mwa 45: KAMBA

Highlight

Compare

Copy