SEFANIA 2
2
Ogokurerwa gw’okoonchoka
1Inwe abanto b’egesaku getari korora obosooku, esangererie inwe abanyene, mweborie, 2ekero aya achigetwe ataraikeranigwa, ekero rituko riria rirairurwe buna omoiriro okoirurwa na endamwamu entindi y’Omonene etarabachera, ee, ekero rituko ri’endamwamu y’Omonene ritarabachera. 3Inwe mwensi abamore abaitongo ase ense eye, inwe abamobwatete amachiko aye, morigie Omonene; rigia oboronge, rigia ay’obokanyeku. Ande nabo morabaise gokengerwa ase rituko riria ri’endamwamu y’Omonene.
Okogambigwa kw’ebisaku bietanaine Abaisraeli
4Omochie o Gasa nong’anyigwe, na oyo bw’Asikeloni notigwe ore bosa; abanto b’Asidodi nabaserigwe, na omochie bw’Ekironi notagorwe. 5Obobe nobwaino inwe abanto momenyete ase enyancha mbarabare inwe egesaku ki’Abakereti! Aye Kanani, ense y’Abafilisti, ring’ana ri’Omonene nigo rire mamincha yao. “Ningosirie goika monto onde tatigara omenyete ime yao.” 6Ense eyio ere mbarabare y’enyancha nebe amarisio aase abarisia barabe namakuruma abo na ameri ’amaicho abo. 7Ense eyio nebe egetari ki’abatigari b’Abayuda, nao barabe bakorisia chitugo chiabo na korara ase chinyomba chire agwo Asikeloni chingaki chia mogoroba. Omonene, Nyasae obo, nabainyore, abarusie ase obosibwa bwabo.
8“Naigure Abamoabu bagochecheria abanto baane na Abaamoni bakobarama na kobachecheria, naende buna bagwetogia ase ogotumana chimbebe chiabo, na gosoa ase ense yabo.” 9Ase ayio Omonene bw’Emeganda, Nyasae bw’Abaisraeli, nigo agoteba iga: “Ekeene, buna inde moyo, ense ya Moabu nebe buna Sodomu, na ense y’Abaamoni nebe buna Gomora, ense ere namasa ne chingoro chire nomonyo, aase agwo nabe agendererete gosareka botambe. Abatigari b’abanto baane mbasakore abanto abwo, na abatooregete b’egesaku kiane mbaboose babakore babe abasomba babo.”
10Okwo nakwo korabe ogoakanwa kwabo ase engencho y’oboenenu bwabo, ekiagera bachecheretie na gwetogia igoro y’abanto b’Omonene bw’Emeganda. 11Omonene nabaondokie. Nakore chinyasae chionsi chire ase ense eyio chibe bosa. Abanto be chinse chi’ebisaku mbamosasime, kera oyomo aase aye.
12“Nainwe Abaetiopia boigo inche Omonene nimbaite nomoro one.”
13Omonene narambore okoboko kwaye gochia sugusu asirie Abaasuri; nasirie na Nineva obe bosa, na ayuomie obe erooro. 14Aase agwo nabe ase amaicho e chitugo akorara, ne ching’iti chi’orosana ao ao; chinsoti ne ching’iti chinke chinga buna ebirongo nchimenye ase ebisure bi’emetobwa yaye; chinyakweumia nachieumie ase chitirisa, na ogosareka goike ase emeriibo ya bisieri inse, ekiagera emecharake y’amaagacho abo nesareke. 15Oyo noro omochie oria orenge nomogoko, omenyete nobotoereru, orenge gwetogia, oteba: “Inche ninche inde bweka, na onde tari onga buna inche.” Naki omochie oyio osarigwe otigaire bosa, obeire aase ching’iti chi’orosana chigotimokera! Kera omonto oraete ang’e noro nigo arabugie omororia ase ogokumia na gosamunsa amaboko aye.
Currently Selected:
SEFANIA 2: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
