ZABURI 8
8
Obonene bwa Nyasae na engencho ya mwanyabanto
(Ogotera gwa Daudi)
1Aye Omonene, aye Omonene oito,
erieta riao naki rire nobonene obonge ase ense yonsi!
Obonene bwao nigo bogotogigwa nonya ngoika igoro.
2Ase emenwa y’abana na ey’abakogonka
nigo kweagacheire eburi bosio bw’ababisa bao,
erinde okoiyeria inse ababisa bao na abakorusia egesiomba.
3Ekero nkorigereria gochia igoro,
na korora emeremo gwakorete namaboko ao,
omotienyi ne ching’enang’eni, ebi kwabegete aase abo;
4omonto inki aisaine aye ogendererete komorengereria?
Mwanyabanto ninki aisaine aye okomorenda?
5Kwamokorire koba inse ake asore aye omonyene, Nyasae;
kwamoboirie obonene na amasikani.
6Kwamobekire kogambera ebinto bionsi gwatongete;
kwabekire ebitongwa bionsi inse y’amagoro aye:
7ching’ondi chionsi ne chiombe, amo ne ching’iti chi’orosana,
8ne chinyoni chikoiruruka amo ne chinswe chi’enyancha,
na kende gionsi kegoetanana ase chindiba chie chinyancha.
9Aye Omonene, aye Omonene oito,
erieta riao naki rire nobonene ase ense yonsi!
Currently Selected:
ZABURI 8: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
