2Ako 9

1Kwa w'o ndi na vata wa kũtinda ngĩmũandĩkĩa ĩũlũ wa kumya mũvothi kwondũ wa aĩkĩĩi ma Yutia. 2Nĩnĩsĩ nĩmwĩyũmbanĩtye kũtetheesya, na nĩkyo kĩtumi ngwĩkatha nenyu kũla kwĩ andũ ma Masendonia ngĩmea atĩĩ, “Aĩkĩĩi ma Akaia methĩĩtwe meyũmbanĩtye kũtetheesya kuma mwaka mũthelu.” Wendi ũsu mũnene wenyu nũthangaaĩtye mũno aingĩ moo. 3Ĩndĩ yu natũma ana-a-asa asu nĩ kana kwĩkathĩĩa kwitũ nenyu kũikatw'ĩke kwa mana ũndũnĩ ũũ, ĩndĩ mwĩthĩwe mwĩyũmbanĩtye o tondũ naisye. 4Nũndũ ethĩwa andũ amwe ma Masendonia makookany'a nakwa na mayĩthĩa mũteyũmbanĩtye, tũkavew'ĩa nthoni mũno nũndũ wa kũmũĩkĩĩa mũthemba ũsu, na o na ndiwetekya ũndũ nenyu mũkew'a nthoni singĩvĩte! 5Kwoou nĩnonie nĩ ũseo nĩmesũve ana-a-asa asu mambe kũka kwenyu mbee wakwa, mombanasye mũthĩnzĩo ũsu mwathanie kũnengane, nĩ kana wĩĩthĩwa wĩ mũmbanu na ũyonany'a kana mwaumisye kwa ngoo ya kwenda, na ti kwa kũingĩĩw'a.

6Kĩla ngũweta nĩ kana mũndũ ũla ũvandaa mbeũ nini akethaa ngetha o nini, na ũla ũvandaa mbeũ mbingĩ akethaa ngetha o mbingĩ. 7Kĩla ũmwe wenyu nĩwaĩlĩte kumya o tondũ ũtw'ĩte ngoonĩ yake ate kũnyungunyĩsya kana kũingĩĩw'a, nĩkwĩthĩwa Ngai endaa mũndũ ũla wumasya na ũtanu. 8Nake Ngai e na ũtonyi wa kũmũnenga moathimo maingĩ vyũ kũthonoka ũndũ mũkwenda, nĩ kana kĩla ĩvinda mwĩthĩawe na syĩndũ syonthe ila mwĩ na vata nasyo, na kwĩthĩawa na mbingĩ sya kũnengane kwondũ wa wĩa w'onthe mũseo. 9#Sav 112.9 O tondũ Maandĩko Matheu maĩtye,

“Mũndũ mũlũngalu nĩwumasya na ũlau akanenga ngya,

ũlau wake ndũnyivaa o na ĩndĩĩ.”

10 # Ĩsa 55.10 Ngai ũla ũnengae mũĩmi mbeũ na lĩu wa kũya, akamũnenga o nenyu mbeũ ila mũkwenda, na akaingĩvya ngetha yasyo nĩ kana kwa w'o mwĩthĩwe na ũlau mwingĩ. 11Akamũthusya maũndũnĩ onthe, mũendee kũnenganae na ũlau kĩla ĩvinda, nĩ kana andũ aingĩ mamũtũngĩae Ngai mũvea, nũndũ wa mĩthĩnzĩo yenyu ĩla mekwataa kwĩsĩla vala tũĩ. 12Ũthũkũmi ũũ mũendeesye tyo wa kwĩanĩsya mavata ma aĩkĩĩi me oka, ĩndĩ ũkatuma andũ aingĩ mamũtũngĩa Ngai mũvea mũno. 13Kumana na ũthũkũmi ũũ, ũla kwĩsĩla kwa w'o mwĩyĩĩkĩĩthĩtye kũla kwĩ andũ, aingĩ makamũkumya Ngai kwondũ wenyu kwa kwĩthĩwa mwĩ ewi nthĩnĩ wa kumbũla Ũvoo Mũseo wa Klĩsto, na kwondũ wa ũlau wenyu nthĩnĩ wa kũaana syĩndũ syenyu namo, o vamwe na andũ ala angĩ onthe. 14Kwoou makamũvoyeaa na wendo mũnene kwondũ wa mumo wa mwanya ũla Ngai ũmũnengete. 15Nĩtũũmũtũngĩa Ngai mũvea kwondũ wa mũthĩnzĩo wake ũtaweteka.

Currently Selected:

2Ako 9: KAMBA

Highlight

Copy

Compare