2Ako 8

Mũvothi kwondũ wa Aklĩsto ma Yutia

1 # Alo 15.26 Mbaitũ, twĩenda kũmũtavya ũndũ mumo wa Ngai ũtethetye wĩa makanisanĩ ma Masendonia. 2Aĩkĩĩi kũu nĩmatatie kũthingithw'a mũno nĩ mathĩna, ĩndĩ maĩ na ũtanu mwingĩ, na maumisye mũvothi kwa ũlau mwingĩ o na kau maĩ ngya. 3Nĩngũkũsĩĩa kana nĩmaumisye ũndũ maĩ matonya, o na nĩmaumisye mbee wa vinya woo. Kwa ngenda yoo, 4nĩmatwĩsũvie mũno na kĩthing'ĩĩsyo, tũmanenge mwanya wa kũlika ũthũkũminĩ ũsu wa kumya ũtethyo kwondũ wa aĩkĩĩi ala me Yutia. 5Meekie ũu kũvĩtũka ũndũ tweekwatasya! Mbee nĩmambie kwĩnengane mo ene kwa Mwĩai, na ĩndĩ kwa kwenda kwa Ngai, masyoka meenengane kwitũ.

6Kwoou nĩtũnamũkũlilye Tito, nĩkwĩthĩwa nĩwambĩlĩĩlye ũndũ ũsu kwenyu, amũtetheesye kwĩanĩsya ũthũkũmi ũsu wa wendo. 7O tondũ inyw'ĩ mũthuĩtw'e maũndũnĩ onthe: Mũĩkĩĩonĩ, ũneeninĩ mũseo, ũmanyinĩ, kĩthing'ĩĩsyonĩ, na wendonĩ wenyu kwitũ, sisyai o ta ũu mwĩthĩwe na ũlau mwingĩ nthĩnĩ wa ũthũkũmi ũũ wa wendo.

8Ndiũneena ũu ngĩmwĩaĩa, ĩndĩ nĩenda kũsisya kana wendo wenyu nĩ wa w'o, kwa kũũsianĩsya na kĩthing'ĩĩsyo kĩla andũ angĩ me nakyo kya kũtetheesya. 9Inyw'ĩ nĩmwĩsĩ mumo wa Mwĩai waitũ Yesũ Klĩsto, kana o na kau aĩ mũthwii, nĩweetw'ĩkĩthisye ngya kwondũ wenyu, nĩ kana kumana na ũkya wake mũtonye kũtw'ĩka athwii.

10Woni wakwa ũndũnĩ ũũ nĩ kana nĩ ũseo kwenyu yu, mũmine kĩla mwambĩlĩĩlye kũvanga na kwĩka mwaka mũthelu, 11nĩ kana wendi ũla mwaĩ naw'o mũivanga, woneke kwa kũminũkĩlya ũndũ ũsu na syĩndũ ila yu mwĩ nasyo. 12Nĩkwĩthĩwa ethĩwa mũndũ e na wendi wa kumya, Ngai akendeew'a nĩ kĩla mũndũ ũsu wĩ nakyo, na ti kĩla ũte nakyo.

13Nyie ndikwasya kana twĩaũa andũ ala angĩ mũio nĩ kana tũmũkuĩthye, ĩndĩ twĩenda inyw'onthe mũkue ũndũ ũmwe. 14Yu nũndũ ĩvindanĩ yĩĩ mwĩ na syĩndũ mbingĩ, nĩmwaĩlĩte kũtetheesya ala me na thĩna, nĩ kana namo yĩla makethĩwa na syĩndũ mbingĩ inyw'ĩ mwĩ na thĩna, memũtetheesya. Kwa nzĩa ĩsu mũkeethĩwa mweanana, 15#Kuma 16.18 o tondũ Maandĩko Matheu maĩtye, “Ũla woombanisye mwingĩ ndaaingĩvĩwa kũvĩtũka, nake ũla woombanisye mũnini ndaanyivĩwa kũvĩtũka.”

Tito na Andũ angĩ Elĩ Maitũmwa Kolintho

16Nĩngũmũtũngĩa Ngai mũvea nũndũ nũnengete Tito wendi wa kũmũthĩnĩkĩa ũvw'ana ta ũla wakwa. 17Nĩkwĩthĩwa ndaneeĩtĩkĩla kũka nũndũ nĩ ithyĩ tũnamũkũlĩtye, ĩndĩ we mwene nũnendaa mũno, na kwoou kwa ngenda yake eetĩkĩla kũka kũu kwenyu. 18Twĩmũtũma vamwe na ũla mwana-a-ia wĩ nguma mũno makanisanĩ onthe, kwondũ wa ũtavany'a wake wa Ũvoo Mũseo. 19Na tyo kwondũ wa ũu w'oka, ĩndĩ nũnyuvĩtwe nĩ makanisa aendany'e naitũ ũthũkũminĩ ũũ wa wendo, ũla tũendeesye kwondũ wa ũkumyo wa Mwĩai na twĩ na kĩeleelo kĩseo. 20Twĩsũvĩĩte mũno tũikaatũlwe mũtĩ nĩ mũndũ, ĩũlũ wa ũũngamĩi witũ wa mũthĩnzĩo ũũ wumanĩte na ũlau. 21#Nth 3.4 Wendi witũ nĩ kwĩka kĩla kyaĩlu, na tyo methonĩ ma Mwĩai e weka, ĩndĩ o na methonĩ ma andũ.

22O ta ũu nĩtũũtũma mwana-a-asa waitũ vamwe namo, nake nĩtũmũsyaĩtye kaingĩ tũkamwona e na wendi wa kũtetheesya nthĩnĩ wa maũndũ maingĩ. Ĩndĩ yu e na wendi mũnene mbee, nũndũ wa mũĩkĩĩo ũla wĩ na w'o nenyu. 23Ethĩwa ve mũndũ ũkwenda kũmanya ũvoo wa Tito, nĩamanye kana Tito nĩ mũnyanyawa, atetheanĩasya nakwa kũmũthũkũma. Ĩndĩ ana-a-asa asu angĩ matũmĩtwe nĩ makanisa, na wĩa woo ũetae ngatho kwa Klĩsto. 24Kwoou onany'ai wendo wenyu kũla kwĩ andũ asu, nĩ kana makanisa onthe mone na mamanye kana kwĩkathĩĩa kwitũ nenyu nĩ kwa w'o.

Currently Selected:

2Ako 8: KAMBA

Highlight

Copy

Compare