Mwa 40

Yosevu Aialyũla Ndoto Sya Ovwa

1Ĩtina wa ĩvinda ĩna mũtongoi wa andũ ala manengae mũsumbĩ ndivai na mũtongoi wa athũkũmi ma mũsumbĩ ala mauaa mĩkate, nĩmamũvĩtĩisye mũnene woo mũsumbĩ wa nthĩ ya Misili. 2Mũsumbĩ nĩwathatĩie athũkũmi asu make elĩ 3na amavingĩa yela nyũmbanĩ ya mũnene wa asikalĩ ala masungaa nyũmba ya mũsumbĩ, vala nĩvo Yosevu o nake wavingĩwe. 4Mũnene wa asikalĩ ala masungaa nyũmba ya mũsumbĩ nĩwamanenganie kũla kwĩ Yosevu ethĩwe mũthũkũmi woo na mekala yela vandũ va ĩvinda ĩasa.

5Ũtukũ ũmwe me vau yela mũtongoi wa andũ ala manengae mũsumbĩ ndivai na mũtongoi wa athũkũmi ma mũsumbĩ ala mauaa mĩkate, nĩmaotie ndoto syĩ na ũalyũlo wĩ kĩvathũkany'o. 6Ũnĩ ũsu kwakya yĩla Yosevu waendie vala maĩ, nĩwamethĩie me na kĩmako kingĩ. 7Nĩwamakũlilye atĩĩ, “Mũmakĩtw'e ũu nĩ kyaũ ũmũnthĩ?”

8Nĩmamwĩie atĩĩ, “Nĩtũotie ndoto na vai mũndũ wa kũtũtavya ũalyũlo wasyo.”

Yosevu amea, “Ngai nĩwe ũnenganae ũalyũlo wa ndoto. Ndavyei mũotie ata.”

9Kwoou mũtongoi wa andũ ala manengae mũsumbĩ ndivai nĩwatavisye Yosevu ndoto yake amwĩa atĩĩ, “Ndotonĩ yakwa nonie mũsavivũ wĩ mbee wakwa, 10wĩ na mbonge itatũ. Yĩla mũtĩ ũsu wumisye matũ oou malaa nĩmaumĩlile na meethĩwa na itũngo sya nzavivũ mbĩu. 11Ĩvindanĩ yĩu nĩĩkwete kĩkombe kĩla mũsumbĩ ũnyusaa ndivai nakyo. Nĩnonie noosa nzavivũ isu, naivivĩĩa kĩkombenĩ kĩu na namũnenga mũsumbĩ.”

12Yosevu amwĩa atĩĩ, “Ũũ nĩw'o ũalyũlo wa ndoto ĩsu: mbonge isu itatũ wonie nĩ mĩthenya ĩtatũ. 13Ĩtina wa mĩthenya ĩsu ĩtatũ, mũsumbĩ akakũthasya, na aikũekea ĩvĩtyo yaku, na ũkũtũnga wĩanĩ. Ũkamũnengae ndivai yĩ kĩkombenĩ kyake ũndũ wamũnengae tene. 14Maũndũ maku maseũva, wĩndilikana na kũmbĩka nesa kwa kũtavya mũsumbĩ ĩũlũ wakwa nĩ kana ambumye yela, 15nĩkwĩthĩwa nyie nakuiwe na vinya naumw'a nthĩ ya Aevelania. O na vo vaa nĩĩ ndi ũndũ nĩkĩte ũtuma novwa yela.”

16Yĩla mũtongoi wa athũkũmi ma mũsumbĩ ala mauaa mĩkate weewie ũalyũlo wa ndoto ya mũndũ ũla wanengae mũsumbĩ ndivai wĩ mũseo, nĩweeie Yosevu atĩĩ, “O nakwa nĩnĩotie ndoto, na ndotonĩ yakwa nonie nĩkuĩte ikavũ itatũ na mũtwe syĩ mĩkate. 17Kĩkavu kĩla kĩĩ ĩũlũ wa ila ingĩ kĩĩ na mĩkate ya mũsumbĩ ya mĩthemba yĩ kĩvathũkany'o. Ĩndĩ nyũnyi nikũĩsaa mĩkate isu kuma kĩkavũnĩ kĩu kĩ o vau mũtwe.”

18Yosevu amwĩa atĩĩ, “Ũũ nĩw'o ũalyũlo wa ndeto ĩsu: ikavũ isu itatũ wonie nĩ mĩthenya ĩtatũ. 19Ĩtina wa mĩthenya ĩtatũ mũsumbĩ akakũthasya na aikũtila mũtwe na kũsũsya mwĩĩ waku mũtĩnĩ. Nyũnyi ikookaa na kũya nyama sya mwĩĩ waku.”

20Ĩtina wa mĩthenya ĩtatũ mũsumbĩ nĩwaseũvĩisye anini make onthe mboka ya kũlilikana kũsyawa kwake. Nĩvo ĩndĩ wathaisye ũla mũtongoi wa andũ ala mamũnengae ndivai o vamwe na mũtongoi wa athũkũmi make ala mauaa mĩkate na asya maetwe mbee wa anini make. 21Nĩwatũngie mũtongoi wa andũ ala mamũnengae ndivai wĩanĩ nĩ kana aendee kũmũnenga ndivai. 22Ĩndĩ nĩwasũisye ũla mũtongoi wa athũkũmi ma mũsumbĩ ala mauaa mĩkate, o tondũ Yosevu wamatavisye yĩla wamaalyũlĩle ndoto syoo.

23Ĩndĩ mũtongoi wa andũ ala manengae mũsumbĩ ndivai ndaalilikana Yosevu o na vanini, nĩwoolilwe nĩwe vyũ.

Currently Selected:

Mwa 40: KAMBA

Highlight

Copy