ZABURI 55
55
Ogosaba kw’omonto ogokorerwa bobe
(Ogotera gwa Daudi)
1Aye Nyasae, tegerera oigwe ogosaba kwane,
tobaisa kwebisa toigwa ogosaba kw’ogosorora kwane.
2Inyigwe na ong’iranerie;
inche nigo nkona‐korera na kweumia inde nobororo.
3Ninde nobwoba ase engencho y’amariogi ’ababisa baane,
na ase engencho y’obobe bw’abakori amabe.
Abanto abwo nigo bakondetera amaakwa,
bakongecha bare nendamwamu.
4Enkoro yane nigo ere nomoichano,
nasoirwe nokogoswa kw’amakweri.
5Nasoirwe nobwoba na okoiguswa,
nabuirwe nomoichano omonene.
6Bono nigo ngoteba, “Onye ndiria nabwate chimbaba buna riruma,
nanga nigo nare koiruruka ngende gotimoka.
7Ee, nigo nanga nare kogenda aare, imbe ntoorete ase erooro.
8Nigo nare kominyoka chimbero, erinde inyenyorere aase nkwebisa,
korwa ase omwaga omotindi na ekembugu‐mbugu.”
9Aye Omonene, saria emeroberio y’abanto abwo,
otantanie chimeme chiabo tibaigwana.
Narorire obotindi na amariomana bire agwo ase omochie,
10bikoyoetanana igoro ase chindwaki omobaso na obotuko;
amabe a mobosokano na emechando bire ase omochie oyio.
11Obosareku nigo boichire ime yaye,
obong’ainereria na ogokorera abande bobe tibikorua ase chinchera chiaye.
12Onye nomobisa ore gonchecheria,
nanga nigo nare koremereria;
naende onye nomobisa ore gonkorera bobe ase oboenenu,
nanga nigo nare kwebisa.
13Korende bono naye ogonkorera bobe,
aye oyo kwarenge obomo nainche, omosani tomanyaine.
14Nigo tware koba tokogamba amo amang’ana amaya ay’ogosemania,
naende nigo tware koba togosasima amo ase enyomba ya Nyasae.
15Tiga amakweri abachere ababisa baane mobosokano,
bagende gochia aase abakure bare moyo;
obobe nigo bore ase obomenyo bwabo, na ase chinkoro chiabo.
16Korende inche nigo nkomorangeria Nyasae,
nere Omonene nantoorie.
17Kera omogoroba, na emambia, na mobaso gati,
nigo nkwereera ase engencho y’emechando yane,
na Omonene naigwe eriogi riane.
18Ere nantoorie, andende buya
korwa ase esegi eyio nkorwana,
ekiagera ababisa abange banyimokeire.
19Nyasae oyio obeire okogamba korwa kare,
nanyigwe inche, erio abue abanto
abwo, ekiagera abwo tibari koonchoka na komoiroka Nyasae.
20Oyorenge omosani one nigo aramborete okoboko kwaye,
akore bobe ase abakorete omorembe nere,
osaririe okobwatana kwaye kw’ogotianania.
21Chinkwana chiaye nigo chiarenge chinyororo kobua amaguta atundire,
korende ebirengererio biaye nebi’esegi;
amang’ana aye nigo arenge amororo kobua amaguta,
nonya naboigo nigo akonachanacha buna emioro.
22Motweke Omonene chigurube chiao,
nere nakobwate nokoboko kwaye akorende;
ere tagotiga omonyaboronge abugwe namabe.
23Korende abanto abaiti na abang’ainereria
aye Nyasae nobaturunkanie gochia ase eoromomo,
ekero bataraika ase ekeng’ese ki’obogima bwabo,
korende inche nimbe nkwegenete aye Omonene.
Currently Selected:
ZABURI 55: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
