1Ako 7

Ũvoo wa Kũtwaana

1Yu nĩtũsisye maũndũ ala mũnambandĩkĩie: Nĩ ũseo mũndũ kũlea kũtwaana. 2Ĩndĩ nĩ kana mũndũ ndakalike ũtatonĩ wa ũlaalai, kĩla mũndũ-ũme nĩwaĩlĩte kwĩthĩwa na kĩveti kyake mwene, na kĩla mũndũ mũka nĩwaĩlĩte kwĩthĩwa na mũũme wake mwene. 3Mũndũ-ũme nĩwaĩlĩte kwĩanĩsya mavata ma mũka ma kĩ-mũtwaano, na mũndũ mũka nake nĩwaĩlĩte kwĩanĩsya mavata ma mũũme ma kĩ-mũtwaano. 4Kĩveti kĩi na ũkũmũ ĩũlũ wa mwĩĩ wakyo, ĩndĩ nĩ mũũme wĩ naw'o; o ta ũu mũndũ-ũme nde na ũkũmũ ĩũlũ wa mwĩĩ wake, ĩndĩ nĩ mũka wĩ naw'o. 5Mũikavatane ene kwa ene, ate o yĩla mwĩw'anĩte kwĩka ũu vandũ va kavinda, nĩ kana mwĩnengane kũvoya, na ĩndĩ mũisyokeanĩa ĩngĩ Satani ndakakwate mwanya wa kũmũtata, nũndũ wa kwĩthĩwa mũtatonya kwĩyũmĩĩsya.

6Ũu namũtavya nĩ woni wakwa, ti mwĩao. 7Kwa w'o nenda kethĩwa andũ onthe mailyĩ takwa, ĩndĩ kĩla mũndũ e na mũthĩnzĩo wake wĩ mwanya kuma kwa Ngai; ũmwe mũthĩnzĩo wa mũthemba mũna, na ũngĩ mũthĩnzĩo wa mũthemba ũngĩ.

8Kwa ala matatwaanĩte na ala ndiwa, nyie nĩmea nĩ ũseo kwoo kwĩkala mũndũ e weka, o tondũ nyie nĩilyĩ. 9Ĩndĩ ethĩwa maitonya kwĩyũmĩĩsya, nĩmatwaane. Nĩ kavaa kũtwaana kũte mũndũ kwĩkalaa e na wendi mwingĩ mwĩĩnĩ wa ũndũ ũsu.

10 # Mat 5.32; 19.9; Mk 10.11-12; Lk 16.18 Namo ala matwaanĩte nĩngũmanenga mwĩao ũtaumĩte kwakwa ĩndĩ kwa Mwĩai: Kĩveti kĩyaĩlĩte kũtaanĩsya na mũũme, 11na ethĩwa nĩkĩũtaanĩsya nake kyaĩlĩte kwĩkala kĩ kyoka, kana ethĩwa ti ũu, nĩkĩw'anĩthw'e na mũũme wakyo. Nake mũndũ-ũme ndaĩlĩte kũlũngya mũka wake.

12Kwa andũ ala angĩ, nyie mwene eka Mwĩai nĩmea, ethĩwa mũndũ-ũme Mũklĩsto atwaĩte mũndũ mũka ũte Mũklĩsto, na mũndũ mũka ũsu nũkwenda aendee kwĩkalany'a nake, mũndũ-ũme ũsu ndaĩlĩte kũmũlũngya.

13Ethĩwa ve mũndũ mũka Mũklĩsto ũtwaĩtwe nĩ mũndũ-ũme ũte Mũklĩsto, na mũndũ-ũme ũsu nũkwenda kwĩkalany'a nake, mũndũ mũka ũsu ndaĩlĩte kũmũlea. 14Nĩkwĩthĩwa mũndũ-ũme ũla ũte Mũklĩsto nũtw'ĩkĩthaw'a mũtheu nũndũ mũka nĩ Mũklĩsto, na mũndũ mũka ũte Mũklĩsto nake nũtw'ĩkĩthaw'a mũtheu nũndũ mũũme nĩ Mũklĩsto. Kethĩwa ti ũu, syana syoo ila masyaa syĩthĩwa syĩ mbuku methonĩ ma Ngai, ĩndĩ kwĩanana na ũndũ kũilyĩ nĩ ntheu. 15Ĩndĩ o vamwe na ũu, ethĩwa ũla ũte Mũklĩsto nũkwenda kũtaanĩsya na ũla Mũklĩsto, ũu nĩwĩthĩwe. Maũndũnĩ ma mũthemba ũsu, Mũklĩsto, ethĩwa nĩ mũndũ-ũme kana nĩ mũndũ mũka, e na ũthasyo wa kũnyuva ũndũ ũkwenda. Ngai atwĩtie twĩkalae na mũuo. 16Wĩsĩ ata we kĩveti kana ũkatangĩĩa mũũme waku? Kana we mũndũ-ũme, wĩsĩ ata kana ũkatangĩĩa mũka waku?

Ĩkala Kwĩanana na ũndũ Ngai Wakwĩtie Ũilyĩ

17Kĩla ũmwe nĩaendee na kwĩkala mwĩkalo ũla Mwĩai ũmũnengete, na ayĩkala nthĩnĩ wa mwĩkalo ũla Ngai ũmwĩtĩe. Ũsu nĩw'o mwĩao wakwa ũla nĩmanyĩasya makanisanĩ onthe. 18Ethĩwa mũndũ eetiwe nĩ Ngai e mwaĩke, ndaĩlĩte kwenda kũveta mbano sya nzaĩko, na ethĩwa mũndũ eetiwe nĩ Ngai ate mwaĩke, ndaĩlĩte kwenda aĩkwe. 19Kwĩthĩwa mũndũ e mwaĩke kana ate mwaĩke ti kĩndũ; kĩla kya vata nĩ kwĩka ũndũ mĩao ya Ngai ĩkwasya. 20Kĩla mũndũ aĩlĩte kwĩkalaa mwĩkalonĩ ũla wailyĩ yĩla Ngai wamwĩtie. 21Nĩwĩthĩwa waĩ ngombo ũyĩtwa nĩ Ngai? Ndũkamake; ĩndĩ ũkona nzĩa wuma ũkombonĩ, no wĩke ũu.#7.21 ĩndĩ ũkona nzĩa wuma ũkombonĩ, no wĩke ũu: Kana ĩndĩ o na ethĩwa wĩna nzĩa ya kuma ũkombonĩ, wĩthĩwa wĩ ũseo ũkanyuva kũthũkũma nesa mbee wĩ o ngombo 22Nũndũ ũla wĩtĩtwe nĩ Mwĩai e ngombo nũtw'ĩkĩte mũndũ wa Mwĩai mũthasye. O ta ũu nake ũla ũtaĩ ngombo ayĩtwa nĩ Klĩsto atw'ĩkĩte ngombo yake. 23Mwathooiwe na thooa mũnene; mũikatw'ĩke ngombo sya andũ. 24Kwoou mbaitũ, kĩla ũmwe, o ũndũ wailyĩ ayĩtwa nĩ Ngai, nĩekale oou e vamwe na Ngai.

Ũvoo wa Ndiwa na Andũ ala Matatwaanĩte

25Yu naw'o ũvoo wa andũ ala matatwaanĩte, nyie ndyĩsĩ mwĩao kuma kwa Mwĩai ũneenete ĩũlũ woo, ĩndĩ nyie ta mũndũ nĩngũnengane woni wakwa, ta nĩ ũmwe ũla kwĩsĩla teinĩ wa Mwĩai ndonya kũĩkĩĩwa. 26Kwa kũsisya thĩna ũla wĩkw'o, nyie nĩona nĩ ũseo mũndũ ekale o ũndũ ũilyĩ. 27Nĩwĩthĩwa ũtwaanĩte? Ndũkalũngye mũka waku. Nĩwĩthĩwa ũtatwaanĩte? Ndũkatate kũmantha kĩveti. 28Ĩndĩ ũkatwaana ndwĩthĩwa weeka naĩ, na mwĩĩtu nake akatwawa ndethĩwa eeka naĩ. Ĩndĩ o vamwe na ũu ala matwaanaa, makeethĩwa na mathĩna maingĩ ma kũũ nthĩ, na nyie nĩenda kũmũkĩsya mathĩna asu.

29Kĩla ngũweta mbaitũ nĩ kana ĩvinda yĩla yĩtiele nĩ ĩkuvĩ mũno; kuma yu ala matwaanĩte nĩmekale ta matatwaanĩte. 30Ala mekũĩa nĩmekale ta mate na kĩĩo; ala meũtana nĩmekale ta mate na ũtanu; ala mathooaa syĩndũ nĩmekale ta vate kĩndũ mathooete, 31namo ala mathũkũmanaa na maũndũ ma nthĩ ĩno, mayĩkala ta mate na wĩa na maũndũ ma nthĩ ĩno, nũndũ mwĩkalĩle wa nthĩ ĩno nũũthela.

32Nyie nĩenda mũikethĩwe mũithĩnĩka. Mũndũ ũla ũtatwaanĩte athĩnĩkĩaa wĩa wa Mwĩai, nĩkwĩthĩwa emantha ũndũ ũkũmwendeesya Mwĩai. 33Ĩndĩ nake mũndũ ũla ũtwaanĩte athĩnĩkĩaa maũndũ ma nthĩ ĩno, nĩkwĩthĩwa emantha ũndũ ũkũmwendeesya mũka, 34na kwoou wendi wake nĩ mũaanĩku. O nake mũndũ mũka ũla ũtemũtwae kana mwĩĩtu, athĩnĩkĩaa wĩa wa Mwĩai nĩkwĩthĩwa emantha ũndũ ũkwĩyĩkalya e mũtheu mwĩĩnĩ na thayũnĩ, ĩndĩ mũndũ mũka ũla mũtwae athĩnĩkĩaa maũndũ ma nthĩ ĩno, nĩkwĩthĩwa emantha ũndũ ũkũmwendeesya mũũme.

35Nyie nĩneena ũu nũndũ nĩenda kũmũtethya; ndiũmũsiĩĩa kwĩka ũndũ mũkwenda, ĩndĩ nĩenda mwĩkale nesa na kũmũthũkũma Mwĩai mũte na ngoo mbaanĩku.

36Ethĩwa mũndũ eona ndekwĩka mwĩĩtu ũla mevaanĩtye nesa kwa kũvanga kũlea kũmũtwaa, na mwĩĩtu ũsu aendee na ũkũa; ethĩwa nũkwĩw'a akĩmwenda mũno na no nginya makatwaana, nĩeke kwĩanana na kwenda kwake; nĩmatwaane, ti naĩ. 37Ĩndĩ nake mũndũ ũla ũvangĩte ngoonĩ yake vate kũingĩĩw'a ndakatwaane, na kwa ngenda yake ũtw'ĩte vyũ ngoonĩ yake mwene ndakatwae mwĩĩtu ũla mevaanĩtye, mũndũ ũsu o nake ethĩawa eeka nesa. 38Kwoou mũndũ ũla ũtwaanaa ekaa nesa, ĩndĩ nake ũla ũleaa kũtwaana ethĩawa eeka nesa mbee.

39Kĩveti kĩthĩawa kĩ kyove nĩ mĩao kwa mũũme ĩvindanĩ yĩla mũũme wĩ thayũ. Ĩndĩ mũũme akakw'a, kĩthĩwa na ũthasyo wa kũtwawa nĩ mũndũ ũla kĩkwenda, ĩndĩ no nginya akethĩwa e Mũklĩsto. 40Ĩndĩ kwa woni wakwa, wĩthĩwa wĩ ũseo mbee kĩkekala ũu, na nĩĩkwatya nĩneena ũu ndongoew'e nĩ Veva wa Ngai.

Currently Selected:

1Ako 7: KAMBA

Highlight

Copy

Compare