Mwa 41

Yosevu Aialyũla Ndoto Sya Mũsumbĩ

1Ĩtina wa myaka ĩlĩ, mũsumbĩ wa nthĩ ya Misili nĩwaotie ndoto na oona aũngyĩ ũtee wa Ũsĩ wa Naeli. 2Nĩwoonie ng'ombe mũonza nzeo na nou syaumĩla ũsĩnĩ ũsu na syambĩĩa kũya kĩtothya. 3Ng'ombe ingĩ mũonza mosu na nthũku kwa kũsiw'a nĩsyaumĩlile na syaũngama ũtee wa ũsĩ vakuvĩ na ng'ombe ila nzeo na nou. 4Ng'ombe isu syaĩ mosu na nthũku kwa kũsiw'a nĩsyaĩe syamina ng'ombe ila syaĩ nzeo na nou. Nĩvo ĩndĩ mũsumbĩ waamũkie. 5Mũsumbĩ nĩwasyokie akoma ĩngĩ na aota ndoto ĩngĩ. Nĩwoonie iia mũonza sya nganũ, nzeo na mbiku imeete kĩtinanĩ kĩmwe. 6Nĩwasyokie oona iia ingĩ mũonza syamea, nasyo syaĩ ntheke, ivĩvĩtw'e nĩ kĩseve kĩvyũ kyumĩte ngalĩko ya wumĩlonĩ wa syũa. 7Iia isu ntheke nĩsyamelilye iia ila syaĩ nzeo na mbiku, Mũsumbĩ nĩwaamũkie na amanya kana nũkũotaa. 8#Nda 2.2 Ũnĩ ũsu kwakya mũsumbĩ aĩ na kĩmako kingĩ. Kwoou nĩwatũmanie eki ma syama na andũ oĩ ma nthĩ ĩsu ya Misili metwe. Nĩwamatavisye ndoto ĩla ũotie, ĩndĩ vai ũmwe woo waatonya kũmũtavya ũalyũlo wayo.

9Ũla mũtongoi wa andũ ala manengae mũsumbĩ ndivai nĩweeie mũsumbĩ atĩĩ, “Ũmũnthĩ nĩnalilikana mavĩtyo makwa. 10We mũsumbĩ nĩwatũthatĩie nyie na mũtongoi wa athũkũmi maku ala mauaa mĩkate, na watũvingĩa yela nyũmbanĩ ya mũnene wa asikalĩ ala masungaa nyũmba ya mũsumbĩ. 11Ũtukũ ũmwe kĩla ũmwe waitũ nĩwaotie, na ndoto sitũ syaĩ na ũalyũlo wĩ kĩvathũkany'o. 12Vau twaĩ na mwanake Mũevelania, mũthũkũmi wa mũnene wa asikalĩ ala masungaa nyũmba ya mũsumbĩ. Yĩla twamũtavisye ndoto sitũ nĩwatũtavisye ũalyũlo wa kĩla ĩmwe yasyo. 13Nĩ kweekĩkie kwĩanana na ũndũ watũtavisye: Nĩnatũngiwe wĩanĩ na mũndũ ũsu ũngĩ ooawa.”

14Mũsumbĩ nĩwatũmanie Yosevu aetwe, na kwoou aumw'a yela mĩtũkĩ. Ĩtina wa kwenzwa na kwĩkĩa ngũa ingĩ, Yosevu nĩwaendie vala ve mũsumbĩ. 15Mũsumbĩ nĩweeie Yosevu atĩĩ, “Nĩnĩotie ndoto na vai mũndũ ũtonya kũmĩalyũla. Nĩndavĩtw'e kana watavw'a ndoto nũtonya kũmĩalyũla.”

16Yosevu nĩwasũngĩie mũsumbĩ amwĩa atĩĩ, “Kwa w'o nyie mũsumbĩ ti inyie nĩalyũlaa ndoto, ĩndĩ Ngai nũkũũnenga ũalyũlo ũla ũkwaĩlĩte.”

17Mũsumbĩ nĩweeie Yosevu atĩĩ, “Ndotonĩ yakwa nonie nĩũngyĩ ũtee wa Ũsĩ wa Naeli, 18na ũsĩnĩ ũsu vaumĩla ng'ombe mũonza nzeo na nou na syambĩĩa kũya kĩtothya. 19Ng'ombe ingĩ mũonza mosu na nthũku kwa kũsiw'a nĩsyumĩlile. Ndyaĩ naaona ng'ombe ingĩ nthũku ta isu kũũ nthĩ ya Misili. 20Ng'ombe isu mosu na nthũku kwa kũsiw'a niĩe syamina vyũ isu ingĩ mũonza nou. 21Ĩndĩ ng'ombe isu mosu syamina kũya isu nou, iinethĩwa na kĩvathũkany'o o na vanini; syĩonekaa syĩ o mosu o tondũ syĩĩilyĩ mbeenĩ. Nĩvo ĩndĩ nĩamũkie. 22Nĩnĩotie ĩngĩ noona iia mũonza sya nganũ, nzeo na mbiku imeete kĩtinanĩ kĩmwe. 23O ta ũu iia ingĩ mũonza ntheke na ivĩvĩtw'e nĩ kĩseve kĩvyũ kyumĩte ngalĩko ya wumĩlonĩ wa syũa nimeie. 24Iia isu ntheke nimelilye iia mũonza ila nzeo. Nĩnĩtavisye eki ma syama ndoto isu, ĩndĩ vai ũmwe woo ũneethĩwa atonya kũndavya ũalyũlo wasyo.”

25Nĩvo ĩndĩ Yosevu weeie mũsumbĩ atĩĩ, “Ndoto isu syaku syelĩ syĩ na ũalyũlo o ũmwe; Ngai nũkũvuanĩisye maũndũ ala ũkilĩlye kwĩka. 26Ng'ombe isu mũonza nou nĩ myaka mũonza, na iia isu mũonza nzeo o nasyo nĩ myaka mũonza; syĩndũ isu syelĩ syĩ na ũalyũlo o ũmwe. 27Ng'ombe mũonza mosu na nthũku kwa kũsiw'a ila syumĩlile ĩtina wa ila nou, na iia mũonza nthei na ĩvĩvĩtw'e nĩ kĩseve kĩvyũ kyumĩte ngalĩko ya wumĩlonĩ wa syũa nĩ myaka mũonza ya yũa. 28O tondũ nakũtavya we mũsumbĩ, Ngai nũkwonisye maũndũ ala ũkilĩlye kwĩka. 29Ĩvindanĩ ya myaka mũonza ĩla yũkĩte nthĩ yonthe ya Misili ĩkakwata ngetha mbingĩ mũno, 30ĩndĩ ĩtina wa myaka ĩsu, kũkeethĩwa yũa ya myaka mũonza. Myaka ĩsu ya ngetha mbingĩ ĩkoola, na yũa yĩu yĩituma andũ ma Misili methĩwa na thĩna mũnene. 31Ngetha ĩsu mbingĩ ĩkoola vyũ nũndũ yũa yĩla yĩĩthĩwa ĩtina wa ngetha ĩsu yĩkeethĩwa yĩ ĩthũku mũno. 32Kĩtumi kyaku we mũsumbĩ kwĩthĩwa na ndoto ĩsu mavinda elĩ nĩ kana ũndũ ũsu ũvangĩtwe nĩ Ngai na akawĩanĩsya o mĩtũkĩ.

33“Kwoou yu we mũsumbĩ, nyuva mũndũ mũĩ na wĩ na ũmanyi, na ũimũnenga ũtonyi wa kũũngamĩa nthĩ yonthe ya Misili. 34O ta ũu we mũsumbĩ, nyuva anini angĩ maku mombany'e kĩlungu kĩmwe kya itano kya ngetha ya nthĩ ya Misili, ĩvindanĩ yĩu ya myaka mũonza ya ngetha mbingĩ. 35Meaĩe nĩ kana mombany'e lĩu w'onthe ĩvindanĩ ya myaka mĩseo ĩla yũkĩte, na ũimanenga ũtonyi wa kũsũvĩa lĩu wa mbaa ngetha ũla maiĩte ndũanĩ sya nthĩ ya Misili. 36Lĩu ũsu ũkeethĩwa wiĩtwe kwondũ wa andũ ma nthĩ ya Misili, ĩvindanĩ ya yũa yĩu ya myaka mũonza, yĩla yĩĩthĩwa kũũ nthĩ ya Misili. Kwa nzĩa ĩsu andũ maikoawa nĩ nzaa.”

Yosevu Aitw'ĩkĩthw'a Ngavana wa Nthĩ ya Misili

37Mũvango ũsu nĩwoonekie nĩ mũsumbĩ na anini make wĩ mũseo. 38Mũsumbĩ nĩwakũlilye anini make atĩĩ, “Ithyĩ nĩtũtonya kwona mũndũ ũngĩ ũilyĩ ta Yosevu, ũla wĩ na Veva wa Ngai?” 39Mũsumbĩ nĩweeie Yosevu atĩĩ, “Nũndũ Ngai nũkwonisye maũndũ aa onthe, vai mũndũ ũtonya kwĩthĩwa na ũĩ na ũmanyi mbee waku. 40#Meko 7.10 Nĩnakũnenga ũtonyi wa kwĩthĩwa wĩ mũnene ũsumbĩnĩ wakwa; andũ makwa onthe makaatĩĩaa mĩao yaku. Ĩndĩ nũndũ nyie nĩ mũsumbĩ, ngeethĩawa na ũtonyi mbee waku.” 41Mũsumbĩ nĩwaendeeie kũmwĩa atĩĩ, “Yu nĩnakũtw'ĩkĩthya ngavana wa nthĩ yonthe ya Misili.” 42#Nda 5.29 Mũsumbĩ nĩwaumisye mbete yake ya kwĩkĩa mũulĩ kyaanĩ kyake, na amĩkĩa kyaanĩ kya Yosevu, na amwĩkĩa ngũa ndaasa nzeo ndũmu. Nĩwasyokie amwĩkĩa ĩsoa ya thaavu ngingo. 43Mũsumbĩ nĩwanengie Yosevu ĩkasya yake yĩla yaĩ ya kelĩ yamũkua na asikalĩ matongoesya Yosevu maneenete na wasya mũnene mayasya, “Ĩvetangei nzĩanĩ! Ĩvetangei!” Kwoou Yosevu nĩwatw'ĩkĩthiw'e ngavana wa nthĩ yonthe ya Misili. 44Mũsumbĩ nĩweeie Yosevu atĩĩ, “Ninyie mũsumbĩ, ĩndĩ vai mũndũ ũkaneena kana kwĩka ũndũ nthĩ yonthe ya Misili ũtamũnenge mwanya wa kwĩka ũu.” 45Mũsumbĩ nĩwatw'ĩĩie Yosevu ĩsyĩtwa amwĩta Nzevenathi-vanea na amũnenga Asenathi mwĩĩtu wa Votivela, mũthembi wa Oni ethĩwe mũka wake. Kwoou Yosevu nĩwatembeie kĩla vandũ nthĩ yonthe ya Misili.

46Yosevu aĩ na ũkũũ wa myaka mĩongo ĩtatũ yĩla wambĩĩe kũthũkũma wĩa ũla Valao mũsumbĩ wa Misili wamũnengie. Yosevu nĩwaumie mbee wa mũsumbĩ na athi athyũlũlũka nthĩ yonthe ya Misili. 47Ĩvindanĩ ya ĩla myaka mũonza ya ngetha, nĩkweethĩiwe lĩu mwingĩ mũno. 48Yosevu nĩwoombanisye lĩu w'onthe wa nthĩ ya Misili myakanĩ ĩsu mũonza ya ngetha mbingĩ, na awia ndũanĩ sya nthĩ ĩsu. Nthĩnĩ wa kĩla ndũa aiaa lĩu kuma mĩũnda ĩla ĩthyũlũlũkĩte ndũa ĩsu. 49Yosevu nĩwoombanisye ngetha mbingĩ mũno ya mbaa mbeke weethĩa ĩilyĩ ta kĩthangathĩ kya ũkanga; o na nĩwaekie kũthima ngetha ĩsu nũndũ yaĩ mbingĩ ũkethĩa ndĩthimĩka.

50Myaka ya yũa ĩtanamba kwambĩĩa, Yosevu aĩ na ana elĩ ala wasyaĩwe nĩ Asenathi mwĩĩtu wa Votivela, mũthembi wa Oni. 51Yosevu nĩweetie mwana wake wa mbee Manase ayasya, “Ngai nũtumĩte nũlwa nĩ mathĩna makwa onthe na ngolwa nĩ andũ onthe ma nyũmba ya ĩthe wakwa.” 52Mwana wake wa kelĩ amwĩtie Evalaimu ayasya, “Ngai nũtumĩte nĩkwata syana nĩ nthĩ ĩno nathĩnĩie.”

53Myaka mũonza ya ngetha mbingĩ ĩla nthĩ ya Misili yeethĩiwe nayo, nĩyathelile. 54#Meko 7.11 Ĩla myaka mũonza ya yũa nĩyambĩĩie o tondũ Yosevu wawetete. Nĩkweethĩiwe yũa nthĩ ila ingĩ syonthe, ĩndĩ kwaĩ lĩu kĩla vandũ nthĩ ya Misili. 55#Yoa 2.5 Yĩla andũ onthe ma Misili makwatiwe nĩ yũa, nĩmeekaĩlile mũsumbĩ amanenge lĩu. Mũsumbĩ nĩwameie mathi kũla kwĩ Yosevu na mayĩka ũndũ ũkũmatavya. 56Yũa nĩyaendeeie kwĩthĩwa yĩ yingĩ mũno nthĩ yonthe ya Misili. Kwoou Yosevu nĩwavingũie nyũmba ila syaiĩtwe lĩu na ambĩĩa kũthooesya andũ ma Misili lĩu ũsu. 57Andũ kuma kĩla vandũ ĩũlũ wa nthĩ nĩmookie Misili kũla kwĩ Yosevu kũthooa lĩu, nũndũ yũa yĩu yaĩ kĩla vandũ ĩũlũ wa nthĩ.

Currently Selected:

Mwa 41: KAMBA

Highlight

Copy