MEKO MA ATŨMWA 28
28
Vaulo e Melita
1Na twavonoka, nĩvo ĩndĩ twamanyie kana nĩ kĩthama kĩla kĩtawa Melita. 2Na ene ma kw’o matwon’ya ũseo mũnene: nĩkwĩthĩwa nĩmavuvie mwakĩ, na matwosa ithyonthe, nũndũ wa mbua ĩla yauie, na mbevo ĩla yai kw’o. 3Ĩndĩ Vaulo aunĩte mũio wa ngũ na ekya mwakinĩ, nzoka mbai yauma ila ngũnĩ nũndũ wa muutĩa, yamũũma kw’oko. 4Na andũ ma kw’o moona ĩla nzoka ĩniinĩte kw’okonĩ kwake, masya ene kwa ene Nĩ w’o mũndũ ũsu nĩ mũaani, nake, o na kau avĩta ũkanganĩ, Ũla ũsilaa katĩ ndanetĩkĩla ekale thayũ. 5#Mko 16.18.Ĩndĩ we amĩvuunzĩa ĩla nzoka mwakinĩ, na ndaaona ũthũkyo. 6#Meko 14.11.Ĩndĩ mo meeteela aimbe kana kũvalũka nthĩ mĩtũkĩ, o ĩmwe, e mũkw’ũ: ĩndĩ meeteela ĩvinda ĩasa, na malea kwona ũndũ ũthũku ũimũkwata, maalyũla ililikano syoo masya kana we nĩ ngai.
7Na vakuvĩ na vandũ vau vaĩ mĩũnda ya mũndũ mũnene wa kĩthama wetawa Vuvilio; ũla watwosie, na atũthokya na ngoo ya ũnyanya, mĩthenya ĩtatũ. 8Na kweethĩwa, ĩthe wa Vuvilio aĩ mũwau mũno ndetema na kwĩtũũa nthakame: na Vaulo alika kwake, na avoya, na amwilĩĩla moko make amũvosya. 9Na kweekwa ũu, angĩ nao ma kĩthama kyu ala maĩ na mowau mooka, na mavow’a: 10namo matũtaĩa na ndaĩa nyingĩ; na tũikũsya, matwĩkĩĩa ngalawanĩ syĩndũ ila twaĩ vata nasyo.
Kyalo kya kũthi Lomi kyaendeea
11Na ĩtina wa myei ĩtatũ twakũsya twĩ ngalawanĩ ya Ũalesandalia ĩla yekalĩte kĩthamanĩ kyu myei ya mbevo, nayo syĩtwa yayo nĩ Ndiosikuli. 12Na twavika Silakuse, twekala kw’o mĩthenya ĩtatũ. 13Na kuma vau twathyũlũlũka twavika Lekio: na ĩtina wa mũthenya ũmwe kiseve kyookĩla kuma ngalĩ ya ĩtheo, na mũthenya wa kelĩ twavika Vutiolo: 14na vau twoona ana‐a‐asa, nao matwĩsũva twĩkale nao mĩthenya mũonza: na twavika Lomi ta ũu. 15Na ana‐a‐asa ma vo, meew’a kana nĩtũkĩte kw’o, mooka ũtũthaũa kũvika kĩng’ang’a kya Aivu, na Mĩkawa Ĩtatũ; nake Vaulo amona, amũtũngĩa Ngai mũvea, na ngoo yalũlũmĩla.
16 #
Meko 27.3. Na twalika Lomi, ũla mũnene wa asikalĩ ĩana amanengane ovwa mokonĩ ma mũnene wa nguthu ya asũvĩi; ĩndĩ Vaulo nĩwanengiwe ũthei wa kwĩkala vandũ vake mwene vamwe na mũsikalĩ ũla wamũsũvĩaa.
Vaulo aineenan’ya na Ayuti Lomi
17 #
Meko 23.1. Na kweethĩwa, ĩtina wa mĩthenya ĩtatũ ameta ala maĩ anene ma Ayuti mombane: na moombana, amea, Nyie, ana‐a‐asa, o na kau ndyaaĩka ũndũ ĩũlũ wa andũ maitũ, kana ũndũ ũtosana na syĩthĩo sya aasa maitũ, ĩndĩ nanenganiwe mokonĩ ma Alomi nĩ mwove kuma Yelusaleme: 18nao, mamina ũngũlya, menda ũnthasya nĩkwĩthĩwa kũiaaoneka ũndũ kwakwa ũtuma nũawa. 19#Meko 25.11.Ĩndĩ yĩla Ayuti makananĩsye makĩlea, nething’ĩĩsye kũmwĩkaĩla Kaisali; ti atĩ naĩ na ũndũ wa ũmĩvinganĩsya mbaĩ yakwa naw’o. 20#Meko 26.6,7.Kwondũ wa ũu ĩndĩ, nĩnamwĩtie nĩmwone na kũneena nenyu: nũndũ nyie novetwe na mũnyololo ũũ kwondũ wa wĩkwatyo wa Isilaeli. 21Nao mamwĩa, Tũiaaosa mavalũa ma ũvoo waku kuma Yutia, o na kũiaaũka o na ũmwe wa ana‐a‐asa vaa, aetete ũvoo waku kana kũneena ndeto nthũku ĩũlũ waku. 22#Meko 24.14; Lk 2.34.Ĩndĩ nĩtũkwenda kwĩw’a kuma kwaku ũndũ ũkwasya: nũndũ kĩthemba kyu nĩkĩsĩkĩwe kwitũ kana nĩkĩwetawa naĩ kũndũ kw’onthe.
23Na matianĩa kyathĩ nake, mathi nyũmba ĩla wekalĩte andũ aingĩ mũno; amavuanĩsya na kumya ũkũsĩ wa maũndũ ma ũsumbĩ wa Ngai, na aimathing’ĩĩsya ũvoo wa Yesũ, kuma mĩaonĩ ya Mose na mavukunĩ ma athani, kuma kĩoko kũvika wĩoo. 24Na amwe nĩmeetĩkĩlile maũndũ ala maneeniwe, na angĩ maiaaĩtĩkĩla. 25Na meethĩwa matekwĩw’ana ene kwa ene, maithi Vaulo amatavya ndeto ĩno ĩmwe, Veva Mũtheu nĩwaneenie nesa na aaĩthe menyu, na kanyw’a wa mwathani Isaia, 26#Isa 6.9,10; Mt 13.14; Mko 4.12; Yoa 12.40.akyasya,
Enda kwa andũ aa, ũkasye,
Kwĩw’a mũkeew’a, o na mũikamanya nongi;
Na kũsisya mũkasisya, o na mũikona nongi:
27Nũndũ ngoo sya andũ aa nĩ nenevu,
Na matũ moo nĩmew’aa na vinya,
Na metho moo nĩmalalĩtye;
Maikese kwona na metho moo,
Na kwĩw’a na matũ moo,
Na kũmanya na ngoo syoo,
Na kwĩalyũla,
Na ngamavosya.
28 #
Sav 67.2; 98.3; Lk 3.6; Meko 13.46. Na ĩndĩ nĩkũmanyĩke kwenyu, kana ũtangĩĩo ũũ wa Ngai nũtwaĩtwe kwa Andũ‐ma‐mbaĩ‐ingĩ: namo makawĩw’a. 29Na aneena ndeto isu, Ayuti maumaala, me na ngananĩo nyingĩ ene kwa ene.
Ũvoo Mũseo ũkĩtavanw’a Lomi ũte kĩsiĩĩi
30Nake ekala myaka ĩlĩ mĩima nyũmbanĩ yake mwene ĩla wathooete wikalo, na amosa onthe ala mavotaa kwake, 31#Meko 1.3; 28.23.aitavan’ya ũvoo wa ũsumbi wa Ngai, na kũmanyĩsya maũndũ ma Mwĩaĩi Yesũ Klĩsto na ũnyiau w’onthe, ateũvatwa nĩ mũndũ.
Currently Selected:
MEKO MA ATŨMWA 28: Mbivlia
Highlight
Copy
Compare
Share
Want to have your highlights saved across all your devices? Sign up or sign in
https://shop.biblesociety-kenya.org/
www.biblesociety-kenya.org
God's word open for all
©Bible Society of Kenya, 1956
