Mwa 39

Yosevu na Mũka wa Votivalĩ

1Yosevu nĩwaminĩte kũtwawa nthĩ ya Misili nĩ Aĩsumaeli, na akathoow'a kwa Votivalĩ, ũmwe wa anini ma mũsumbĩ ũla waĩ mũnene wa asikalĩ ala masungaa nyũmba ya mũsumbĩ. 2#Meko 7.9 Mwĩai Ngai aĩ vamwe na Yosevu, na kwa kĩtumi kĩu maũndũ onthe ala weekaa nĩmaendeeaa nesa. Yosevu ekalaa nyũmba kwa mũnene ũsu wake. 3Mũnene wake nĩwamanyie kana Mwĩai Ngai aĩ vamwe na Yosevu na nĩwatumaa maũndũ onthe ala Yosevu weekaa maendeea nesa. 4Kwoou Votivalĩ nĩwendeeiw'e mũno nĩwe na amũtw'ĩkĩthya mũthũkũmi wa kũmũtetheeasya maũndũ make. Nĩwamũtw'ĩkĩthisye mũnene wa mũsyĩ wake na syĩndũ syake syonthe. 5Kuma ĩvinda yĩla watw'ĩkĩthisye Yosevu mũnene wa mũsyĩ wake na syĩndũ syake syonthe, Mwĩai Ngai nĩwaathimie mũsyĩ wa Mũmisili ũsu nũndũ wa Yosevu. Mwĩai Ngai nĩwaathimie syĩndũ syonthe ila Votivalĩ waĩ nasyo, sya mũsyĩ na sya mũũndanĩ. 6Kwoou Votivalĩ nĩwaiie syĩndũ syonthe ila waĩ nasyo ũsũvĩonĩ wa Yosevu, na nũndũ kĩla kĩndũ kyaĩ ũsũvĩonĩ wa Yosevu, Votivalĩ ndaaĩthĩny'a na ũndũ o na ũmwe ate o lĩu ũla waĩsaa.

Yosevu aĩ mũmbe nesa na aĩ wa kwendeesya kwa kũsiw'a. 7Ĩtina wa ĩvinda ĩna mũka wa mũnene wake nĩwatemethisye Yosevu metho ma wendo na amwĩa, “Ũka tũmanyane kĩ-mwĩĩ.” 8Yosevu nĩwaleile na amwĩa atĩĩ, “Mũnene wakwa ndethĩnasya na ũndũ o na ũmwe wa nyũmba yake nũndũ nyie nĩvo. Nĩwiĩte syĩndũ syonthe ila wĩ nasyo ungu wa ũsũvĩo wakwa. 9Vai mũndũ mũnene kwĩ inyie nyũmbanĩ ĩno. Mũnene wakwa ndaambata kĩndũ o na kĩmwe ate o we, nĩkwĩthĩwa wĩ kĩveti kyake. Ndonya ata yu ĩndĩ kwĩka ũndũ ũthũkĩte ta ũũ na kũmũvĩtĩsya Ngai?” 10O na kau mavinda maingĩ mũka wa Votivalĩ nĩwathing'ĩĩasya Yosevu kwĩka ũndũ ũsu, Yosevu ndaaĩtĩkĩla kũmanyana kĩ-mwĩĩ nake kana kwĩkala vakuvĩ nake.

11Ĩndĩ mũthenya ũmwe Yosevu nĩwalikile nyũmba atethye wĩa ũla waaĩlĩte kwĩthĩwa aitethya vo, na vai ũmwe wa athũkũmi ala angĩ ma nyũmba waĩ vo. 12Mũka wa Votivalĩ nĩwakwatie ngũa ya Yosevu ya ĩũlũ na amwĩa atĩĩ, “Ũka tũmanyane kĩ-mwĩĩ!” Yosevu nĩwasembie aumaala amũtia akwete ngũa ĩsu. 13Yĩla mũka wa Votivalĩ woonie kana Yosevu nĩwasemba aumaala amũtia akwete ngũa ĩsu, 14nĩweetie athũkũmi ala angĩ make ma nyũmba na amea, “Kwa sisyai kĩla ngwete! Mũevelania ũũ mũũme wakwa waetie vaa nyũmba nĩwambĩĩie kũtwĩkĩĩthya nthoni. Nĩwooka alika nyũmba kwakwa na enda kũngwata tũmanyane kĩ-mwĩĩ, ĩndĩ nakwa nakaya na wasya mũnene. 15Yĩla weew'a nakaya nĩtetheew'e, nĩwasemba aumaala na atia ngũa ĩno yake vala nĩĩ.” 16Mũka wa Votivalĩ nĩwaiie ngũa ĩsu ya Yosevu nginya mũnene wake enũka, 17na amũtavya ngewa isu watavisye athũkũmi ala angĩ ma nyũmba ayasya atĩĩ, “Mũthũkũmi ũũ Mũevelania waetie vaa nũlikile nyũmba kwakwa nĩ kana ambĩkĩĩthye nthoni. 18Ĩndĩ yĩla nĩkayie na wasya mũnene nĩ kana nĩtetheew'e, nũtiie ngũa yakwa vala nĩĩ na asemba aumaala.”

19Yĩla mũnene wa Yosevu weewie ndeto isu mũka wamũtavisye aimwĩa, “Ũu nĩw'o mũthũkũmi waku ũmbĩkie,” nĩwathatie mũno. 20Nĩwoosie Yosevu amũvingĩa yela vala vavingĩawa ovwa ma kwa mũsumbĩ. Ĩndĩ ĩvindanĩ yĩla Yosevu waĩ yela, 21#Meko 7.9 Mwĩai Ngai aĩ vamwe nake na nĩwamwĩkaa nesa; nĩwatumie mũnene wa yela endeew'a nĩwe. 22Kwoou mũnene wa yela nĩwatw'ĩkĩthisye Yosevu mũũngamĩi wa andũ onthe ala movetwe vau yela na mũsyaĩĩsya wa maũndũ onthe ala meekawa vo. 23Mũnene wa yela ndaĩ na vata wa kwĩthĩny'a na ũndũ o na ũmwe ũla waiĩte ũsũvĩonĩ wa Yosevu, nũndũ Mwĩai Ngai aĩ vamwe na Yosevu na nĩwatumaa aendeea nesa ũndũnĩ o na wĩva ũla Yosevu weekaa.

Currently Selected:

Mwa 39: KAMBA

Highlight

Copy