ZABURI 56
56
Ogosaba gw’okoba nokwegena ase Nyasae
(1 Sam 21:10–15)
(Ogotera gwa Daudi ekero Abafilisti bamobwatete agwo Gati)
1Aye Nyasae, indorere amabera,
ekiagera abanto nigo baganetie ng’a bang’ite bansirie kegima;
omobaso boira ababisa baane nigo bakondwania esegi.
2Omobaso boira ababisa baane nigo bakondigia baamere,
ee, mbare abange mono bakondwania ase oboenenu.
3Ekero inde nobwoba, nigo ngosemeretie.
4Ase okobua kwa Nyasae nintogie ring’ana riaye,
ninsemeretie Nyasae ntari nobwoba.
Inee! Mwanyabanto inki baranyare gonkorera?
5Omobaso boira ababisa baane nigo bakoonchorana amang’ana aane;
ebirengererio biabo bionsi nigo bire ebibe igoro yane.
6Nigo bagosangererekana amo baroberia komboera,
barigererie kera egento ngokora;
naboigo bagendererete korigia obogima bwane babosirie.
7Inee! Nabatooreke korwa ase obobe buna obwo?
Taibo. Aye Nyasae, basirie abanto abwo kegima nendamwamu yao entindi.
8Omonene, aye nomanyete okoong’anya kwane,
nigo osangereretie amariga aane okayabeka ase egetono kiao.
Inee! Ayio onsi tarikiri ase ebuku yao?
9Ekero ndarangerie Omonene, ababisa baane mbairanigwe gochia nyuma.
Nimanyete kegima ng’a Nyasae nigo are ase ensemo yane.
10Ase okobua kwa Nyasae nintogie ring’ana riaye;
ee, ase okobua kw’Omonene nintogie ring’ana riaye.
11Nigo nsemeretie Nyasae ntari nobwoba.
Inee! Mwanyabanto inki aranyare gonkorera?
12Aye Nyasae, goika ng’ikeranie chiira nakorierete;
naende ninkoruere ebing’wanso bi’okoiraneria ng’a mbuya mono.
13Aye gwatooririe omoyo one korwa ase amakweri,
ee, gwatangire amagoro aane tagwa,
erinde inyare gotaara ase obosio bwao, aye Nyasae,
ase oborabu bw’abwo bare moyo.
Currently Selected:
ZABURI 56: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
