2Ako 10

Vaũlo Ayonany'a Ũkũmũ wa Ũthũkũmi Wake

1Nyie Vaũlo mwene, ũla nĩawa nĩthĩawa nĩnyivĩtye yĩla nĩ vamwe nenyu, na yĩla nĩ kũasa nenyu ngĩneena na ũkũmbaũ, nĩngũmwĩsũva kwa wĩnyivyo na ũuu ta ũla wa Klĩsto, 2kana nooka kũu mũikatume nĩneena nenyu nĩ mũthũku, nũndũ nĩona nganeena nĩ mũthũku na andũ ala maasya twĩkalaa ta andũ ma nthĩ. 3O na kau twĩkalaa nthĩ ĩno, tũyũkitaa kaũ wa nthĩ ĩno, 4nĩkwĩthĩwa mĩio ya kaũ ĩla tũtũmĩaa kũkita ti ya nthĩ ĩno; nĩ mĩio kuma kwa Ngai ĩla yĩna ũtonyi wa kwananga mavinya ma mũmaitha. Nĩtũvalaanasya ngananĩo sya mana; 5nĩtwanangaa mĩneenele ya ũvũngũ na mĩyimbyo yonthe, ĩla ĩsiĩaa andũ maikavikĩe ũmanyi wa Ngai, na nĩtũkwataa na kũalyũla mosũanĩo ma andũ makethĩwa ma kũmwendeesya Klĩsto. 6Nĩtwĩyũmbanĩtye vyũ kũsilĩla andũ ala makethĩwa mate ewi, ĩtina wa inyw'ĩ kwĩthĩwa mwĩ ewi vyũ kwitũ.

7Inyw'ĩ mũsiasya maũndũ o vaa ĩũlũ. Ethĩwa ve mũndũ wĩsĩ nesa ki kana we nĩ wa Klĩsto, nĩasũanĩe ĩngĩ amanye kana o naitũ twĩ ma Klĩsto o take. 8Nĩkwĩthĩwa o na ethĩwa nĩngwĩkathĩĩa kũthonoka ũndũ naĩlĩte ĩũlũ wa ũtonyi ũla Mwĩai ũtũnengete tũmwake inyw'ĩ, eka kũmwananga, nyie ndikasonoka. 9Ndikwenda mwĩsa kũsũanĩa ta ngũmũtelemangya na mavalũa makwa. 10Nũndũ andũ amwe menyu measya atĩĩ, “Vaũlo aandĩkaa ndeto ngito na syĩ na vinya mavalũanĩ make, ĩndĩ yĩla wĩ vamwe naitũ ayĩthĩwa e mũleelu na ate na kĩndũ ũneena.” 11Nĩenda andũ asu mamanye kana veva ũla twĩthĩawa naw'o yĩla tũũmũandĩkĩa mavalũa twĩ vaasa nenyu, now'o tũkethĩwa naw'o yĩla twĩĩthĩwa vamwe nenyu.

12Ithyĩ tũikwenda kwĩyia kĩlasinĩ kĩna, kana kwĩyĩelekany'a na ala metũlasya mo ene. Asu nĩ atumanu mũno! Metũmĩaa o mo ene kwĩthima, na mayĩsianĩsya o mo ene. 13Ĩndĩ ithyĩ tũyĩkathĩĩaa kũvĩtũka vala twaĩlĩte kũvika; tũkavikaa o vala Ngai ũtũthimĩĩte, na inyw'ĩ mwĩ nthĩnĩ wa kĩthimo kĩu. 14Kwoou nũndũ inyw'ĩ mwĩ nthĩnĩ wa vala Ngai watũthimĩĩte tũvike, tũyaakĩla kĩthimo kitũ kwa kũka kwenyu. Nĩkwĩthĩwa nĩ ithyĩ twaĩ ma mbee kũka kwenyu kũtavany'a Ũvoo Mũseo wa Klĩsto. 15Kwoou ithyĩ tũyĩkathĩĩaa na wĩa ũtethetw'e nĩ andũ angĩ, wĩ ũtee wa vala Ngai ũtũthimĩĩte. Ĩndĩ nĩ wĩkwatyo witũ kana mũĩkĩĩo wenyu ũendee na kwĩana, ũthũkũmi witũ katĩ wenyu nũtonya kwingĩvanga, 16ũkethĩa no tũtavany'e Ũvoo Mũseo isionĩ ila syĩ mbee wenyu, tũtekwĩkatha na wĩa ũtethetw'e kĩsionĩ kya mũndũ ũngĩ.

17 # Yel 9.24 O tondũ Maandĩko Matheu maĩtye, “Ũla ũkwenda kwĩkathĩĩa, nĩekathĩĩe nthĩnĩ wa Mwĩai.” 18Nũndũ mũndũ ũla wĩtĩkĩlĩkaa ti ũla wĩkathĩĩaa ewe mwene, ĩndĩ nĩ ũla ũkathĩĩawa nĩ Mwĩai.

Currently Selected:

2Ako 10: KAMBA

Highlight

Copy

Compare