ZABURI 9
9
Okoiraneria Nyasae ng’a mbuya mono ase engencho y’oboronge bwaye
(Ogotera gwa Daudi)
1Aye Omonene, ningoakere ng’a mbuya mono nenkoro yane yonsi.
Nindarie emeremo yao yonsi y’ogokumia.
2Ningoke na gochenga mono ase engencho yao,
nintere na gotogia erieta riao, aye Omonene Ore Igoro Mono.
3Ababisa baane nigo bakoirana nyuma,
bagwe inse na gosirigwa ase obosio bwao.
4Aye kwanachire ekina kiane ase oboronge;
noikaransete ase ekerogo kiao ki’obonene kore omonachi ebina omoronge.
5Aye gwatogonyeire abanto b’ebisaku na gosiria abakori amabe,
gwasiririe amarieta abo, tibakoinyorwa kare na kare.
6Ababisa baerire, basirigwe kegima,
gwatagoire emechie yabo,
barabwo bebirwe, tibakoinyorwa nonya ng’ake.
7Korende Omonene nigo are omoruoti o kare na kare,
obekire ang’e ekerogo kiaye ki’obonene, erinde anache ekina.
8Nigo aragambie ense ase oboronge
na konachera abanto ekina gi’ekeene atari gwanchereria.
9Omonene nigo are obotamero ase abwo bagokorerwa bobe,
nere obotamero ase chingaki chi’emechando.
10Abwo bonsi bamanyete erieta riao, nigo bagosemeretie,
ekiagera aye Omonene togotiga abwo bagokorigia.
11Tera amatera ase ogotogia Omonene oyomenyete Sayoni!
Tebia ebisaku bionsi ogokora kwaye okonene!
12Ere oyo okorusia egesiomba ase okomocha kw’ogoitera amanyinga
na koinyora abaichanete,
tari kweba ekerero ki’abwo bagokorerwa bobe.
13Aye Omonene ndorere amabera!
Rigereria orore emechando eye abanto bangechete bakondetera.
Aye kwandusirie korwa ase ebiita bi’amakweri,
14erinde intenene ase abanto ba Sayoni,
mbatebie ase ebiita biabo amang’ana onsi agerire nkogotogia;
ningokere ogotooreka kwao.
15Abanto b’ebisaku bagure ase eirima bakunyete,
na ase oboreba babisete babwatirwe abanyene.
16Omonene bwemanyekanirie ase okonacha ebina bia boronge;
abakori amabe babwatirwe ase ogokora kwabo abanyene.
17Abakori amabe nigo bakogenda gochia aase abakure,
naboigo nabanto bonsi b’ebisaku abwo bebire Nyasae.
18Abanto abaremerwa tibakwebwa kogenderera botambe,
na ogosemeria kw’abagokorerwa bobe tikogosira nonya ng’ake.
19Omonene, inchuo! Totiga abanto babue,
tiga abanto b’Ebisaku banacherwe ekina ase obosio bwao.
20Omonene, obaondokie!
Tiga bamanye ng’a barabwo mwanyabanto bare rioka.
Currently Selected:
ZABURI 9: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
