MEKO MA ATŨMWA 26
26
Vaulo aineena mbee wa Akiliva
(MEKO MA ATŨMWA 9.1–19; 22.6–16)
1Na Akiliva amwĩa Vaulo, Wĩ na ũthei wa kwĩneenea mwene. Na ĩndĩ Vaulo atambũũkya kw’oko kwake, na eeneenea mwene:
2Nĩngwĩtala mwene kwĩthĩwa na ũtanu, mũsumbĩ Akiliva, nĩkwĩthĩwa nĩnanengwa kwĩneenea mbee waku ũmũnthĩ ũndũ wa maũndũ onthe ala nĩvinganĩĩw’e nĩ Ayuti: 3na mbee nũndũ we wĩ mũmanyi mũĩ wa syĩthĩo syonthe na mokũlyo onthe ma Ayuti: kwondu wa ũu nĩngũkwĩsũva ũmbĩthukĩĩsye na wũmĩĩsyo. 4Ayuti onthe nĩmesĩ, mwĩkalĩle wa thayũ wakwa kuma nĩ kavĩsĩ, kuma mwambĩlĩlyonĩ katĩ wa mbaĩ yakwa, na ku Yelusaleme; 5#Meko 23.6; Avi 3.5.nĩmambĩsĩ mũno kuma tene ethĩwa nĩmekwenda kũneena ũkũsĩ, kana nyie naĩ Mũvalisi kũatĩĩa na kwĩanĩsya kĩthemba kya ũthaithi witũ ũla mũmũ mbee. 6#Meko 28.20.Na yu nĩngũũngama vaa nĩsilĩlwe kwondũ wa wĩkwatyo wa watho ũla Ngai wamathie aasa maitũ; 7#Meko 24.15.na kwaw’o mbaĩ sitũ ĩkũmi na ilĩ nĩsyĩkwatasya kwĩthĩwa ikavikĩa, ikĩmũthũkũma Ngai na ũthangaau ũtukũ na mũthenya. Na ũndũ wa wĩkwatyo ũũ, mũsumbĩ, nĩngũvinganĩw’a nĩ Ayuti! 8Nĩkĩ mũkwona nĩ ũndũ ũtetĩkĩlĩka, kana Ngai athayũũkasya akw’ũ? 9Nĩ w’o nyie mwene nĩnoonie kana nĩnaĩlwe nĩ kwĩka maũndũ maingĩ mavĩtanĩte na syĩtwa ya Yesũ wa Nasaleti. 10Nakwa nĩneekie ũu Yelusaleme: na namavingie aingĩ ma ala atheu makolokolonĩ, nosete ũkũmũ kwa athembi anene, na maiũawa wasya wakwa waĩ vo ĩũlũ woo. 11Na ngĩmathĩn’ya kaingĩ masinakokenĩ onthe, natatie kũmaumĩthya Ngai; na kwa kwĩthĩwa namathatĩe mũno, namathĩn’ya o na kũvika ndũa sya ũeninĩ. 12Na ngĩka maũndũ asu, yĩla naendete Ndamasiku nĩ na ũkũmũ na ũtũme wa athembi anene, 13mũthenya katĩ, mũsumbĩ, nonie nzĩanĩ kyeni kuma ĩtunĩ, kĩthonokete ũtisu wa syũa kĩikena ngalĩ syonthe syakwa na sya ala maendete vamwe nakwa. 14Na twavalũka nthĩ ithyonthe, newie wasya ũineena nakwa kĩthyomonĩ kya Kĩevelania, ũiasya, Saulo, Saulo, nĩkĩ ũũnthĩn’ya? Nĩ vinya kwaku kũtheela mũsenge. 15Nakwa nasya, Nue ũũ, Mwĩaĩi? Na Mwĩaĩi anzũngia, Ninyie Yesũ ũla ũũthĩn’ya. 16#Esek 2.1,2.Ĩndĩ ũkĩla, ũũngame na maũũ maku: nũndũ nakumĩlĩla kwondũ wa ũndũ ũũ, kũkwia we wĩthĩwe mũthũkũmi na ngũsĩ ya maũndũ asu ala wambona nyie nĩ nthĩnĩ wamo, na ya maũndũ ala nthĩnĩ wamo ngakumĩlĩla: 17#Yel 1.7; 1 Mav 16.35.ngiũtangĩĩa kwa andũ ma mbaĩ yaku, na kwa Andũ‐ma‐mbaĩ‐ingĩ, ala ngũũtũma kwamo, 18#Isa 35.5; 42.7,16; Meko 20.32; Aev 2.2; Ako 1.13.kũmasalukya metho moo, nĩ kana methyũũe na kũkĩtia kĩvindu makyelekele kyeni, na kũeka ũkũmũ wa Satani na ũmwelekela Ngai, nĩ kana mose ũekeo wa naĩ, na ũtiĩwa vamwe na onthe ala mavathanĩtw’e kwondũ wa mũĩkĩĩo ũla wĩ kwakwa. 19#Aka 1.16.Nĩvo ĩndĩ, mũsumbĩ Akiliva, ndyaatw’ika mũlei wa ũla woni waumie ĩtunĩ: 20#Mt 3.8.ĩndĩ mbee natavanisye kwa ala ma Ndamasiku, na Yelusaleme, na ku kw’onthe nthĩ ya Yutia, na kwa Andũ‐ma‐mbaĩ‐ingĩ nao, kana mealyũle na ũmwelekela Ngai, mekae meko mosanĩte na kũalyũla ngoo kwoo. 21#Meko 21.30,31.Kwondũ wa ũu Ayuti mangwatĩa ĩkalũnĩ na menda ũmbũaa. 22#Lk 24.44–47.Ĩndĩ nĩkwĩthĩwa nosete ũtethyo ũla wumaa kwa Ngai, nĩũngeme kũvika ũmũnthĩ ngĩnenga ũkũsĩ anene na anini nao, o na ndiũneena ũndũ, ate o ũla athani na Mose maisye ũkoka: 23#1 Ako 15.20.wa atĩ ũndũ Klĩsto nde ndĩi ya ũlea kũthĩnw’a, na ũndũ we ũkamba kũthayũũkw’a kwa akw’ũ na kũtavan’ya kyeni kwa andũ ma mbaĩ yaitũ na kwa Andũ‐ma‐mbaĩ‐ingĩ.
24Na akĩneena ũu, Vesito amwĩa na wasya mũnene, Vaulo, wĩ na ndũũka; kũsoma waku kwingĩ nĩkũũkũalyũkĩla ndũũka. 25Ĩndĩ Vaulo asũngĩa, Nyie ndi na ndũũka, we Vesito mũtaĩwa, ĩndĩ nĩneena ndeto sya w’o na sya kĩlĩko. 26#Yoa 18.20.Nũndũ mũsumbĩ nĩwĩsĩ ũvoo wa maũndũ asu, nakwa nĩneena nake vyũ: nũndũ nĩnĩsĩ mũno kana kũi ũmwe wa maũndũ asu ũvithĩtwe kwake; nũndũ ũndũ ũũ ndwĩkĩtwe ũtee kĩmbithĩnĩ. 27Mũsumbĩ Akiliva, nĩwĩtĩkĩlaa athani? Nĩnĩsĩ kana nũmetĩkĩlaa. 28#Meko 11.26; 1 Vet 4.16.Na Akiliva amũtavya Vaulo, Vatiele vanini ũngalyũle ndw’ĩke Mũklĩsto. 29Na Vaulo asya, Nĩngũvoya Ngai, ethĩwa nĩ vanini kana ethĩwa nĩ vanene, tuue weka, ĩndĩ o na onthe ala meũmbĩw’a ũmũnthĩ, methĩwe mailyĩ takwa, ate o mĩnyololo ĩno.
30Na mũsumbĩ ookĩla, na ngavana, na Velinike, na ala mekalĩte vamwe nao; 31na maumaala ũtee, maneenan’ya, maiasya, Mũndũ ũsu nde na ũndũ waĩle kĩkw’ũ kana kwovwa. 32#Meko 25.11.Na Akiliva amwĩa Vesito, Kethĩwa ndaamwĩkaĩla Kaisali, ethĩwa athaw’a.
Currently Selected:
MEKO MA ATŨMWA 26: Mbivlia
Highlight
Copy
Compare
Share
Want to have your highlights saved across all your devices? Sign up or sign in
https://shop.biblesociety-kenya.org/
www.biblesociety-kenya.org
God's word open for all
©Bible Society of Kenya, 1956
