ZABURI 7
7
Ogosaba kw’omonto ogokorerwa aya atari boronge
(Ogotera gwa Daudi)
1Omonene, Nyasae one, naye ngotamera,
intoorie korwa ase abachandi baane, nkonye!
2Onye taibo, nigo barantaborane bare buna chindo,
bankurure gochia aase omonto onde atache gontooria.
3Omonene, Nyasae one, onye nakorire amang’ana aya,
onye nakorire amabe namaboko aane,
4onye naakanire omosani one
amabe, gose nasakoire ebinto bi’omobisa one engencho ende etaiyo,
5rirorio tiga omobisa one ambwatie na kombwata,
erio antiringere inse asirie obogima bwane,
ansarerie amasikani.
6Aye Omonene, imoka kore nendamwamu yao,
imokerera igoro orwanie ekeririanda ki’ababisa baane!
Inchuo onkonye! Aye gwachikire ekina.
7Abanto b’ebisaku bionsi tiga basangererekane bagoetanane,
obagambere korwa ase ekerogo kiao ki’obonene aaria igoro.
8Omonene, naye okonachera abanto bonsi ekina.
Aye Omonene, onachere inche ekina koreng’ana noboronge bwane,
na buna ntari na komocha.
9Tiga ebibe bi’abakori amabe biere,
korende omonto omoronge omotenenie bokong’u.
Aye Nyasae omonyene oboronge nigo okorenga chinkoro na emioyo.
10Nyasae nere enguba yane,
ere nigo agotooria abare ne chinkoro chindonge.
11Nyasae nigo are omogambi omoronge,
na kera rituko nigo akoba nekeririanda ase abakori amabe.
12Omonto karaange gweitia, Nyasae natierie omoro oye,
natinge obota bwaye na abobeke ang’e.
13Oroisirie ebirwanero biaye ase ogoita omonto oyio,
akore emegwe yaye esambe buna omorero.
14Omonyabibe nigo aichire nobobe,
nigo are inda nogosaria na koibora oborimo.
15Omonto oyio nigo agokunya eirima entambe,
erio ogwa ere omonyene ase eirima eyio.
16Emechando yaye nigo ekomoiranera;
na ogokora kwaye okobe nigo gokomogwera omonyene.
17Ning’akere Omonene ng’a mbuya mono ase engencho y’oboronge bwaye;
nintere ogotera kw’ogotogia erieta ri’Omonene, oyore Igoro Mono.
Currently Selected:
ZABURI 7: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
