HABAKUKI 3
3
Ogosaba kwa Habakuki
1Oko nogosaba kw’omobani Habakuki.#3:1 Ekeibirania: Oko nogosaba kw’omobani Habakuki, ase Siginoti
2Aye Omonene, naigure chinkuma chiao, nairokire.
Omonene, ogokora kwao tiga kobe okoyia ase emiaka eye,
tiga komanyekane ase emiaka eye.
Ekero ore nendamwamu oinyore amabera.
3Nyasae ngocha are korwa Temani
ee, Ere oyore Omochenu ngocha are korwa ase egetunwa gia Parani.
Obonene bwaye mbotube igoro chionsi,
na ense neichorwe nogotogigwa kwaye.
4Okobara kwaye nigo konga buna okw’erioba,
gokomoreka korwa ase okoboko kwaye,
aroro agwo obobui bwaye nao bobisire.
5Amarwaire agoita nigo atang’aine bosio bwaye,
na amaakwa nigo akobwatia chimbaratero chiaye.
6Ekero agotenena, ense nigo agotengechigwa,
na ekero akorigereria, abanto b’ebisaku nigo bakonyegerigwa.
Ebitunwa biarengeo korwa kare nigo bikorimera gochia inse.
Ere nigo agotaara ase chinchera chiaye chia kare.
7Nkarora chinyomba chire Kusani chichandegete,
ne chieema chi’ense ya Midiani chikanyegerigwa.
8Inee! Aye Omonene nigo ogechirie ne chindooche,
gose endamwamu yao nigo ere igoro ase chirochio?
Inee! Nigo ore nekeririanda ase chinyancha,
ekiagera nigo gwachete ne chibarasi chiao koriinete chigari chiao chi’obobui?
9Obota bwao bwaorokigwe maiso marore
amo nemegwe ye ring’ana riao kwarierete ebisaku eira.
Nigo gwatandorete ense ne chindooche.
10Ebitunwa nigo biakoroche, bikanyegerigwa,
amache e chiooro agaeta;
chindiba chigaaka amariogi,
chikaimokia amaboko abo gochia igoro.
11Ekero emegwe yao yarenge korunda na komesa,
ne ritimo riao riarenge komekameka,
na erioba na omotienyi bigatenena aase abo.
12Aye nigo gwaetete ase ense kore nekeririanda,
okamionogorera abanto b’ebisaku inse kore nendamwamu.
13Aye nigo gwasogete ase ogotooria abanto bao,
ee, okarentera omoakwa amaguta oo ogotooreka.
Nigo gwasenyentete ekerama ki’enyomba y’omokori amabe,
okayetagora korwa ase oboroso goika ase egechuria.
14Aye nigo kwabetete emetwe y’abarwani esegi babo namatimo abo abanyene,
ekero batocherete buna ekembugumbugu kegocha gotoserebania
bare nomochengo gotosiria buna abataka bagosirigwa bobisi.
15Nigo gwaetete ase enyancha ne chibarasi chiao,
ogaetera ase emerindo yarenge koeera ne chinguru.
16Ekero naigwete amang’ana ayio, enda yane egatengechigwa,
ebikoba biane bikaiguswa ekero naigwete okoeera okwo,
amauga ’omobere one akarwara na kogunda,
ngatengechigwa aase nateneine.
Nimbe ndemereretie ase rituko riria ri’emechando,
ekero omobisa arache korwania egesaku giaito.
17Emeko tegosicha,
na emesabibu tekwama;
emezeituni nigo erabe bosa tiyama,
na emegondo tekwama chindagera.
Amaicho e ching’ondi nasirigwe korwa ase ameri,
na amaicho e chiombe takobao.
18Nonya naboigo ningokere Omonene, ninchengere Nyasae ore ogotooreka kwane.
19Nyasae oyore Omonene, nere chinguru chiane;
nigo agokora amagoro aane abe amaango buna ay’ensune,
nigo agontaaria ase ebitunwa biane igoro.
Ase omoteria. Ogotera kogoterwa ase okobugigwa kw’amakano aane.
Currently Selected:
HABAKUKI 3: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
