1Ako 8

Ũvoo wa Malĩu ala Mathembeawa Ngai sya Mĩvw'anano

1Yu kwa tũsisye ũvoo ĩũlũ wa malĩu ala mathembeawa ngai sya mĩvw'anano.

Nĩtwĩsĩ kana ithyonthe twĩ na ũmanyi o tondũ andũ maasya. Ĩndĩ ũmanyi nũtumaa andũ mekathĩĩa, naw'o wendo nĩwakaa mũndũ. 2Mũndũ ũla wonaa ta ve kĩndũ wĩsĩ, ndethĩawa anamba kũmanya ũndũ waĩlĩte kwĩthĩwa esĩ. 3Ĩndĩ mũndũ ũla ũmwendete Ngai, ũsu nĩwĩsĩkĩwe nĩ Ngai.

4Kwoou ũvoo ĩũlũ wa kũya lĩu ũthembeetwe ngai sya mĩvw'anano, nĩtwĩsĩ kana kwa w'o ngai sya mũthemba ũsu iikw'o; nĩtwĩsĩ kana Ngai no ũmwe tũ. 5Nũndũ o na kau nokwĩthĩwe ngai isu ĩtunĩ kana kũũ nthĩ, o tondũ kwĩ, “ngai” mbingĩ na “eaĩi” aingĩ, 6ithyĩ kwitũ Ngai no ũmwe tũ, nake nĩ Asa, mũmbi wa syĩndũ syonthe, na ithyĩ twĩ vo nũndũ wake. O ta ũu Mwĩai no ũmwe, nake nĩ Yesũ Klĩsto, ũla kwondũ wake syĩndũ syonthe syoombiwe na kwondũ wake ithyĩ twĩ vo.

7Ĩndĩ o vamwe na ũu ti kĩla mũndũ wĩ na ũmanyi ũũ. Andũ amwe mamanyĩie maũndũ ma ngai sya mĩvw'anano weethĩa kũvika o nayu yĩla maya malĩu ma mũthemba ũsu, monaa meya lĩu wa ngai ya mũvw'anano, na nũndũ nĩ onzu, mew'aa nĩmeũvukw'a. 8Lĩu ndũtũthengeanĩasya na Ngai na kwoou vai wasyo twĩona twalea kũya lĩu ũsu, na vai ũtandĩthyo twĩona twaũya.

9Ĩndĩ ĩsũvĩei ũthasyo ũsu mwĩ na w'o, ndũkatume ala me na mũĩkĩĩo mũvũthũ maluluutĩka. 10Nũndũ ethĩwa mũndũ akakwona we mũndũ ũkwĩw'a wĩ na ũmanyi, ũkĩya lĩu ĩkalũnĩ ya ngai ya mũvw'anano, nĩkũlya, ethĩwa wasya wa ngoo wa mũndũ ũsu nĩ mwonzu, ndethangaaw'a kũya lĩu ũthembeetwe ngai sya mĩvw'anano? 11Kwoou mwana-a-asa ũsu mwonzu Klĩsto wakwie kwondũ wake, ayanangwa nĩ ũmanyi waku. 12Kwondũ wa ũu, yĩla mwavĩtĩsya Aklĩsto ala angĩ na kwananga wasya woo wa ngoo mwonzu, mwĩthĩawa mwamũvĩtĩsya Klĩsto. 13Kwoou ethĩwa lĩu nũtuma mwana-a-asa avalũka, ndikaya nyama ndikatume mwana-a-asa alika naĩnĩ.

Currently Selected:

1Ako 8: KAMBA

Highlight

Copy

Compare