Mwa 38

Yuta na Tamalĩ

1Ĩvindanĩ yĩu Yuta nĩwaumie vala ve ana-a-ĩthe na athi kũtũa Andũlamu vakuvĩ na mũndũ ũmwe weetawa Ila ũla waĩ wa kĩsio kĩu. 2Yuta e kũu nĩwakomanie na mwĩĩtu wa mũndũ Mũkanaani weetawa Suua. Yuta nĩwatwaie mũndũ mũka ũsu na amanyana kĩ-mwĩĩ nake. 3Mũndũ mũka ũsu nĩwaitavie na asyaa kavĩsĩ na Yuta aketa Eeli. 4Nĩwaitavie ĩngĩ na asyaa kavĩsĩ, na aketa Onani. 5Nĩwasyaie kana kangĩ ka kavĩsĩ na aketa Siela. Kana kau kasyaiwe ĩvindanĩ yĩla Yuta watwĩe vandũ vetawa Kesivũ.

6Yuta nĩwatwaĩie Eeli mwana wake ũla mũkũũ mũka wĩtawa Tamalĩ. 7Ĩndĩ mwĩkalo wa Eeli waĩ mũthũku na ndwamwendeeasya Mwĩai Ngai, na kwoou Mwĩai Ngai amũaa. 8Nĩvo ĩndĩ Yuta weeie Onani atĩĩ, “Enda ũmanyane kĩ-mwĩĩ na ndiwa ya mwana-a-inyia waku. Ĩka maũndũ ala waĩlĩte kwĩka ta wĩ mwana-a-inyia wa mũũme, nĩ kana mwana-a-inyia waku akwate syana.” 9Ĩndĩ Onani nĩwamanyie kana syana ila wĩsyaa na Tamalĩ iikethĩwa syĩ syake, kwoou kĩla ĩvinda waendaa kũmanyana kĩ-mwĩĩ na ndiwa ĩsu ya mwana-a-inyia nĩwetaa nthĩ mbeũ yake ya kũsyaa nĩ kana ndakasyaĩe mwana-a-inyia syana. 10Ũndũ ũsu Onani weekie ndwaamwendeesya Mwĩai Ngai na kwoou Mwĩai Ngai nĩwamũaie o nake. 11Yuta nĩweeie Tamalĩ mũka-a-mwana atĩĩ, “Enda ũkekale ta wĩ ndiwa mũsyĩ kwa ĩthe waku nginya yĩla mwana wakwa Siela ũkeana.” Amwĩie ũu nũndũ asũanĩaa akasya, “Siela o nake nũtonya kũkw'a o ta ana-a-inyia asu angĩ.” Kwoou Tamalĩ nĩwaendie kwĩkala kwa ĩthe wake.

12Ĩtina wa ĩvinda ĩasa mũka wa Yuta ũla waĩ mwĩĩtu wa Suua nĩwakwie. Yĩla kyeva kya Yuta kyathelile, nĩwaendie avika Timina kũla kwĩ andũ ala mamũtilĩlaa malondu w'ĩa. Mũnyanyae ũla weetawa Ila kuma kĩsionĩ kya Andũlamu nĩwaendanisye nake. 13Yĩla Tamalĩ weeiwe kana ĩthe wa mũũme wake e kyalonĩ aendete Timina kũtila malondu make w'ĩa, 14nĩwaumisye ngũa sya ndiwa ila weekĩĩte na eekunĩkĩlya kĩtambaa nĩ kana ndakamanyĩke. Nĩwaendie ekala mũvĩanĩ wa kũlika ndũanĩ ya Enaimu ĩla yĩ ũtee wa nzĩa ĩla ĩendete Timina. Eekie ũu nũndũ Siela aĩ aneana ĩndĩ ndaanenganwe kwake ethĩwe mũũme wake.

15Yĩla Yuta woonie Tamalĩ ekunĩkĩlĩtye kĩtambaa kĩkamũvw'ĩka ũthyũ, nĩwasũanĩie kana nĩ ĩlwaya. 16Yuta ateũmanya kana Tamalĩ nĩ mũka-a-mwana, nĩwaendie vau waĩ ũtee wa nzĩa na amwĩa, “Ũka yu tũmanyane kĩ-mwĩĩ.”

Tamalĩ amũkũlya atĩĩ, “Wĩnenga kyaũ nĩ kana ũmanyane nakwa kĩ-mwĩĩ?”

17Yuta amũsũngĩa amwĩa, “Nĩngũthi kũnengane katena ka mbũi kuma ndĩthyanĩ yakwa ũetewe.”

Tamalĩ amũkũlya, “Nũũnenga kĩndũ nĩkalae nakyo nginya yĩla wĩndetee katena kau?”

18Yuta amũkũlya, “Wĩenda ngũnenge kyaũ wĩkalae nakyo?”

Tamalĩ amũsũngĩa, “Nenge mbete yaku ya kwĩkĩa mũulĩ vamwe na mũkwa wayo, na ndata ĩsu ũkwete.” Yuta nĩwamũnengie syĩndũ isu na amanyana kĩ-mwĩĩ nake. Tamalĩ nĩwakuie ĩvu. 19Tamalĩ nĩwasyokie mũsyĩ, aumya kĩla kĩtambaa weekunĩkĩlye, na eekĩa ĩngĩ ila ngũa sya ndiwa.

20Yuta nĩwatũmie mũnyanyae Ila atwae kala katena ka mbũi kwa ũla mũndũ mũka, na ayosa ila syĩndũ sya Yuta mũndũ mũka ũsu waĩ nasyo, ĩndĩ Ila ndaamwĩthĩa mũndũ mũka ũsu. 21Nĩwakũlilye aũme amwe ma ndũa ya Enaimu, “Yĩĩva yĩla ĩlwaya yĩnaĩ vaa Enaimu ũtee wa nzĩa?”

Aũme asu mamũsũngĩa mamwĩa, “Vaa vayaaĩthĩwa ĩlwaya.”

22Kwoou Ila nĩwasyokie kũla kwĩ Yuta na amwĩa, “Ndinona ĩlwaya yĩu, o na aũme ma ndũa ĩsu mambĩie kana vau vayaaĩthĩwa ĩlwaya.”

23Yuta asya, “Ekana nake amesye syĩndũ isu tũikatw'ĩke andũ ma kũthekeewa; nĩnĩtatie ũndũ nĩĩ ndonya, nakũtũma ũmũtwaĩe katena na walea kũmwĩthĩa.”

24Ĩtina wa ĩvinda ya ta myei ĩtatũ, Yuta nĩweeiwe atĩĩ, “Tamalĩ mũka-a-mwana waku nĩwĩkie naĩ ya ũmalwaya na kumana na naĩ ĩsu nĩ mũito.”

Yuta nĩwaumisye mwĩao asya atĩĩ, “Mumaalyei nza na aivĩvw'a akw'e.”

25Ĩvindanĩ yĩla Tamalĩ waendee kumaalw'a, nĩwatũmanie kũla kwĩ ĩthe wa mũũme ayasya, “Ĩvu yĩĩ nĩ nayo nĩ ya mwene wa syĩndũ ii. Isisye ũmanye nĩ syaũ; mbete ĩno ya kwĩkĩa mũulĩ vamwe na mũkwa wayo, na ndata ĩno.”

26Yuta nĩwaisyaisye na eetĩkĩla kana nĩ syake na asya, “Tamalĩ nĩwe mũlũngalu kwĩ nyie nũndũ ndyaaĩtĩkĩla kũmũnenga mwana wakwa Siela ethĩwe mũũme.” Ĩndĩ Yuta ndaasyoka kũmanyana kĩ-mwĩĩ ĩngĩ na Tamalĩ.

27Yĩla ĩvinda ya Tamalĩ ya kũsyaa yavikie nĩkwamanyĩkie kana esyaa tũvatha. 28Tamalĩ aendee kwaũnya, kana kamwe nĩkaumĩlilye kw'oko. Mwĩsikya nĩwakwatie kw'oko kũu na akwoveea ũlii mũtune na asya, “Kaa nĩko kasyawa mbee.” 29Ĩndĩ kana kau nĩkatũngie kw'oko na mwana-a-inyia asyawa mbee wako. Mwisikya nĩwaisye atĩĩ, “Kwoou nĩwĩsĩ kwĩmanthĩa nzĩa ya kumaala.” Kana kau nĩkeetiwe Velesi. 30Nĩvo ĩndĩ mwana-a-inyia wasyaiwe e na ũla ũlii mũtune wooveewe kw'oko na eetwa Nzela.

Currently Selected:

Mwa 38: KAMBA

Highlight

Copy