Mwa 43

Ana-a-ĩthe ma Yosevu Maisyoka Misili me na Mbengyameni

1Yũa nĩyaendeeie kwingĩva nthĩ ya Kanaani. 2Kwoou yĩla andũ ma mũsyĩ wa Yakovo maĩe lĩu ũla maumĩtye nthĩ ya Misili wathela, Yakovo nĩweeie ana make atĩĩ, “Endai ĩngĩ nthĩ ya Misili mũkathooe lĩu ũngĩ mũtũetee.”

3Yuta nĩweeie ĩthe wake atĩĩ, “Ũla mũndũ nĩwatũkanisye na vinya atwĩa, ‘Mũikaaũke mbee wakwa ĩngĩ mũte na mwana-a-ĩthe wenyu.’ 4Ethĩwa nũkwĩtĩkĩla tũendany'e na mwana-a-ĩthe waitũ, nĩtũũthi kũthooa lĩu tũmũetee. 5Ĩndĩ walea kwĩtĩkĩla aendany'e naitũ, tũithi nũndũ mũndũ ũsu nĩwatwĩie tũikaathi mbee wake tũte na mwana-a-ĩthe waitũ.”

6Ĩsilaeli amakũlya atĩĩ, “Mũnambĩkaa ũndũ ũthũkĩte ũu nĩkĩ, kwĩa mũndũ ũsu kana mwĩ mwana-a-ĩthe ũngĩ?” 7Nĩmamũsũngĩie mamwĩa, “Mũndũ ũsu atũkũlilye mũno makũlyo matũkonetye ithyĩ na mũsyĩ witũ ayasya, ‘Ĩthe wenyu eo thayũ? Mwĩ mwana-a-ĩthe ũngĩ?’ Ithyĩ tweekaa o kũmũsũngĩa makũlyo make. Twesaa kũmanya ata kana nũkwĩsa ũtwĩa, ‘Endai mũkaete mwana-a-ĩthe ũsu wenyu kũũ?’ ”

8Yuta nĩweeie ĩthe wake Ĩsilaeli atĩĩ, “Mbĩtĩkĩlye niendany'e na Mbengyameni, na nĩtũũthi oyu tũkathooe lĩu nĩ kana ithyĩ, naku, na syana sitũ tũikakw'e nĩ nzaa. 9Nyie mwene nĩngũkwatha kana nĩngũmũsũvĩa, na ninyie wĩkũlya ũndũ w'onthe ĩũlũ wake. Ethĩwa ndikamũtũnga kũla ũĩ e mũima, ninyie wĩtalĩlaa ĩvĩtyo yĩu ĩvindanĩ yonthe ya thayũ wakwa. 10Kethĩwa tũyĩkalĩte ĩvinda ĩasa tũtasyoka Misili twĩthĩwa tũendete na kũsyokanĩsya kelĩ kw'o.”

11Ĩthe woo Yakovo amea atĩĩ, “Ethĩwa vai ũndũ ũngĩ kwĩkwa, ĩkai ũũ: Osai mosyao ala maseo vyũ ma nthĩ ya Kanaani mwĩkĩe mĩvukonĩ yenyu na mũitwaĩa mũndũ ũsu ta mũthĩnzĩo. Kuai ũkĩ wa nzũkĩ, syĩndũ sya kũsamya lĩu nesa na ila inyungaa nesa, na ngii iĩsawa. 12Kuai kũndũ kwĩlĩ kwa mbesa ila mũnakuĩte, nĩkwĩthĩwa no nginya mũtũnge mbesa ila ineekĩĩtwe mĩnukanĩ ya makunia menyu. Nĩkũtonyeka ũkethĩa ineekĩiwe kwa mavĩtyo. 13O ta ũu osai mwana-a-ĩthe wenyu Mbengyameni, na mũithi ĩngĩ nthĩ ya Misili kwa mũndũ ũsu. 14Ngai Mwene Ũtonyi W'onthe nĩatume mũndũ ũsu amwĩw'ĩa tei, na aimũnenga Simioni na Mbengyameni mũsyokany'e namo. Ngalĩkonĩ ĩla yakwa, ethĩwa no nginya nasye syana syakwa, nasye.”

15Kwoou ana ma Yakovo nĩmoosie mĩthĩnzĩo, kũndũ kwĩlĩ kwa mbesa ila makuĩte mbeenĩ, na o ta ũu moosa Mbengyameni. Nĩmambĩĩie kyalo mathi nthĩ ya Misili na maũngama mbee wa Yosevu. 16Yĩla Yosevu woonie Mbengyameni e vamwe na ana-a-ĩthe, nĩweeie mũthũkũmi ũla waũngamĩe nyũmba yake atĩĩ, “Twaa andũ aa nyũmba kwakwa. Nĩngũka kũĩsanĩa namo lĩu wa mũthenya, kwoou thĩnza nyamũ na ũyĩua nyama syayo.”

17Mũthũkũmi ũsu nĩweekie kwĩanana na ũndũ Yosevu wamwĩaĩie, na atwaa andũ asu nyũmba kwa Yosevu.

18Yĩla maendete matwaĩtwe nyũmba kwa Yosevu, nĩmakwatiwe nĩ w'ĩa na maneena mayasya atĩĩ, “Tũtwaĩtwe vaya nũndũ wa mbesa ila syatũngĩiwe makunianĩ maitũ ĩvindanĩ yĩla twookie kũũ ya mbee. Mũndũ ũũ eenda kũtũtalĩla mavĩtyo, atũvũe na aitũtw'ĩkĩthya ngombo, na kwosa mang'oi maitũ.” 19Mavika mũomonĩ wa nyũmba ya Yosevu, nĩmaneenie na mũũngamĩi wa nyũmba ĩsu 20mamwĩa atĩĩ, “Mwa mũnene, nĩtwookie kũũ nthĩ ya Misili ĩvinda yĩngĩ kũthooa lĩu. 21Na yĩla twaumie vaa, nĩtwakomele vandũ twĩ nzĩanĩ. Nĩtwavingũie makunia na kĩla ũmwe waitũ eethĩa mbesa syake syonthe syĩkĩĩtwe mũnukanĩ wa ĩkunia yake. Kwoou nĩtwakũetee mbesa isu. 22Nĩtwooka tũkuĩte mbesa ingĩ sya kũthooa lĩu ũngĩ. Ithyĩ tũyĩsĩ mbesa ila ingĩ syeekĩiwe makunianĩ maitũ nũũ.”

23Mũũngamĩi ũsu wa nyũmba ya Yosevu amea, “Mũikamake o na mũikethĩwe na w'ĩa. Ngai wenyu ũla nĩ Ngai wa ĩthe wenyu no nginya wĩthĩe nĩwe weekĩie mbesa isu makunianĩ menyu. Nyie nĩnoosie mbesa ila mwanengie.” Mũũngamĩi ũsu nĩwaendie aete Simioni vala maĩ.

24Mũũngamĩi ũsu nĩwalikilye andũ asu nyũmba kwa Yosevu, amanenga kĩw'ũ mathamba maũũ, na anenga mang'oi moo lĩu. 25Nĩmoombanisye ĩla mĩthĩnzĩo ya Yosevu mamũnenge ooka kũya lĩu wa mũthenya nũndũ nĩmatavĩtw'e kana nĩmekwĩsa kũĩsanĩa nake. 26Yĩla Yosevu wavikie mũsyĩ, nĩmamũnengie mĩthĩnzĩo ĩla mookĩte nayo makamĩlikya nyũmba. Nĩvo ĩndĩ makumanie matina nthĩ na ũthyũ mbee wake mamũnenge ndaĩa. 27Nĩwamakũlilye ũndũ matwĩe na asyoka amakũlya atĩĩ, “Ĩthe wenyu no mũseo, ũla mũtumĩa mũkũũ mwandavasya ũvoo wake, na e o thayũ?”

28Nĩmamwĩie atĩĩ, “Mũthũkũmi waku ĩthe waitũ nĩ mũseo na e o thayũ.” Nĩmakumanie mamũnenga ndaĩa.

29Yosevu nĩwamasyaisye na oona mwana-a-inyia Mbengyameni. Nĩwamakũlilye atĩĩ, “Ũũ nĩwe mwana-a-ĩthe wenyu ũla mũnini mũnandavasya ũvoo wake?” Na vau asya, “Ngai nĩakwĩke nesa mwanake.” 30Yosevu nĩwaumaalile ekalaatĩte nĩkwĩthĩwa aĩ na mea ma kwona mwana-a-inyia na athi vandũ akaĩe. Nĩwaendie alika nyũmbanĩ yake ya nthĩnĩ na aĩa e vo. 31Nĩwathambie ũthyũ na aumaala ooka vala maĩ eyumĩĩsye na eeaĩa athũkũmi make maete lĩu. 32Nĩmanengie Yosevu lĩu mesanĩ aya e weka, na ana-a-ĩthe make maya me oka mesanĩ yoo. Andũ ma Misili ala maĩ vau manengiwe lĩu maya me oka, nũndũ Amisili mayaĩsanĩaa na Ayuti, nĩkwĩthĩwa moonaa kũĩsanĩa na Ayuti wĩ ũndũ ũtaĩlĩte.

33Ana-a-ĩthe ma Yosevu mekalile nthĩ mesanĩ masyaĩtye kũla ũĩ, maatĩanĩe kuma ũla mũkũũ kũvika ũla mũnini. Yĩla moonie ũndũ mekala nthĩ mailyĩ, nĩmasianisye maseng'ete mũno. 34Nĩmevũĩiwe lĩu kuma mesanĩ ya Yosevu, na Mbengyameni eekĩwa kũndũ kũtano kwa lĩu ũla weekĩiwe ala angĩ. Kwoou nĩmaĩe, manyw'a, na matana vamwe na Yosevu.

Currently Selected:

Mwa 43: KAMBA

Highlight

Copy