MEKO MA ATŨMWA 27
27
Kyalo kya Vaulo kĩw’ũnĩ aelete Lomi: Kilete
1 #
Meko 25.12. Na kwatw’ĩtwe kana tũende na ngalawa Italia, mamũnengane Vaulo na ovwa angĩ amwe kwa mũnene wa asikalĩ ĩana wetawa Yuliusi, wa nguthu ya Aukusito. 2#Meko 19.29; 20.4.Na twavota ngalawanĩ ya ku Atilamitio, ĩla yakilĩlye ũkũsya ĩthi kũndũ kwingĩ ũtee wa nthi ya Asia, na twathi na ũkanga, na Alisitaliko, mũndũ wa Masetonia wa ndũa ya Thesalonika, eethĩwa vamwe naitũ. 3#Meko 24.23; 28.2. Na mũthenya wa kelĩ twavika Sitoni: na Yuliusi amwĩka Vaulo nesa, na amũnenga ũthei athi kwa anyanyae nĩ kana evuũkye. 4Na twathi ĩngĩ na ũkanga kuma kw’o, twaenda na ũtee ũla ũkilĩtye wa kĩthama kya Kuvolo, nũndũ iseve syaumie na mbee. 5Na twakĩla ũkanga ũla wĩ ngalĩ ya Silisia na Vambilia, twavika Mila, ndũa ya Lisia. 6Na ku ũla mũnene wa asikalĩ ĩana oona nga awa ya Ũalesandalia ĩendete Italia; na atũlikya vo. 7Na twathi kavola kavola mĩthenya mingĩ, twathi na vinya twesa ũthengeea Kinito, na kĩseve kyatũsiĩĩa, twathi ũtee ũla ũkilĩtye wa Kilete, twelekele Salimone; 8na twathi na vinya ũtee wakyo twavika vandũ vetawa Ũthũmũo Mũseo; na vakuvĩ na vo vaĩ ndũa yĩtawa Lasea.
Na Melita; kĩuutani kĩnene; na kwanangĩka kwa ngalawa
9 #
2 Ako 11.25,26; Ali 16.29. Na ĩvinda ĩasa yavĩta, na kũthi na ngalawa ĩvinda yĩu kwaĩ na mũisyo, nĩkwĩthĩwa o na ĩvinda ya kũtĩĩa kũya yaĩ yĩnavĩta, Vaulo amataa, 10aimea, Mavwana, nĩngwona kana mũendo ũũ ũkeethĩwa wa ũnyamao na wasyo mwingĩ, na ti mũisyo wa mĩio na ngalawa syoka, ĩndĩ wa mathayũ maitũ namo. 11Ĩndĩ ũla mũnene wa asikalĩ ĩana nĩwamethũkĩĩsye mũtwai na mwene wa ngalawa, mbee wa maũndũ ala maneeniwe nĩ Vaulo. 12Na nĩkwĩthĩwa kĩthũmũo kĩtiaĩ kĩnene kya kwĩkala myei ya mbevo, ala aingĩ moo masya mathi na ũkanga kuma kw’o, nongo mavike Vinisi, mekale kw’o myei ya mbevo; nakyo nĩ kĩthũmũo kya Kilete, ngalĩ ya ĩũlũ kwelekela wumĩlonĩ wa syũa, na ngalĩ ya ĩtheo kwelekela wumĩlonĩ wa syũa. 13Na kĩseve kya ngalĩ ya ĩtheo kyauutana kavola, matalĩlya ta moona ũndũ mekwenda, mambatya nanga na makũsya maikyamana na Kilete, vakuvĩ na ũtee wa ũkanga. 14Ĩndĩ ĩtina wa ĩvinda yĩte ĩasa, kyamatheeea kĩseve kyai mũno, kĩla kĩtawa Eulakulo; 15na ngalawa yakwatwa nĩ kĩseve, na yaemwa nĩ ũkyelekela, twamĩeka, na twatwawa nĩkyo. 16Na tũitwawa twavika ũtee ũla ũkilĩtye wa kĩthama kĩnini kĩtawa Kauta, nĩtwoonie vinya kũlũmya kakalawa: 17na makatũlya ĩũlũ, malũlũmĩlya ngalawa, kwa ũvĩtĩlya makanda ungu wayo; na maikĩa maikalũme kĩthangathĩni kĩtawa Siliti, matheesya ngũa sya ngalawa sya ũkwata kĩseve, na ũu matwawa nĩ kĩseve o kũla kĩkwenda. 18Naitũ tũkĩnyamaw’a mũno nĩ kĩuutani mũthenya wa kelĩ mambĩlĩlya kwĩkya mĩio ĩla makuĩte ũkanganĩ; 19na mũthenya wa katatũ mekya syĩndũ sya ngalawa na moko moo ene. 20Na syũa na ndata ityaatũkenea mĩthenya mingĩ, na ũndũ kĩuutani kyaĩ kĩnene ĩũlũ waitũ, kwavetwa wĩkwatyo w’onthe wa ũvĩta. 21Na mekalĩte ĩvinda ĩasa mateũya lĩu, nĩvo ĩndĩ Vaulo waũngamie katĩ woo, na asya, Mavwana, nĩmwaaĩlwe nĩ ũmbĩw’a, na kũlea kuma Kilete, mũikoneke nĩ ũnyamao ũũ na wasyo. 22Na yu nĩmũtaa mwĩthĩwe mwĩ kwa ũmwe anyiau; nũndũ kũikethĩwa kwaa thayũ kwa ũmwe katĩ wenyu, ate o ngalawa yoka. 23Nũndũ ũtukũ ũũ wa ũmũnthĩ mũlaĩka wa Ngai ũla nĩ wake, na ũla nĩthũkũmaa, nũũngamie ũtee wakwa, 24#Meko 23.11.aiasya, Ndũkakĩe, Vaulo; ndũtĩa kũũngama mbee wa Kaisali: na sisya, Ngai nũkũnengete onthe ala maendete vamwe naku. 25Kwondũ wa ũu, mavwana, ĩthĩwai na ũnyiau: nũndũ nĩngũmwĩtĩkĩla Ngai, kana kũkeethĩwa o ũndũ nĩiwe. 26#Meko 28.1.Ĩndĩ tũitĩa kwĩkw’a kĩthamanĩ kĩmwe.
27Ĩndĩ ũtukũ wa ĩkũmi na kana wavika, tũkĩtwawa kũũ na kũũ ũkanganĩ wa Atilia, ta ũtukũ katĩ atwai ma ngalawa matalĩlya kana nĩmeũthengeea nthĩ ĩmwe: 28na mathima ũliku wa manzĩ, meethĩa nĩ mĩkono mĩongo nyanya; na ĩtina vandũ vanini, mathima ĩngĩ, meethĩa nĩ mĩkono mĩongo thanthatũ. 29Na tũikĩa tũikekw’e ngoongonĩ sya mavia, mekya nanga inya sya ĩtina wa ngalawa, na mambĩlĩlya kũvoya kũkye. 30Na atwai ma ngalawa makyenda kũkĩa kuma ngalawanĩ, matheetye kakalawa ũkanganĩ, ta mekwĩkya nanga sya mbee sya ngalawa, 31Vaulo amwĩa ũla mũnene wa asikalĩ ĩana na asikalĩ, Ethĩwa aa matikwĩkala ngalawanĩ, inyw’ĩ nenyu mũitonya kũvĩta. 32Na ĩndĩ asikalĩ matila makanda ma kakalawa, na makaeka kavalũka. 33#Meko 27.27.Na kũikya, Vaulo amesũva onthe kana maye lĩu, aiasya, Ũmũnthĩ nĩ wa ĩkũmi na kana mweteele na kũlea ũya, o na mũiaaya kĩndũ o na kĩva. 34#1 Sam 14.45; 2 Sam 14.11; Mt 10.30.Na kwa ũu nĩngũmwĩsũva mũye: nũndũ ũu nĩ kwondũ wa ũtangĩĩo wa mĩĩ yenyu: nũndũ vai ũsw’ĩĩ ũmwe wa mũtwe wa ũmwe wenyu o na wĩva wĩaa. 35#Yoa 6.11; 1 Tim 4.4; Lk 22.19.Na aneena ũu, oosa kĩmũtũ, amũtũngĩĩa Ngai mũvea onthe mene; na akĩtila, na ambĩlĩlya ũya. 36Na ĩndĩ onthe matana, namo moosa kya ũya kyoo ene. 37Naitũ ithyonthe ala twaĩ ngalawanĩ ũtalo witũ wavikĩte andũ maana elĩ na mĩongo mũonza na thanthatũ. 38Nao maya mavũna, manyivya mĩio ya ngalawa, makĩkya nganũ ũkanganĩ. 39Na kwakya, maiaamanya, nthĩ ĩsu: ĩndĩ moona kyoko kĩmwe kĩ na kĩvũngĩĩo, na masũanĩa ethĩwa nĩmatonya kũmĩete ngalwa nesa ĩũlũ wakyo. 40Na matila ila nanga, maitia ũkanganĩ, na ĩvinda o yĩu mathasya makanda ala movete sukani; na mambatya ngũa ya mbee ĩkwate kĩseve, mathi maelete kivũngĩĩonĩ. 41Ĩndĩ mavika vala vakomanĩe maũkanga elĩ, maaĩĩsya ngalawa mũthanganĩ; na mũthya wa ngalawa walũma wekala ũteũthingithanga, ĩndĩ mũthya wa ĩtina wamunda ũtũlangw’a nĩ vinya wa itulumo. 42Na kũsũanĩa kwa asikalĩ kwaĩ kũaa ovwa onthe, maikathambĩe, makĩe. 43Ĩndĩ ũla mũnene wa asikalĩ ĩana, akyenda kũmũtangĩĩa Vaulo, amasiĩĩa maikeke ũndũ mendaa; na ameaĩa kana ala matonya kũthambĩa meyĩkye ũkanganĩ, mambe ũvika mũthanganĩ; 44#Meko 27.22–25.na ala angĩ, amwe mbwaũnĩ, na angĩ syĩndũnĩ ingĩ sya ngalawa. Na kwa ũu, onthe mavonoka mavika mũthanganĩ.
Currently Selected:
MEKO MA ATŨMWA 27: Mbivlia
Highlight
Copy
Compare
Share
Want to have your highlights saved across all your devices? Sign up or sign in
https://shop.biblesociety-kenya.org/
www.biblesociety-kenya.org
God's word open for all
©Bible Society of Kenya, 1956
