1Ako 9

Maũndũ ala Maĩlĩte Mũtũmwa

1Nyie no nĩ mũndũ mũthasye? No nĩ mũtũmwa? Nyie no naamwona Yesũ Mwĩai waitũ? Nũndũ inyw'ĩ mũte ũsyao wa wĩa wakwa nthĩnĩ wa Mwĩai? 2O na ethĩwa kwa andũ ala angĩ ndi mũtũmwa, kwenyu nĩ mũtũmwa, nũndũ kwĩthĩwa inyw'ĩ mwĩ Aklĩsto nĩ ũĩkĩĩthyo kana nyie nĩ mũtũmwa.

3Yĩla andũ meũngũlĩĩlya makũlyo nĩteteaa ta ũũ: 4Nĩkũlya, ithyĩ no twaĩlĩtwe nĩ kũnengwa lĩu na kyaũnyw'a kwondũ wa wĩa witũ? 5No twaĩlĩtwe nĩ kũendany'a na iveti sitũ Aklĩsto syalonĩ ta atũmwa ala angĩ, na ana-a-inyia ma Mwĩai na Vetelo? 6Kana koo inyie nĩ na Valanava twaĩlĩtwe nĩ kũtethasya wĩa, twone kya kwĩtethya nakyo? 7Nĩ mũsikalĩ wĩva o na ĩndĩĩ wĩyĩĩvĩaa ngalama ya syĩndũ ila ũtũmĩaa e wĩanĩ? Nĩ mũĩmi wĩva ũvandaa mũũnda wa mĩsavivũ ateũya ũsyao wayo? Kana nũũ ũla ũĩthasya ndĩthya ya indo, na ndanyusaa ĩia yasyo?

8Nyie ndiũneena maũndũ aa o ũndũ andũ maneenaa; Mĩao ĩwetete oou. 9#Kũt 25.4; 1Tim 5.18 Nĩkwĩthĩwa Mĩaonĩ ya Mwose kwĩĩtwe atĩĩ, “Ndũkove ng'ombe mũnuka yĩla ũũmĩtũmĩa ĩkũvũĩe nganũ kwa kũkinyanga.” Nĩkũlya, mwĩona Ngai ta ũkũsũanĩa o ũvoo wa ng'ombe? 10Nĩkũlya, we kwa w'o ndaneenaa ĩũlũ waitũ? Kwa w'o vau vaandĩkiwe kwondũ witũ, nũndũ mũndũ ũla ũĩmaa na ũla ũvũaa ũ lĩu, onthe maĩlĩte kũtethya wĩa kĩla ũmwe e na wĩkwatyo wa kũkwata kĩlungu kĩmwe kya lĩu ũsu. 11#Alo 15.27 Ethĩwa ithyĩ tũvandĩte mbeũ ya kĩ-veva nthĩnĩ wenyu, nĩkũlya, nĩ ũndũ ũnene ethĩwa tũkaketha syĩndũ kuma kwenyu ila sya kũũ nthĩ? 12Ethĩwa andũ angĩ nĩmaĩlĩte kũkwata kĩndũ kuma vala mũĩ, ithyĩ nũndũ tũtaĩlĩte kũkwata mũno mbee?

Ĩndĩ ũu wĩ o vo, tũyaaenda kũtũmĩa ũkũmũ ũsu, ĩndĩ nĩtũmĩĩasya kĩla ũndũ nĩ kana tũikasiĩĩe ũnyaĩĩkya wa Ũvoo Mũseo wa Klĩsto. 13#Kũt 18.1 Inyw'ĩ nomwĩsĩ kana andũ ala mathũkũmaa Ĩkalũnĩ makwataa lĩu woo kuma o vau Ĩkalũnĩ, na kana athembi ala maumasya nthembo kĩthembeonĩ methĩawa na kĩlungu kyoo nthembonĩ isu? 14#Mat 10.10; Lk 10.7 Ũu now'o Mwĩai wĩaĩte kana andũ ala matavanasya Ũvoo Mũseo, nĩmaĩlĩte kũkwataa syĩndũ sya kwĩtethya nasyo kumana na kũtavany'a Ũvoo Mũseo.

15Ĩndĩ nyie ndyaaĩtya syĩndũ isu, o na ndikũandĩka valũa ũũ nĩtye syĩndũ. Nĩ kavaa ngakw'a kũte kũnenga mũndũ mwanya anziĩĩe ndikethĩwe na kĩtumi kya kwĩkathĩĩa. 16Ĩndĩ yĩla ngũtavany'a Ũvoo Mũseo nditonya kwĩkathĩĩa, nũndũ nĩaĩwe kwĩka ũu. Kyeva nĩ kwakwa ethĩwa ngalea kũtavany'a Ũvoo Mũseo! 17Kethĩwa ndethasya wĩa ũũ kwa kwenda kwakwa nĩthĩwa neteelaa kũĩvwa, ĩndĩ nĩũtethasya ta wĩa ũla naĩlĩte kũtethya, nũndũ nĩnĩũnengetwe nĩ Ngai nĩtethye. 18Kwoou ĩtuvi yakwa nĩ kyaũ? Nĩ kwĩthĩwa na mwanya wa kũtavany'a ũvoo mũseo vate kĩndũ ngũĩvĩthya, na ndekwĩtya kĩla naĩlĩte kũnengwa ta mũtavany'a wa Ũvoo Mũseo.

19Nyie nĩ mũndũ wĩ na ũthasyo, ndi ngombo ya mũndũ, ĩndĩ nĩtw'ĩkĩthĩtye ngombo ya andũ onthe, nĩ kana ndonye kũkusya aingĩ ũndũ vatonyeka. 20Kwa Ayuti nekalile ta Mũyuti, nĩ kana nĩkusye Ayuti. Kwa asu me ungu wa Mĩao ya Mwose, o na kau nyie ndi ungu wa Mĩao ĩsu, nekalile ta nĩ ungu wayo nĩ kana ndonye kũmakusya. 21O ta ũu kwa ala mate ungu wa Mĩao ya Ayuti nekalile ta nde ungu wa Mĩao ĩsu, nĩ kana ndonye kũkusya asu mate ungu wa Mĩao ĩsu. Ũu ti kwasya kana ndiatĩĩaa mĩao ya Ngai; kwa w'o nĩ ungu wa mĩao ya Klĩsto. 22Kwa ala me na mũĩkĩĩo mũvũthũ, nĩkalaa ta nĩ na mũĩkĩĩo mũvũthũ, nĩ kana ndonye kũkusya asu me na mũĩkĩĩo mũvũthũ. Ndw'ĩkĩte syĩndũ syonthe kwa andũ onthe, nĩ kana kwa nzĩa syonthe ndonye kũtangĩĩa amwe moo.

23Maũndũ asu onthe nĩkaa kwondũ wa Ũvoo Mũseo, nĩ kana nĩthĩwe na kĩanda nthĩnĩ wa moathimo maw'o. 24Inyw'ĩ nomwĩsĩ kana nthĩnĩ wa ĩthaũ ya kũsemba, andũ onthe ala masembete methĩawa maisindana, ĩndĩ no ũmwe ũkwataa mũthĩnzĩo wa kũsinda? Kwoou sembai mwĩminĩe mũtonye kũkwata mũthĩnzĩo. 25Kĩla mũthaũki wĩ kĩmanyĩsyonĩ ekalaa na wĩting'o maũndũnĩ onthe. Mekaa ũu mekĩwe ngovia ya ũsindi ĩtekalaa ĩvinda ĩasa, ĩndĩ ithyĩ twĩting'aa tũkwate ngovia ya ũsumbĩ yĩkalaa tene na tene. 26Kĩu nĩkyo kĩtumaa nĩsemba nzyaĩtye vala nĩendete kũminĩa; na nĩkyo kĩtumaa nĩkya ngundi ndeũkũna vathei. 27Nĩnĩvũaa mwĩĩ wakwa na kũũtw'ĩkĩthya ngombo yakwa, nĩ kana ndikese kwĩkw'a ũtee ĩtina wa kũtavya angĩ Ũvoo Mũseo.

Currently Selected:

1Ako 9: KAMBA

Highlight

Copy

Compare