2Ako 7

1Nĩkwĩthĩwa Ngai nũtwathĩte maũndũ asu endwa makwa, nĩtwĩthesyei ũndũnĩ o na wĩva ũla ũtonya kũvukya mwĩĩ kana thayũ, na twĩkalei twĩ atheu kwa kwĩthĩwa na kĩkĩo kya Ngai.

Ũtanu wa Vaũlo

2Ĩthĩwai na ũthei witũ ngoonĩ syenyu; tũyaavĩtĩsya mũndũ, tũyaathũkya mũndũ, na vai mũndũ twaatũmĩa naĩ. 3Nyie ndiũneena ũu ngĩmũtũla mũtĩ, nĩkwĩthĩwa navu ĩtina nĩnamũtavya kana tũmwendete mũno ũkethĩa kĩkw'ũ kana thayũ iitũtaany'a. 4Ndi na nzika nenyu; nĩnĩkathaa nenyu mũno! Nthĩnĩ wa mathĩna maitũ onthe nĩmũnthangaasya mũno, na nĩkalaa nĩ na ũtanu mwingĩ.

5 # 2Ako 2.13 Nĩkwĩthĩwa o na yĩla twavikie Masendonia tũyaathũmũa kw'o. Nĩtwakwatiwe nĩ mathĩna maingĩ kuma kĩla ngalĩko: Kũtetany'a na andũ, na kwĩthĩwa na w'ĩa ngoonĩ. 6Ĩndĩ Ngai ũla ũthangaasya andũ ala makw'ĩte ngoo, nĩwatũthangaaisye mũno kwĩsĩla kũkanĩ kwa Tito. 7Tũyaathangaaw'a no kũka kwake kwĩ kw'oka, ĩndĩ o na ũvoo ũla watũtavisye wa ũndũ mwamũthangaaisye. Nĩwatũtavisye ũndũ mwĩ na mea maingĩ ma kũmbona, na ũndũ mũkwĩlila nũndũ wa maũndũ ala meekĩkie, na ũndũ mwĩyũmbanĩtye kũndetea, na kwa kĩtumi kĩu nĩ na ũtanu mwingĩ mũno mbee.

8O na ethĩwa valũa wakwa nĩwamwĩw'ĩthisye woo, ndikwĩlila. Ĩĩ, nĩneelilile mbeenĩ nũndũ wa kwona kana valũa ũsu nĩwamwĩw'ĩthisye woo, o na kau waĩ o kwa kavinda. 9Ĩndĩ yu nĩngũtana, na ti ũndũ wa kwĩthĩwa nĩnamwĩw'ĩthisye woo, ĩndĩ nũndũ kwĩw'a woo kyenyu kwatumie mwĩlila kwondũ wa naĩ syenyu. Mweew'ĩthiw'e woo ũla Ngai wendete, na kwoou tũyaamwĩka ũndũ mũthũku. 10Nĩkwĩthĩwa kwĩw'a woo kũla Ngai wendete kũtumaa mũndũ elila kwondũ wa naĩ syake akavikĩa kũtangĩĩwa, na kĩu kĩitumaa akwatwa nĩ mĩlilo! Ĩndĩ woo wa kĩ-mũndũ ũetae kĩkw'ũ. 11Kwa sisyai yu ũndũ kwĩw'ĩthw'a woo kũla Ngai wendete kũmwĩkĩte: Nĩkũtumĩte mwĩthĩwa na kĩthing'ĩĩsyo kĩnene, na wendi mwingĩ wa kwonany'a kana mũinavĩtĩtye. Nĩmweewie woo nĩ kĩla kyeekĩkie, na mwĩ na w'ĩa wa kĩla kĩtonya kwĩkĩka. Kwĩw'a woo nĩkũmwĩkĩĩte mea ma kũmbona, na kũkatuma mwĩthĩwa na kwĩnengane kũnene, na nĩmũkwenda mũno kwona ũla w'o ũyĩkwa. Maũndũnĩ asu onthe nĩmwonanĩtye vyũ kana mwĩ atheu ũndũnĩ ũsu.

12Kwoou o na kau nĩnamũandĩkĩie ĩla valũa, ndyaĩ kwondũ wa mũndũ ũla wavĩtĩtye, kana ũla wavĩtĩw'e; yaĩ kwondũ wa kwenda kũmwony'a ũndũ mbee wa Ngai inyw'ĩ mwĩnenganĩte kwitũ. 13Kĩu nĩkyo kyatumie tũthangaa mũno.

Eka o kũthangaaw'a kwitũ, nĩtwatanĩthiw'e mũno nĩ ũtanu ũla Tito waĩ naw'o, nũndũ wa kũthangaaw'a nĩ inyw'ĩ inyw'onthe. 14Nĩneekathĩĩie nenyu vala ũĩ, nenyu mũineembalũkya. O tondũ twamũtavasya kĩla ĩvinda maũndũ maw'o, now'o kwĩkathĩĩa kwitũ vala ve Tito kũnoonanisye kwĩthĩwa kwa w'o. 15Kwoou wendo wake kwenyu yu nĩ mũnene mũno, aililikana ũndũ inyw'onthe mũnamwĩw'aa, na ũndũ mwamũthokisye na wĩnyivyo na ndaĩa ĩnenevete. 16Nĩngũtana mũno nũndũ nyie ndi na nzika nenyu.

Currently Selected:

2Ako 7: KAMBA

Highlight

Copy

Compare