Mwa 44

Kĩkombe kya Yosevu Kĩyĩkĩwa Ĩkunianĩ ya Mbengyameni

1Yosevu nĩweeaĩie mũngamĩi wa nyũmba yake amwĩa atĩĩ, “Ĩkĩa makunia ma aũme asu lĩu mwingĩ kwĩanana na ũndũ matonya kũkua na ũyĩkĩa mbesa sya kĩla ũmwe woo ĩkunianĩ yake. 2Osa kĩla kĩkombe kyakwa kya silĩva wĩkĩe ĩkunianĩ ya ũla mũnini vamwe na mbesa syake sya kũthooa lĩu.” Mũũngamĩi ũsu wa nyũmba nĩweekie ũndũ Yosevu wamwĩie. 3Ũnĩ ũsu kĩoko tene ana-a-ĩthe ma Yosevu nĩmanengiwe mwanya wa kwambĩĩa kyalo kya kwĩnũka vamwe na mang'oi moo. 4Yĩla mambĩĩie kyalo, matanathi mũendo mũasa kuma ndũanĩ, Yosevu nĩweeie mũũngamĩi wa nyũmba yake atĩĩ, “Ũkĩla ũatĩĩe aũme asu na wamakwata ũimea, ‘Mweeka ũndũ ũthũkĩte ũu nĩkĩ ĩtina wa kwĩkwa nesa? 5Mwooya kĩkombe kya mũnene wakwa nĩkĩ? Nĩkyo ũnyusaa nakyo na nokyo wathanaa nakyo. Yĩu nĩ ĩvĩtyo ĩthũku mũno mweeka!’ ”

6Yĩla mũũngamĩi ũsu wa nyũmba ya Yosevu waendie amakwata, nĩwamatavisye ndeto isu. 7Nĩmamwĩie atĩĩ, “Mũnene, wĩneena ndeto iilyĩ ũu nĩkĩ? Ithyĩ athũkũmi maku tũyĩsa kwĩka ũndũ ta ũsu.” 8Sisya, mbesa ila tweethĩie mĩnukanĩ ya makunia nĩtũnaitũngie kwaku kuma nthĩ ya Kanaani; kũtonyeka ata ĩndĩ kwitũ kũya silĩva kana thaavu kuma nyũmba ya mũnene waku?

9Ethĩwa ũmwe waitũ ithyĩ athũkũmi maku nũkwĩthĩwa e na kĩkombe kĩu, nĩoawe; na ala angĩ maitũ tũitw'ĩka ngombo syaku we mũnene waitũ.

10Nĩwameie atĩĩ, “Nĩkwĩthĩwe kwĩanana na ũndũ mwasya: Ũla ũkwĩthĩwa na kĩkombe kĩu nũkũtw'ĩka ngombo yakwa na ala angĩ menyu maitalĩlwa ĩvĩtyo.” 11Kĩla ũmwe woo nĩwaũie ĩkunia yake mĩtũkĩ na ayĩthasya. 12Mũũngamĩi ũsu nĩwambĩĩie kũkĩmantha ambĩlĩĩlye na ĩkunia ya ũla mũkũũ nginya ya ũla mũnini. Nĩweethĩie kĩkombe kĩu ĩkunianĩ ya Mbengyameni. 13Andũ asu nĩmatembũangie ngũa syoo nĩ kyeva, matũlya mĩio yoo mang'oinĩ, na masyoka ndũanĩ.

14Yĩla Yuta na ana-a-ĩthe mavikie nyũmba kwa Yosevu mamwĩthĩie e o vo. Nĩmakumanie matina nthĩ na ũthyũ mbee wake mamũnenge ndaĩa. 15Yosevu nĩwamakũlilye atĩĩ, “Ũũ nĩ ũndũ mwaũ mwĩkie? No mwĩĩsĩ kana mũndũ wa mũthemba wakwa nũtonya kwathana maũndũ?”

16Yuta nĩweeie Yosevu atĩĩ, “Mũnene wakwa, ithyĩ tũtonya kũkwĩa ata yu? Twĩasya ata? Tũtonya ata kũĩkĩĩthya kana ithyĩ tũi na ĩvĩtyo. Ngai nĩwaumĩlya ĩvĩtyo yitũ ithyĩ athũkũmi maku. Sisya, mũnene wakwa ithyĩ yu twĩ ngombo syaku, ithyĩ o vamwe na ũla weethĩwa e na kĩkombe kyaku.”

17Ĩndĩ Yosevu asya, “Ai, aiee! Nditonya kwĩka ũu. No ũla weethĩwa na kĩkombe ũkũtw'ĩka ngombo yakwa. Ala angĩ menyu nĩmũtonya kũthi na ũseo mũsyoke kwa ĩthe wenyu.”

Yuta Ayĩsũva Yosevu Alekye Mbengyameni

18Yuta nĩwaendie vakuvĩ na Yosevu na amwĩa atĩĩ, “Ame mũnene wakwa, mbĩtĩkĩlye nĩneene naku ndeto nini. Ndũkanthatĩe nyie Mũthũkũmi waku; we no ta mũsumbĩ mwene. 19Mũnene wakwa, nĩwatũkũlilye ithyĩ athũkũmi maku kana ĩthe waitũ e o thayũ na kana twĩ mwana-a-ĩthe ũngĩ. 20Nĩtwakũsũngĩie twakwĩa, ‘Ĩthe waitũ nĩ mũtumĩa mũkũũ na e o thayũ, na e mwana mũnini ũla ũnasyaĩwe e mũkũũ. Mwana-a-inyia wa mwana ũsu nĩwakwie, na nowe e weka ũtialĩte katĩ wa syana sya inyia wake, na ĩthe wake nũmwendete mũno.’ 21Watwĩie ithyĩ athũkũmi maku, ‘Endai mũkamũete kũũ nĩĩ nĩmwone.’ 22Naitũ mũnene wakwa twakĩa, ‘Kĩmwana kĩu kĩitonya kũtia ĩthe nũndũ ethĩwa nĩkĩũmũtia nũkũkw'a.’ 23Naku watwĩa ithyĩ athũkũmi maku, ‘Mũikaaũke mbee wakwa mwana-a-ĩthe wenyu ate vamwe nenyu.’

24“Yĩla twasyokie kũla kwĩ ĩthe waitũ nĩtwamũtavisye ũndũ we mũnene waitũ waisye. 25Yĩla ĩthe waitũ watwĩie tũsyoke kũũ ĩngĩ tũke kũthooa lĩu ũngĩ, 26nĩtwamũsũngĩie twamwĩa atĩĩ, ‘Tũitonya kũthi kũu; ĩndĩ ethĩwa mwana-a-ĩthe waitũ nũkũendany'a naitũ, nĩtũũthi, nĩkwĩthĩwa tũitonya kũthi mbee wa mũnene ũsu wa Misili mwana-a-ĩthe waitũ ũla mũnini ate vamwe naitũ.’ 27Ĩthe waitũ nĩwatwĩie atĩĩ, ‘Inyw'ĩ nĩmwĩsĩ kana mũka wakwa anzyaĩe ana elĩ. 28Ũmwe woo nĩwaendie andia na no nginya ethĩwe atembũangiwe nĩ nyamũ mbai, nũndũ ndyaamwona ĩngĩ kuma ĩvinda yĩu. 29Ethĩwa nĩmũkwosa ũyũ ũngĩ o nake kuma vala nĩĩ, na ũndũ ũthũku ũimũkwata, nyie nĩ mũkũũ na kyeva kĩla mũũndetee nokĩmbũae.’

30“Thayũ wa ĩthe waitũ mũthũkũmi waku wĩ nthĩnĩ wa mwanake ũũ. Kwoou yĩla ngũsyoka vala ve ĩthe wakwa nde na mwanake ũũ, 31na ayona kana nde vamwe naitũ nũkũthi kũkw'a. Ithyĩ athũkũmi maku tũkatuma ĩthe waitũ ũla nĩ mũtumĩa mũkũũ akw'a nĩ kyeva. 32Nyie mũthũkũmi waku nĩnathie ĩthe wakwa kũsũvĩa mwanake ũũ, na nasya ninyie waĩlĩte ũkũlya ũndũ w'onthe ĩũlũ wake na namwĩa kana ethĩwa ndikamũtũnga kũla ũĩ e mũima, ninyie nĩtalĩlawa ĩvĩtyo mbee wa ĩthe wakwa thayũnĩ wakwa w'onthe. 33Kwoou yu we mũnene wakwa, nĩngũkwĩsũva ũmbĩtĩkĩlye nyie mũthũkũmi waku nĩtiwe na ngĩtw'ĩka ngombo yaku vandũ va mwanake ũũ na ũiekana nake enũkany'e na ana-a-ĩthe. 34Ndonya ata nyie kũsyoka kũla kwĩ ĩthe wakwa nde vamwe na mwanake ũũ? Nĩngũkĩa kwona mathĩna ala matonya kũkwata ĩthe wakwa.”

Currently Selected:

Mwa 44: KAMBA

Highlight

Compare

Copy