1Ako 6

Kũtwaana Kotinĩ kwa Aklĩsto

1Yĩla ũmwe wenyu wĩ na ũndũ na Mũklĩsto ũngĩ, atonya ata kũmũtwaa kotinĩ akasilĩlwe nĩ mũsili wa makoani ũte mũĩkĩĩi, vandũ va kũthi kũmũsikata kwa aĩkĩĩi? 2Mũyĩsĩ kana aĩkĩĩi nĩmo makasilĩla nthĩ? Na ethĩwa ĩndĩ ninyw'ĩ mũkasilĩla nthĩ, nĩkĩ mũtatonya kumya ũtw'ĩo ĩũlũ wa tũmaũndũ tũnini? 3Inyw'ĩ nomwĩsĩ kana tũkasilĩla alaĩka? Kwoou nĩtwaĩlĩtwe kwĩthĩwa tũtonya mũno mbee kũsilĩla maũndũ ma thayũ ũũ! 4Yĩla makoani ma mũthemba ũsu maumĩla, nĩkĩ mũmatwaa makasilwe nĩ andũ matesĩkĩwe nĩ ĩkanisa? 5Mwaĩlĩte kwĩw'a nthoni mũno. Mwĩenda kwasya vai mũndũ ũmwe mũĩ katĩ wenyu ũtonya kũsila makoani katĩ wa Aklĩsto? 6Atĩ Mũklĩsto akwatĩte kũtwaa Mũklĩsto ũngĩ kotinĩ makasilanw'e nĩ andũ mate aĩkĩĩi!

7Kũtwaanaa kotinĩ mũkasilanw'e nĩkwonany'a kana mwĩ avalũku vyũ. Ti kavaa mũkavĩtĩw'a ne inyw'ĩ? Ti kavaa mũivenwa syĩndũ ne inyw'ĩ? 8Ĩndĩ ninyw'ĩ mũkwĩkana naĩ na kũvenana syĩndũ; o na mwĩĩka ũu kwa Aklĩsto ala angĩ. 9Nomwĩsĩ kana andũ ala mate alũngalu maikalika ũsumbĩnĩ wa Ngai? Mũikakengeke; andũ ala mekalaa mwĩkalo mũthũku wa ũlaalai, kana mathaithaa ngai sya mĩvw'anano, kana ilaalai, kana aũme ala mamanyanaa kĩ-mwĩĩ na aũme angĩ, 10kana ing'ei, kana andũ me ĩtomo, kana athengi, kana andũ ala maneeneaa ala angĩ naĩ, kana avutani; asu onthe vai ũmwe ũkalika ũsumbĩnĩ wa Ngai. 11Amwe menyu mwailyĩ ũu. Ĩndĩ nĩmwathambiw'e na mwathew'a naĩ syenyu, na mwatw'ĩkĩthw'a alũngalu kwa vinya wa Mwĩai Yesũ Klĩsto na wa Veva wa Ngai waitũ.

Kumyai Ngai na Mĩĩ Yenyu

12 # 1Ako 10.23 Mũndũ nũtonya kwasya, “Nĩnĩtĩkĩlĩtw'e kwĩka ũndũ o na wĩva.” Ĩndĩ ti kĩla ũndũ wĩ ũtethyo kwaku. Nĩndonya kwasya nĩnĩtĩkĩlĩtw'e kwĩka ũndũ o na wĩva, ĩndĩ ndyĩtĩkĩla kũtw'ĩka ngombo ya ũndũ o na wĩva. 13Mũndũ ũngĩ o nake nũtonya kwasya, “Lĩu wĩvo kwondũ wa ĩvu, na ĩvu yĩ vo kwondũ wa lĩu,” ĩndĩ Ngai akaimina syonthe vamwe. Mwĩĩ ndwĩ vo kwondũ wa kwĩka ũlaalai, ĩndĩ kwondũ wa ũthũkũmi wa Mwĩai; nake Mwĩai nĩwe ũnengae mwĩĩ kĩla kĩwaĩlĩte. 14Ngai nĩwathayũũkisye Mwĩai kuma kwa akw'ũ, na akatũthayũũkya o ta ũu kwa ũtonyi wake.

15No mwĩsĩ kana mĩĩ yenyu nĩ mamutha ma mwĩĩ wa Klĩsto! Kwoou nose ĩmutha ya mwĩĩ wa Klĩsto nĩyĩtw'ĩkĩthye ĩmutha ya mwĩĩ wa ĩlwaya? Aiee! Ũu ndũtonyeka! 16#Mwa 2.24 Kana nomwĩsĩ mũndũ akwatana na ĩlwaya atw'ĩkaa mwĩĩ ũmwe nayo? Nĩkwĩthĩwa o tondũ Maandĩko Matheu maĩtye, “Me elĩ makatw'ĩka kĩndũ kĩmwe.” 17Ĩndĩ ũla wakwatanw'a na Mwĩai atw'ĩkaa kĩndũ kĩmwe nake kĩ-veva.

18Mũikethĩwe na mwĩkalo wa ũlaalai o na vanini. Naĩ ila ingĩ mũndũ wĩkaa iyĩkaa mwĩĩ wake ũndũ, ĩndĩ mũndũ ũla wĩkaa ũlaalai ethĩawa aivĩtĩsya mwĩĩ wake. 19#1Ako 3.16; 2Ako 6.16 Nomwĩsĩ kana mĩĩ yenyu nĩ ĩkalũ ya Veva Mũtheu, ũla ũtwĩe nthĩnĩ wenyu na mwamũnengiwe nĩ Ngai? Mũi menyu ene; 20nĩmwathooiwe na thooa mũnene, kwoou kumyai Ngai na mĩĩ yenyu.

Currently Selected:

1Ako 6: KAMBA

Highlight

Copy

Compare