SEFANIA 1
1
1Eri nario ring’ana ri’Omonene riachete ase Sefania, mosinto o Kusi, o Gedalia bw’Amaria, bw’Hezekia, ekero Yosia, mosinto bw’Amoni, arenge omoruoti bw’Abayuda.
Rituko ri’ekina ri’Omonene
2Omonene nigo agoteba iga: “Ninsirie kegima kera egento kerue ase ense. 3Ninsirie mwanyabanto, ne ching’iti, ne chinyoni chia igoro, ne chinswe chi’enyancha. Ninsirie nebikorenta okogocha amo nabakori amabe; ee, ninsirie mwanyabanto korwa ase ense.” Nabo Omonene atebire.
4“Nindambore okoboko kwane igoro y’Abayuda, na igoro y’abanto bonsi abamenyete Yerusalemu. Ninsirie korwa aase aiga abatigari abwo bagosasima Baali, na amarieta ’ababani na ay’abakuani abagokorera emegwekano. 5Ninsirie baria bakoriina kerama igoro gosasima erioba, na omotienyi, ne ching’enang’eni boigo ninsirie abanto baria bagonsasima inche Omonene na batiana asende, naende batiana nase enyasae eria Milikomu. 6Ninsirie abairanire nyuma batigire kombwatia inche Omonene, na baria batari kondigia inche Omonene, gose komboria amang’ana.”
7Tegerera okire‐kiri ase obosio bw’Omonene Nyasae! Rituko ri’Omonene nigo rire ang’e; Omonene bwariganirie ekeng’wanso, bwatananire abwo arangeirie ase ekegeni kiaye na abasesenie. 8Nigo agoteba iga: “Ase rituko riria ri’ekeng’wanso kiane inche Omonene nindue egesusuro ase abagambi, na ase abamura b’omoruoti, na ase bonsi ababegete chianga chie chinse chingeni.
9“Boigo rituko erio nindue egesusuro ase bonsi abwo bagotamboka ase omoriibo bw’egesieri inse,#1:9 Rora 1 Sam 5:5 na ase baria baichoirie ase chinyomba chi’abanene nebinto bi’obourereria, na ebi’obong’ainereria.”
10Omonene nigo agoteba iga: “Ase rituko erio eriogi ri’okorera ndigugwe korwa ase Egeita gie Chinswe, na okweumia nkoigugwe korwa ase ensemo enyia y’omochie, na endumo enene korwa ase ebigoro. 11Inwe abamomenyete ase ensemo eye ekorokwa Ekonu, rera, ekiagera abaonchoreria bonsi basirigwe, na abasangereria bonsi be chibesa basirigwe.
12“Ase engaki eria nimbe nkorigarigia Yerusalemu ase okoyomoreka ne chitaya; nindue egesusuro ase abanto baria bamenyete bare nobotoereru, buna edivai ekirete ase eturubo, abwo bagwetebia ase chinkoro chiabo: Omonene takonyara gokora kende, amaya gose amabe. 13Chinibo chiabo nchisakorwe, ne chinyomba chiabo nchisarigwe chitigwe bosa. Nabaisa koagacha chinyomba, tibagochimenya, nabaisa gosimeka emesabibu, tibakonywa edivai ekorwao.”
14Rituko rinene ri’Omonene ng’ang’e rire, nigo rire ang’e mono rikoayerera. Tegerera oigwe, rituko ri’Omonene ngocha rire! Abarwani esegi chituoni nigo bakorera bare nobororo. 15Rituko riria nigo rire eri’endamwamu, ne rituko ri’emechando na obororo, ne rituko ri’ogosirigwa na ogotigara bosa, ne rituko ri’omosunte na omorumbe, ne rituko ri’amare na omosunte ekerima. 16Rituko riria neri’okobugigwa kw’ebitureri na okorera gw’esegi igoro y’emechie egiteire chindwaki, na igoro y’emerobiri emetambe mono.
17“Nindete emechando emenene igoro ya mwanyabanto goika babe bagotaba‐taba buna emeuko, ekiagera bakorire ebibe asende inche Omonene. Amanyinga abo naumorwe buna eogoto, na emebere yabo netugutwe buna esike.”
18Ase rituko riria ri’endamwamu y’Omonene chifeta chiabo ne chitahabu chiabo tibikonyara kobatooria. Ense yonsi nesambwe esirigwe nomorero bwe risemi riaye. Mobosokano narente omoerio bw’okoondokia ase abanto bonsi bamenyete ase ense.
Currently Selected:
SEFANIA 1: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
