Mwa 42

Ana-a-ĩthe ma Yosevu Maithi Nthĩ ya Misili kũthooa Lĩu

1Yĩla Yakovo wamanyie kana kwĩ lĩu nthĩ ya Misili nĩwakũlilye ana make atĩĩ, “Mwĩĩkala mũisiany'a kũvika ĩndĩĩ?” 2#Meko 7.12 Nĩwaendeeie na kũmea, “Nĩnĩw'ĩte kana kwĩ lĩu nthĩ wa Misili. Endai kw'o mũkathooe lĩu mũete tũikoawe nĩ nzaa.” 3Kwoou ana-a-ĩthe ĩkũmi ma Yosevu nĩmatheeie mathi nthĩ ya Misili kũthooa lĩu. 4Ĩndĩ Yakovo ndaatũma Mbengyameni, mwana-a-inyia wa Yosevu aendany'e namo nũndũ nĩwakĩaa Mbengyameni ndakese ũkwatwa nĩ ũndũ mũthũku.

5Ana ma Yakovo nĩmaendie kũthooa lĩu vamwe na andũ angĩ, nũndũ nthĩ ya Kanaani o nayo nĩyakwatĩtwe nĩ yũa yĩu. 6Yosevu nĩwe waĩ ngavana wa nthĩ yonthe ya Misili, na nĩwe waũngamĩe wĩa wa kũthoosya lĩu kwa andũ onthe ĩũlũ wa nthĩ. Ana-a-ĩthe ma Yosevu nĩmookie, makumana matina nthĩ na ũthyũ mbee wake mamũnenge ndaĩa. 7Yĩla Yosevu woonie ana-a-ĩthe make, nĩwamamanyie ĩndĩ eeyĩkalya ta ũtanamamanya. Nĩwamakũlilye ethũkĩthĩtye, “Mumĩte va inyw'ĩ?”

Mamũsũngĩa, “Twauma nthĩ ya Kanaani, na twooka kũthooa lĩu.”

8Kwoou Yosevu nĩwamanyie ana-a-ĩthe make, ĩndĩ mo mayaamũmanya. 9#Mwa 37.5-10 Yosevu nĩwalilikanile ndoto ila waotie ĩũlũ woo na amea atĩĩ, “Inyw'ĩ mwooka nĩ kana mũmanye ũndũ kũũ tũtũaa; mwooka nĩ kana mũmanye kwa kĩmbithĩ wonzu wa nthĩ yaitũ.”

10Nĩmamwĩie, “Aiee mũnene, athũkũmi maku mooka kũthooa lĩu. 11Twĩ ana ma mũndũ ũmwe, na ithyĩ athũkũmi maku twĩneena ũla w'o na tũinoka kũmanya kwa kĩmbithĩ wonzu wa nthĩ yaku.”

12Yosevu amea atĩĩ, “Ũu ti w'o! Mwooka kũmanya wonzu wa nthĩ yaitũ.”

13Namo mamwĩa, “Mũnene, twasyaĩtwe twĩ ĩkũmi na elĩ, na twĩ ana ma mũndũ ũmwe ũtwĩe nthĩ ya Kanaani. Mwana-a-ĩthe waitũ ũla mũnini atiiwe na ĩthe waitũ, na ũla ũngĩ nĩwakwie.”

14Ĩndĩ Yosevu amea atĩĩ, “Ũndũ nĩmũtavisye nĩ wa w'o, inyw'ĩ mwooka kũmanya kwa kĩmbithĩ ũndũ nthĩ yaitũ ĩilyĩ! 15Ũũ nĩw'o kũkwĩkwa nĩ kana kũmanyĩke nesa kana mwĩneena ũla w'o: Nyie nĩngwĩvĩta ĩsyĩtwanĩ ya mũsumbĩ wa Misili kana mũyĩuma kũũ mwana-a-ĩthe wenyu ũla mũnini atokĩte vaa. 16Tũmai ũmwe wenyu akaete mwana-a-ĩthe ũsu wenyu; ala angĩ menyu meũtiwa nĩmeũvingĩwa yela, nĩ kana ndeto syenyu isiw'e na kũimanyĩka kana mwĩneena ũla w'o. Ethĩwa mũiũneena ũla w'o, nĩngwĩvĩta ĩsyĩtwanĩ ya mũsumbĩ kana inyw'ĩ mwooka kũmanya kwa kĩmbithĩ ũndũ nthĩ yaitũ ĩilyĩ.” 17Nĩvo ĩndĩ Yosevu wamavingĩie yela vandũ va mĩthenya ĩtatũ.

18Mũthenyanĩ wa katatũ, Yosevu nĩweeie ana-a-ĩthe atĩĩ, “Nyie nĩ mũndũ ũnengete Ngai ndaĩa, ikai ũndũ ngũmwĩa na mũiũawa. 19Ethĩwa nĩmũkwenda kũmanyĩke kana mwĩneena ũla w'o, ũmwe wenyu nĩatiwe vaa yela mũvingĩĩtwe. Ala angĩ mathi mathooe lĩu matwaĩe andũ ma mĩsyĩ yenyu nthĩ ya Kanaani ala me na nzaa mbingĩ. 20O ta ũu endai mũkaete mwana-a-ĩthe wenyu ũla mũnini vaa nĩĩ nĩ kana ndeto syenyu imanyĩke kana nĩ syaw'o na mũiũawa.” Ana-a-ĩthe ma Yosevu nĩmeekie ũndũ wameie. 21Nĩmaneenanisye ene kwa ene mayasya atĩĩ, “Kwa w'o twĩkanw'a nũndũ wa mwana-a-ĩthe waitũ. Ithyĩ nĩtwoonie ũndũ we waĩ na thĩna thayũnĩ yĩla watwĩsũvaa tũikamwĩke ũndũ, ĩndĩ tũyaaĩthukĩĩsya; kĩu nĩkyo kĩtumĩte thĩna ũũ ũtũkwata.”

22 # Mwa 37.21-22 Lũveni nĩwameie atĩĩ, “Namwĩie mũikakiite kĩmwana kĩu, ĩndĩ mwalea kwĩw'a. Yĩĩ nĩyo ĩtuvi yitũ nũndũ wa kũmũaa.” 23Ana-a-ĩthe ma Yosevu mayamanyaa kana nĩwaeleawa nĩ ũndũ mekwasya, nũndũ maneenanasya nake ve mũndũ wa kũalyũla. 24Nĩwaumie vala ve ana-a-ĩthe athi vaasa namo na ambĩĩa kũĩa. Yĩla weethĩiwe na vinya wa kũneena namo ĩngĩ, nĩwasyokie oosa Simioni na asya nĩovanw'e ala angĩ masyaĩĩsye.

Ana-a-ĩthe ma Yosevu Maisyoka Kanaani

25Yosevu nĩweeaĩie athũkũmi make mekĩe makunia ma ana-a-ĩthe lĩu mausũe, na mayosa mbesa sya kĩla ũmwe matũnge ĩkunianĩ yake. O ta ũu nĩwameaĩie mamanenge lĩu wa kũya me kyalonĩ menũkĩte. Athũkũmi asu nĩmeekie ũndũ Yosevu wameie. 26Ana-a-ĩthe ma Yosevu nĩmatũlilye makunia asu ma lĩu mang'oinĩ moo na mambĩĩa kyalo. 27Me vala makomele, ũmwe woo nĩwathaisye ĩkunia yake nĩ kana anenge ĩng'oi lĩu na eethĩa mbesa syake mũnukanĩ wa ĩkunia yĩu. 28Nĩweeie ana-a-ĩthe atĩĩ, “Mbesa syakwa nitũngiwe; nii vaa mũnukanĩ wa ĩkunia yakwa!” Ũndũ ũsu nĩwatumie mathelwa nĩ vinya na matelema na mambĩĩa kũkũlany'a, “Ũũ nĩ ũndũ wa mũthemba mwaũ Ngai ũtwĩkie?”

29Yĩla mavikie kũla kwĩ ĩthe woo nthĩ ya Kanaani nĩmamũtavisye maũndũ onthe ala maneekĩkie kwoo. Nĩmamwĩie atĩĩ, 30“Ngavana wa nthĩ ya Misili nũnaneenie naitũ ethũkĩthĩtye na atwĩa tũnaendete kũu kũmanya kwa kĩmbithĩ ũndũ nthĩ yoo ĩilyĩ. 31Ĩndĩ naitũ twamwĩa, ‘Ithyĩ twĩ andũ tũneenaa w'o na tũinoka kũmanya kwa kĩmbithĩ ũndũ nthĩ yoo ĩilyĩ. 32Tũsyaĩtwe twĩ ĩkũmi na elĩ na twĩ ana ma mũndũ ũmwe. Ũmwe waitũ nĩwakwie na ũla mũnini tũmũtiie na ĩthe waitũ kũya nthĩ ya Kanaani.’ 33Nĩvo ĩndĩ mũndũ ũsu watwĩie atĩĩ, ‘Ũũ nĩw'o kũkwĩkwa nĩ kana kũmanyĩke nesa kana mwĩneena ũla w'o: Ũmwe wenyu nũkũtiwa nakwa kũũ; ala angĩ menyu nĩmekwosa lĩu matwaĩe andũ ma mĩsyĩ yenyu ala me na nzaa. 34Endai mũkaete mwana-a-ĩthe wenyu ũla mũnini kũũ nĩĩ. Nĩvo ĩndĩ nĩmanya kana mũyũkĩte kũmanya kwa kĩmbithĩ ũndũ nthĩ yaitũ ĩilyĩ, na kana mwĩneena ũla w'o. Ngamũthaĩsya mwana-a-ĩthe wenyu, nenyu mũkeethĩwa na ũthei wa kũtandĩthĩsya nthĩ ĩno.’ ”

35Yĩla ana-a-ĩthe asu ma Yosevu mambĩĩie kumya lĩu makunianĩ, kĩla ũmwe woo nĩweethĩie mbesa syake ĩkunianĩ yake. Yĩla mo na ĩthe woo moonie mbesa isu, nĩmakwatiwe nĩ w'ĩa. 36Ĩthe woo Yakovo nĩwamakũlilye atĩĩ, “Mwĩenda nasye syana syakwa syonthe? Yosevu ndevo, Simioni ndevo, na yu mwĩenda kwosa Mbengyameni o nake mũmũtwae. Mathĩna aa onthe ninyie mokĩe!”

37Lũveni nĩweeie ĩthe, “Wĩũaa ana makwa elĩ nalea kũmũtũnga kũla ũĩ. Nenge we ethĩwe ũsũvĩonĩ wakwa na ngamũtũnga kũla ũĩ.”

38Ĩndĩ Yakovo amea atĩĩ, “Mwana wakwa ndeendany'a nenyu nũndũ mwana-a-inyia nĩwakwie, na nowe ũtiele e weka. Ethĩwa akakwatwa nĩ ũndũ ũthũku mwĩ kyalonĩ, nyie nĩ mũkũũ, na kyeva kĩla mũndetee nokĩmbũae.”

Currently Selected:

Mwa 42: KAMBA

Highlight

Copy